Pagina:Frontin - Les Stratagèmes - Aqueducs de la ville de Rome, trad Bailly, 1848.djvu/234

Haec pagina emendata est
232
STRATEGEMATICON LIB. III.

terra marique obsidentibus, partem classis suæ procul armatam jussit ostendi. Ad ejus conspectum quum evolassent nostri, ipse reliquis, quas in occulto tenuerat, navibus Lilybæi portum occupavit[51].


XI. De simulatione regressus.

1. Phormion[52] dux Atheniensium, quum depopulatus esset agros Chalcidensium, legatis eorum, de ea re querentibus, benigne respondit, et nocte, qua dimissurus illos erat, finxit litteras sibi supervenisse civium suorum, propter quas redeundum haberet; ac paulum regressus, dimisit legatos. His omnia tuta, et abisse Phormionem renuntiantibus, Chalcidenses spe et oblatæ humanitatis, et abducti exercitus, remissa urbis custodia, quum confestim Phormion revertisset, prohibere inexspectatam vim non potuerunt.

2. Agesilaus, dux Lacedæmoniorum, quum Phocenses obsideret[53], et intellexisset, eos, qui tunc præsidio illis erant, jam gravari belli incommodo, paululum regressus tanquam ad alios actus, liberam recedendi occasionem his dedit. Non multo post, milite reducto, destitutos Phocenses superavit.

3. Alcibiades, adversus Byzantios[54], qui se mœnibus continebant, insidias disposuit, et simulato regressu, incautos eos oppressit.

4. Viriathus, quum tridui iter discedens confecisset,