24. Idem ad Thrasymenum[65], quum arcta quædam via in radice montis in campos patentes duceret, simulata fuga per angustias ad patentia evasit, ibique castra posuit, ac nocte dispositis militibus, et per collem, qui imminebat, et in lateribus angustiarum, prima luce, nebula quoque adjutus, aciem direxit. Flaminius velut fugientem insequens, quum angustias esset ingressus, non ante providit insidias, quam simul a fronte, lateribus, tergo circumfusus, ad internecionem cum exercitu cæderetur.
25. Idem Hannibal, adversus Junium dictatorem[66], nocte intempesta sexcentis equitibus imperavit, ut in plures turmas segregati, per vices sine intermissione circa castra hostium se ostentarent. Ita tota nocte Romanis in vallo, statione ac pluvia, quæ forte continua fuerat, inquietatis confectisque, quum receptui signum jam Junius dedisset, Hannibal suos requietos eduxit, et castra ejus invasit.
26. Epaminondas Thebanus, in eumdem modum, quum Lacedæmonii ad Isthmum[67] vallo ducto Peloponneson tuerentur, paucorum opera levis armaturæ, tota nocte inquietavit hostem; ac deinde prima luce vocatis suis, quum Lacedæmonii se recepissent, subito universum exercitum, quem quietum habuerat, admovit, et per ipsa munimenta, destituta propugnatoribus, irrupit.
27. Hannibal, directa acie ad Cannas, sexcentos equites Numidas transfugere jussit[68]: qui ad fideni faciendam gladios et scuta nostris tradiderunt, et in ulti-
