Pagina:Codex Amiatinus novum testamentum latine (1854).djvu/270

216

LIBER ACTUUM APOSTOLORUM

---

XVIII.

¹Post haec egressus ab Athenis venit Corintum, ²et inveniens quendam Iudaeum nomine Aquilam, Ponticum genere, qui nuper venerat ab Italia, et Priscillam uxorem eius, eo quod praecepisset Claudius discedere omnes Iudaeos a Roma, accessit ad eos, ³et quia eiusdem erat artis, manebat apud eos et operabatur: ⁴erat autem scenae factoriae artis. ⁵Cum venissent autem a Macedonia Silas et Timotheus, instabat verbo Paulus, testificans Iudaeis esse Christum Iesum. ⁶Contradicentibus autem eis et blasphemantibus excutiens vestimenta dixit ad eos Sanguis vester super caput vestrum: mundus ego ex hoc ad gentes vadam. ⁷Et migrans inde intravit in domum cuiusdam Titi nomine Iusti, colentis deum, cuius domus erat coniuncta synagogae. ⁸Crispus autem archisynagogus credidit domino cum omni domo sua, et multi Corinthiorum audientes credebant et baptizabantur. ⁹Dixit autem dominus nocte per visionem Paulo Noli timere, sed loquere et ne taceas: ¹⁰propter quod ego sum tecum, et nemo adponetur tibi ut noceat te, quoniam populus est mihi multus in hac civitate. ¹¹Sedit autem annum et sex menses docens in eis verbum dei. ¹²Gallione autem proconsule Achaei insurrexerunt uno animo Iudaei in Paulum et adduxerunt eum ad tribunal, ¹³dicentes quia contra legem hic persuadet hominibus colere deum. ¹⁴Incipiente autem Paulo aperire os dixit Gallio ad Iudaeos Si quidem esset iniquum aliquid aut facinus pessimum, o viri Iudaei, recte vos sustinerem; ¹⁵si vero quaestiones sunt de verbo et nominibus et legis vestrae, vos ipsi videritis: iudex ego horum nolo esse. ¹⁶Et eminavit eos a tribunali. ¹⁷Adprehendentes autem omnes Sostenen principem synagogae percutiebant eum ante tribunal, et nihil eorum Gallioni curae erat. ¹⁸Paulus vero cum adhuc sustinuisset dies multos, fratribus vale faciens navigavit Syriam, et cum eo Priscilla et Aquila, qui sibi totonderunt in Cencris caput: habebant enim votum: ¹⁹devenitque Efesum, et illos ibi reliquit; ipse vero ingressus synagogam disputavit cum Iudaeis. ²⁰Rogantibus autem eis ut ampliori tempore maneret, non consensit, ²¹sed vale faciens et dicens Iterum revertar ad vos deo volente, profectus est ab Efeso, ²²et descendens Caesaream ascendit et salutavit ecclesiam, et descendit Anthiociam, ²³et facto ibi aliquanto tempore profectus est, perambulans ex ordine Galaticam regionem et Frygiam, confirmans omnes discipulos. ²⁴Iudaeus autem quidam Apollo nomine, Alexandrinus natione, vir eloquens, devenit Efesum, potens in scripturis. ²⁵Hic erat edoctus viam domini, et fervens spiritu loquebatur et docebat

XVIII, 1 — 25.