Pagina:Frontin - Les Stratagèmes - Aqueducs de la ville de Rome, trad Bailly, 1848.djvu/198

Haec pagina emendata est
196
STRATEGEMATICON LIB. II.

atque ita Pœnis existimantibus, superiores fuisse acie nostros, terribilis excessit.

10. Pœni, classe superati, quia instantem avertere Romanum studebant, simulaverunt, in vada naves suas incidisse: hærentesque imitati, effecerunt ut victor, eorum timens casum, spatium ad evadendum daret.

11. Commius Atrebas, quum victus a divo Julio ex Gallia in Britanniam fugeret, et forte ad Oceanum secundo vento quidem, sed æstu recedente, venisset, quamvis naves in siccis litoribus hærerent, pandi nihilominus vela, jussit. Quæ quum persequens eum Cæsar, ex longinquo tumentia et flatu plena vidisset, ratus, prospero sibi eripi cursu, recessit.