Pagina:Frontin - Les Stratagèmes - Aqueducs de la ville de Rome, trad Bailly, 1848.djvu/200

Haec pagina emendata est

STRATEGEMATICON
LIBER TERTIUS.




PRÆFATIO.

Si priores libri responderunt titulis suis, et lectorem hucusque cum attentione perduxerunt, edam nunc circa oppugnationes urbium defensionesque strategemata: nec morabor ulla prælocutione, prius traditurus, quæ oppugnandis urbibus usui sunt, tum, quæ obsessos instruere possint. Depositis autem operibus et machinamentis, quorum expleta jam pridem inventione[1], nullam video ultra artium materiam, has circa expugnationem species strategematon fecimus:

Cap. I. De repentino impetu.
II. De fallendis iis qui obsidentur.
III. De eliciendis ad proditionem.
IV. Per quæ hostes ad inopiam redigantur.
V. Quemadmodum persuadeatur obsidionem permansuram.
VI. De destructione præsidiorum hostium.
VII. De fluminum derivatione, et vitiatione aquarum.
VIII. De injiciendo obsessis pavore.
IX. De irruptione ex diversa parte, quam exspectamus.
X. De insidiis per quas eliciantur obsessi.
XI. De simulatione regressus.