Migne Patrologia Latina Tomus 4
CypAnt.OrSuDiS 4 Cyprianus Antiochenus Parisiis J. P. Migne 1844 early modern edition, no apparatus this file was encoded in TEI xml for the University of Zurich's Corpus Corporum project (www.mlat.uzh.ch) by Ph. Roelli in 2013 Classical Latin orthography latin
Oratio sub die suae passionis
DOMINE sancte, Pater hagios, Deus hagie, et hagie Deus meus, quis enim major te? tibi gratias et laudem refero, Deus Abrahae et Deus Isaac et Deus Jacob, Deus patrum nostrorum, Deus Apostolorum, et Deus Prophetarum, et Deus Martyrum, qui fuisti ante mundi dispositionem, Deus vivorum, venturus judicare vivos et mortuos: qui es Deus verax, qui sedes super Cherubim et Seraphim sedem honoris tui, et prospicis abyssos: qui vides cuncta priusquam nascantur; qui habes potestatem occidere et rursus restituere; qui habes potestatem de arido viride facere. Tu omnium Dominus dominator, libera me ab hoc saeculo, et exaudi me orantem, sicut exaudisti filios Israel de terra Aegypti, et non tibi crediderunt, nec famulo tuo Moysi.
Vae peccatis meis! Cum elevaveris confringere terram, sub qua fissura petrarum me absconsurus sum ab ante virtutem tuam? Cui monti dicturus sum: Cade super me; et cui colli: Tege me ab ante metum Domini, cum te levaveris confringere terram? Rogo, Domine, subveni mihi: noli secundum actum meum me judicare, nihil enim in praeceptis tuis parui. Exaudi me orantem, sicut exaudisti Jonam de ventre ceti, sic exaudias me, et ejicias me de morte ad vitam. Sicut Ninivitae induerunt cinerem et cilicium, et poenitentiam egerunt ante Dominum. Exomologesin facienti ante conspectum tuum pro universis peccatis meis, qui es amator poenitentiae, miserere mei. Sed et David dicit: Domine, propter nomen tuum dele peccatum meum. Et ego deprecans majestatem tuam; Dele universa peccata mea, et exaudi me orantem, sicut audisti tres pueros de camino ignis, Ananiam, Azariam, Mizaelem: et misisti angelum tuum cum nimbo roris, et confusus est Nabuchodonosor praepositus regni: quoniam tu es Rex regnantium et Dominus dominantium, qui solus habes immortalitatem, et lucem habitas inaccessibilem, quam nemo hominum videt, nec videre potest. Exaudi me orantem, sicut exaudisti Danielem de lacu leonum, et misisti Abacuc prophetam, et attulit ei prandium, et dixit: Prande prandium quod tibi misit Deus. Et dixit Daniel: Non relinquet Dominus quaerentes se. Exaudi me orantem, sicut exaudisti Tobiam et Sarram dum orarent in atrio domus suae: tunc obtulit pro eis Raphael angelus orationes eorum: sic et tu exaudias preces meas, et admittas ad aulam sanctam tuam orationes meas, et continenter mittas Angelum tuum, qui deleat universa delicta mea, sicut delesti spiritum immundum a Sara filia Raguel: et illumines cor meum, sicut illuminasti oculos Tobiae. Exaudi me orantem, sicut exaudisti Susannam inter manus seniorum, sic me liberes ab hoc saeculo, quia tu es amator purae conscientiae. Exaudi me orantem, sicut exaudisti Ezechiam regem Judae et delesti ab eo infirmitatem: sic et a me auferas infirmitatem carnis, et augeas mihi ad fidem, sicut illi auxisti annos quindecim advitam. Libera me de medio saeculi hujus sicut liberasti Theclam de medio amphitheatro, libera me ab omni infirmitate carnis meae.
Te deprecor, Pater majestatis, qui in fine temporum misertus es nostri, mittens nobis Jesum Christum filium tuum Dominum Deum Salvatorem nostrum, natum ex Maria virgine de Spiritu sancto, annuntiante Gabriele angelo, per quem nos liberasti de periculo mortis imminentis.
Et te deprecor, Filium Dei vivi, qui fecisti tanta mirabilia, qui in Cana Galilaeae de aqua vinum fecisti, propter Israel: qui caecis oculos aperuisti; qui surdos audire fecisti, qui paralyticos ad sua membra revocasti; qui solvisti linguas blaesorum; daemonio vexatos sanasti; claudos, currentes fecisti velut cervos; mulierem de profluvio sanguinis liberasti; mortuos suscitasti; super aquam pedibus ambulasti; qui Petro labenti manum tradidisti; qui mare fundasti, et terminum ei posuisti, et dixisti: Huc usque venies, et hic te confringes in virtute tua. Te deprecor Filium Dei vivi, propter universa commissa mea, qui es in coelis Filius in Patre et Pater in te in sempiternum, qui sedes super Cherubim et Seraphim, sedem honoris tui.
Tibi assistunt Angeli, Archangeli, numerus innumerabilis, timentes et paventes honorem et virtutem tuam, clamantes voce magna et dicentes: Sanctus, Sanctus, Sanctus, Dominus Deus sabaoth. Tu ipse nobis testamentum fecisti: Petite, et accipietis; pulsate, et aperietur vobis. Quodcumque a Patre meo petieritis in nomine meo, ego a Patre peto ut accipiatis. Ego peto, ut accipiam; quaero, ut inveniam; ego pulso, ut aperiatur mihi; ego in tuo nomine peto, ut tu a Patre petas, et detur mihi. Paratus sum propter nomen tuum victimam sanguinis fundere, et quodcumque tormentum sustinere. Tu es, Domine, auditor meus et defensor: defende me ab adversario meo. Angelus tuus lucis protegat me, quoniam tu dixisti: Quod credentes petieritis per orationem, dabitur vobis.
Omnis homo mendax, tu es verax. Sicut tu repromisisti, potestatem habes, Domine, dare mihi omne sacramentum tuum coeleste, ut dignus sim faciem sanctorum tuorum videre. Spiritus in me operetur, voluntas tua in me fiat: quoniam tibi spopondi omnibus diebus vitae meae, qui passus es sub Pontio Pilato bonam confessionem, qui crucifixus descendisti, et conculcasti aculeum mortis. Devicta est mors, devictus est inimicus diabolus. Tu resurrexisti a mortuis, et apparuisti Apostolis tuis: sedes ad dexteram Patris, qui venturus es judicare vivos et mortuos. Tu dominaberis, libera me de manu quaerentis animam meam. Per nomen tuum libera me ab adversaria potestate, ut opem des vincendi inimicum meum: quoniam tu es potens assertor et advocatus precum et petitionum nostrarum animarum. Die ac nocte interpelles pro peccatis meis, orationem meam perferas ad Patrem tuum. Et tu, Domine sancte pater, digneris respicere super preces meas, sicut respexisti super munera Abel. Digneris me liberare ab igne et poena perenni, et ab omni tormento quod parasti iniquis: per bonum et benedictum Jesum Christum Salvatorem nostrum, per quem tibi laus, honor, virtus, gloria, in saecula saeculorum, Amen.