Pagina:Codex Amiatinus novum testamentum latine (1854).djvu/244

190

LIBER ACTUUM APOSTOLORUM

---

percipite verba mea. ¹⁵Non enim sicut vos aestimatis hi ebrii sunt, cum sit hora diei tertia, ¹⁶sed hoc est quod dictum est per prophetam Iohel ¹⁷Et erit in novissimis diebus, dicit dominus, effundam de spiritu meo super omnem carnem, et prophetabunt filii vestri et filiae vestrae, et iuvenes vestri visiones videbunt, et seniores vestri somnia somniabunt: ¹⁸et quidem super servos meos et super ancellas meas in diebus illis effundam de spiritu meo, et prophetabunt. ¹⁹Et dabo prodigia in caelo sursum et signa in terra deorsum, sanguinem et ignem et vaporem fumi. ²⁰Sol convertetur in tenebras et luna in sanguinem ante quam veniat dies domini magnus et manifestus. ²¹Et erit, omnis quicumque invocaverit nomen domini salvus erit. ²²Viri Israhelitae, audite verba haec. Iesum Nazarenum, virum adprobatum a deo in vobis virtutibus et prodigiis et signis, quae fecit per illum deus in medio vestri, sicut vos scitis, ²³hunc definito consilio praescientia dei traditum per manus iniquorum adfigentes interemistis: ²⁴quem deus suscitavit solutis doloribus inferni, iuxta quod inpossibile erat teneri illum ab eo. ²⁵David enim dicit in eum Providebam dominum coram me semper, quoniam a dextris est mihi, ne commovear: ²⁶propter hoc delectatum est cor meum et exultavit lingua mea, insuper et caro mea requiescit in spe, ²⁷quoniam non derelinques animam meam in inferno, nec dabis sanctum tuum videre corruptionem. ²⁸Notas mihi fecisti vias vitae, replebis me iucunditate cum facie tua. ²⁹Viri fratres, liceat audenter dicere ad vos de patriarcha David, quoniam et defunctus est et sepultus est, et sepulchrum eius est apud nos usque in hodiernum diem. ³⁰Propheta igitur cum esset et sciret quia iureiurando iurasset illi deus de fructu ventris eius sedere super sedem eius, ³¹providens locutus est de resurrectione Christi, quia neque derelictus est in inferno neque caro eius vidit corruptionem. ³²Hunc Iesum resuscitavit deus, cuius omnes nos testes sumus. ³³Dextera igitur dei exaltatus et promissione spiritus sancti accepta a patre effudit hunc quem vos videtis et auditis. ³⁴Non enim David ascendit in caelos: dicit autem ipse Dicit dominus domino meo Sede a dextris meis ³⁵donec ponam inimicos tuos scabillum pedum tuorum. ³⁶Certissime ergo sciat omnis domus Israhel quia et dominum eum et Christum deus fecit, hunc Iesum quem vos crucifixistis ³⁷His autem auditis conpuncti sunt corde et dixerunt ad Petrum et ad reliquos apostolos Quid faciemus, viri fratres? ³⁸Petrus vero ad illos Paenitentiam, inquit, agite, et baptizetur unusquisque vestrum in nomine domini Iesu Christi in remissionem peccatorum vestrorum, et accipietis donum sancti spiritus: ³⁹vobis enim est repromissio et filiis

II, 15 — 39.