hostem in loca insessa; deinde ubi res poposcit, conversus, et in fronte et utrisque lateribus ad internecionem cecidit, capto etiam duce eorum Perpenna.
33. Idem adversus Mithridatem, in Armenia, numero et genere equitum prævalentem, tria millia levis armaturæ, et quingentos equites nocte in valle sub virgultis, quæ inter bina castra erant, disposuit; prima deinde luce in stationem hostium emisit equites ita formatos, ut, quum universus cum exercitu hostium equitatus prœlium inisset, servatis ordinibus, paulatim cederent, donec spatium darent consurgendi a tergo ob hoc dispositis. Quod postquam ex sententia contigit, conversis, qui terga dedisse videbantur, medium hostem trepidantem cecidit; ipsos etiam equos, pedite cominus accedente, confodit: eoque prœlio fiduciam regi, quam in equestribus copiis habebat, detraxit.
34. Crassus, bello fugitivorum, apud Cathenam[72] bina castra cominus cum hostium castris vallavit; nocte deinde commutatis copiis, manente prætorio in majoribus castris, ut fallerentur hostes, ipse omnes copias eduxit, et in radicibus prædicti montis constituit; divisoque equitatu, præcepit L. Quinctio, partem Spartaco objiceret, pugnaque eum frustraretur; parte alia Gallos Germanosque ex factione Casti et Gannici eliceret ad pugnam, et pugna simulata deduceret, ubi ipse aciem instruxerat. Quos quum barbari insequuti essent, equite recedente in cornua, subito acies Ro-
