Pagina:Frontin - Les Stratagèmes - Aqueducs de la ville de Rome, trad Bailly, 1848.djvu/194

Haec pagina emendata est
190
STRATEGEMATICON LIB. II.

ex iis quos habebat, per aversam partem nocte missos, jussit, qua præcipue conspicui forent hostibus, redire in castra, et accedentium novarum virium speciem præbere. Atque ita simulatis auxiliis tutatus se est, donec instrueretur exspectatis.

4. Iphicrates Atheniensis, quum campestribus locis castra haberet, explorassetque, Thracas ex collibus, per quos unus erat descensus, nocte ad diripienda castra venturos, clam duxit exercitum, et in utroque viæ latere, per quam transituri erant Thraces, distributum collocavit: hostemque decurrentem in castra, in quibus multi ignes per paucorum curam instituti, speciem maneritis ibi multitudinis servabant, a lateribus adortus, oppressit[119].


XIII. De effugiendo.

1. Galli, pugnaturi cum Attalo, aurum omne et argentum certis custodibus tradiderunt, a quibus, si acie fusi essent, spargeretur, quo facilius colligenda præda hostem impeditum effugerent[120].

2. Tryphon, Syriæ rex, victus, per totum iter fugiens pecuniam sparsit: eique sectandæ Antiochi equites immoratos effugit.

3. Q. Sertorius, pulsus acie a Q. Metello Pio, ne fugam quidem sibi tutam arbitratus, abire dispersos milites jussit, admonitos, in quem locum vellet convenire.