Delētus est universus exercitus Pharaonis in mediis fluctibus; nec unus quidem nuncius tantæ cladis superfuit.
Sic Deus liberavit Hebræos ab injusta servitute Ægyptiorum.
Hebræi, trajecto mari rubro, diù peragrārunt vastam solitudinem.
Deerat panis at Deus ipse eos aluit; è cælo per annos quadraginta cecidit cibus, quem appellavērunt manna.
Inerat huic cibo gustus similæ cum melle mixtæ.
Interdùm etiam defuit aqua: at, jubente Deo, Moses percutiēbat rupem virga, et continuò erumpebant fontes aquae dulcis.
Quinquagesimo die, postquàm Hebræi egresEi sunt ex Ægypto, pervenerunt ad montem Sinæ.
Ibi deus dedit eis legem cum apparātu terrifico.
Cœpērunt exaudiri tonitrua, micāre fulgura, nubes densa operiebat montem, et clangor buccinæ vehementiùs perstrepēbat.
Stābat populus præ metu trepidus ad radices montis fumantis.
