laxatis manipulis, et concesso fugæ spatio, dissipatos sine periculo suorum trucidavit[85].
3. C. Cæsar Germanos inclusos, ex desperatione fortius pugnantes, emitti jussit, fugientesque aggressus est.
4. Hannibal, quum ad Thrasymenum inclusi Romani acerrime pugnarent, diductis ordinibus fecit eis abeundi potestatem, euntesque sine suorum sanguine stravit.
5. Antigonus, rex Macedonum, Ætolis, qui in obsidionem ab eo compulsi, fame urgebantur, statuerantque, eruptione facta, commori, viam fugæ dedit: atque ita infracto impetu eorum, insequutus aversos cedidit.
6. Agesilaus Lacedæmonius, adversus Thebanos[86], quum acie confligeret, intellexissetque hostes, locorum conditione clausos, ob desperationem fortius dimicare, laxatis suorum ordinibus, apertaque Thebanis ad evadendum via, rursus in abeuntes contraxit aciem, et sine jactura suorum cecidit aversos.
7. Cn. Manlius consul quum, ex acie reversus, capta ab Hetruscis Romana castra invenisset, omnibus portis statione circumdatis, inclusos hostes in eam rabiem efferavit, ut ipse in prœlio caderet. Quod ut animadverterunt legati ejus, ab una parte remota statione, exitum Hetruscis dederunt, et effusos persequuti, occurrente altere consule Fabio, ceciderunt[87].
