Pagina:Frontin - Les Stratagèmes - Aqueducs de la ville de Rome, trad Bailly, 1848.djvu/230

Haec pagina emendata est
228
STRATEGEMATICON LIB. III.

X. De insidiis per quas eliciantur obsessi.

1. Cato in conspectu Lacetanorum[42], quos obsidebat, reliquis suorum submotis, Suessetanos[43] quosdam ex auxiliaribus, maxime imbelles, aggredi mœnia jussit: hos quum facta eruptione Lacetani facile avertissent, et fugientes avide insequuti essent, illis, quas occultaverat, cohortibus oppidum cepit[44].

2. L. Scipio, in Sardinia[45], cujusdam civitatis per tumultum relicta oppugnatione, quam instruxerat, speciem fugientis præstitit; insequutisque temere oppidanis, per eos, quos in proximo occultaverat, oppidum invasit.

3. Hannibal, quum obsideret civitatem Himeram, castra sua capi de industria passus est, jussis recedere Pœnis, tanquam prævaleret hostis. Quo eventu Himeræis ita deceptis, ut gaudio impulsi, relicta urbe, procurrerent ad Punicum vallum, Hannibal vacuam urbem, per eos, quos in insidiis ad hanc ipsam occasionem posuerat, cepit.

4. Idem, ut Saguntinos[46] eliceret, rara acie ad muros accedens, ad primam eruptionem oppidanorum simulata fuga cessit, interpositoque exercitu, ab oppido interclusos a suis hostes, in medio trucidavit.

5. Himilco Carthaginiensis[47], apud Agrigentum, juxta oppidum partem copiarum in insidiis posuit, præcepitque his, ut, quum processissent oppidani, ligna