et nauticæ artis peritum, jussit insidentem duobus inflatis utribus, litteras insutas habentibus, quos ab inferiore parte duabus regulis inter se distantibus commiserat, ire septem millium passuum trajectum. Quod ita perite gregalis fecit, ut cruribus, velut gubernaculis, dimissis cursum dirigeret, et procul visentes, qui in statione erant, marinæ specie belluæ deciperet[60].
7. Hirtius consul ad Decimum Brutum, qui Mutinæ ab Antonio obsidebatur, litteras subinde misit plumbo scriptas[61], quibus ad brachium religatis, milites Scultennam amnem transnabant.
8. Idem columbis, quas inclusas ante tenebris et fame affecerat, epistolas seta ad collum religabat, easque a propinquo, in quantum poterat, mœnibus loco emittebat. Illæ lucis cibique avidæ, altissima ædificiorum petentes, excipiebantur a Bruto: qui eo modo de omnibus rebus certior fiebat, utique postquam disposito quibusdam locis cibo columbas illuc devolare instituerat[62].
1. Bello civili, quum Ategua urbs in Hispania Pompeianarum partium obsideretur, Munatius, interim rex[63], tanquam Cæsarianus tribuni cornicularius vigiles quosdam excitavit, e quibus aliquos evitans, constantia fallaciæ suæ per medias Cæsaris copias præsidium Pompeii transduxit[64].
2. Hannibale obsidente Casilinum, Romani farinam
