erat quintuplò major quàm cæterōrum. Peracto convivio, Josephus dat negotium dispensatori, ut saccos eorum impleat frumento, pecuniam simul repōnat, et insuper scyphum suum argenteum in sacco Benjamini recondat.
Ille fecit diligenter quod jussus fuerat.
Fratres Josephi sėse in viam dederant, necdum procul ab urbe aberant.
Tunc Josephus vocavit dispensatorem domūs suæ, eique dixit: Persequere viros, et quùm eos assecutus fueris, illis dicito: Quare injuriam pro beneficio rependistis?
Subripuistis scyphum argenteum, quo dominus meus utitur: improbè fecistis.
Dispensator mandāta Josephi perfecit: ad eos confestim advolāvit; furtum exprobavit, rei indignitātem exposuit.
Fratres Josephi responderunt dispensatōri: Istud sceleris longè à nobis alienum est; nos, ut tutè scis, retulimus bona fide pecuniam repertam in saccis; tantùm abest ut furati simus scyphum domini tui; apud quem furtum deprehensum fuerit, is marte mulctetur.
