Erat Philistæis mos, quùm dies festos agerent, producere Samsonem quasi in pompam publicam, captoque insultare.
Die quâdam quùm publicum convivium celebraretur, Samsonem adduci jubent.
Domus, in quâ omnis populus et principes Philistæorum epulabantur, subnixa erat duabus columnis miræ magnitudinis.
Adductus Samson inter columnas statuitur.
Tùm ille occasione ūtens, columnas concussit, et turba omnis obruta est ruinâ domûs, simulque Samson ipse cum hostibus non inultus occubuit.
Quùm Heli esset summus sacerdos, nātus est Samuel; hunc adduxit māter ad sacerdotem, et obtulit Domino, ut ei in sacrificiis faciendis ministrāret.
Puer crescebat egregiâ præditus indole, eratque Deo et hominibus carus: cui mâter sua certis temporibus afferebat parvam tunicam, quam ipsa confecerat.
Hēli verò habebat filios perditis moribus, adeò ut populum à colendo Deo abducerent; nec satis graviter eos unquam reprehendit.
Quamobrem Deus erat et liberis et patri irātus
