Pagina:Fasciculus plantarum cryptogamicarum Britanniae.djvu/10

Haec pagina emendata est

Ad LECTOREM.


PROPOSITUM mihi fuit hoc in libello plantas tradere Cryptogamicas Britanniæ, quæ in Floris Hudsoni, Curtisi, et Lightfootii locum nondum obtinuerunt, preter unam alteramve speciem, in quarum denominationem errores irrepsisse certiorem me fecerunt horti sicci Linnæanus et Dillenianus, quos inspicere concesserunt eorum possessores. Icones adjeci, ubi figuræ non suppeterent in libris, quos in ditissima bibliotheca Banksiana evolvere licuit; vel ubi figuræ antea datæ ad specimina minus perfecta adornatæ essent.

Plures ad manus sunt plantæ Cryptogamicæ, quas examini rite subjiciendi otium non fuit, ideoque alii occasioni relinquendæ, cum hujus fasciculi editionem non differendam suaserint amici, qui plantas ab ipsis inventas benevole communicarunt, quorumque ulteriorem benevolentiam maxime expeto.