tergo suis, Romanis in ora et oculos incideret. Quibus incommodis mire hosti adversantibus, illam memorabilem adeptus est victoriam.
8. Marius adversus Cimbros ac Teutonos constituta die pugnaturus, firmatum cibo militem ante castra collocavit, ut per aliquantum spatii, quo adversarii dirimebantur, exercitus hostium potius labore itineris profligaretur: fatigationi deinde eorum incommodum aliud objecit, ita ordinata suorum acie, ut adverso sole[18], et vento, et pulvere, barbarorum occuparetur exercitus.
9. Cleomenes Lacedæmonius, adversus Hippiam Atheniensem, qui equitatu prævalebat, planitiem, in qua dimicaturus erat, arboribus prostratis impedivit[19], et inviam equiti fecit.
10. Hiberi in Africa[20] ingenti hostium multitudine excepti, timentesque ne circuirentur, applicuerunt se flumini, quod altis in ea regione ripis profluebat: qui ita a tergo amne defensi, et subinde, quum virtute præstarent, incursando in proximos, omnem hostium exercitum straverunt.
11. Xanthippus Lacedæmonius sola loci commutatione, fortunam Punici belli convertit: nam quum a desperantibus jam Carthaginiensibus mercede sollicitatus, animadvertisset, Afros quidem, qui equitatu et elephantis præstabant, colles sectari, a Romanis autem, quorum robur in pedite erat, campestria teneri. Pœnos in plana deduxit: ubi per elephantos dissipatis ordini-
