Haec pagina emendata et bis lecta est
208 ADOLESCENTIS ET SCORTI.
mox a coena petere lectum, iubetur exspectare, donec ceteri quoque eant cubitum.
- gu. Videor mihi videre civitatem Platonicam.
- be. Tum suus cuique nidus ostenditur, et vere nihil aliud quam cubiculum: tantum enim ibi lecti sunt, et praeterea nihil quo utaris, aut quod fureris.
- gu. Illic mundities est?
- be. Eadem quae in convivio; lintea forte lota ante menses sex.
- gu. Quid interim fit de equis?
- be. Ad eandem disciplinam tractantur, ad quam homines.
- gu. Sed est eadem ubique tractatio?
- be. Alicubi civilior est, alicubi durior quam narravi: verum in genere talis est.
- gu. Quid si ego tibi nunc narrem; quibus modis hospites tractentur in ea parte Italiae quam Longobardiam vocant; rursus in Hispania; deinde in Anglia, et in Walia? Nam Angli partim Gallicos, partim Germanicos mores obtinent, ut ex his duabus gentibus mixti. Walli se praedicant αὐτόχθονας Anglos.
- be. Quaeso te, ut narres. Nam mihi nunquam contigit eas adire.
- gu. In praesentia non est otium. Nam nauta iussit, adessem ad horam tertiam, nisi vellem relinqui, et habet sarcinulam: alias dabitur opportunitas ad satietatem usque garriendi.
ADOLESCENTIS ET SCORTI.
LUCRETIA, SOPHRONIUS.
- lu. Euge mi lepidissime Sophroni, tandem nobis redditus es? Nam mihi videris abfuisse seculum. Prima fronte vix te agnoscebam.
- so. Quam ob rem, mea Lucretia?
- lu. Quia pro imberbi nobis rediisti barbatulus. Quid rei est, meum corculum? Nam videre solito torvior.
- so. Cupio tecum seorsim colloqui familiarius.
- lu. Au, au, non solae sumus, mea mentula?
- so. Secedamus in locum secretiorem.
- lu. Age concedamus in cubiculum interius, si quid libet.
- so.
