Migne Patrologia Latina Tomus 135
Officium S. Udalrici
Officium S. Udalrici (Auctor incertus), J. P. Migne 135.1079A
Officium S. Udalrici
135.1075D| ( Ant. ad Magnif. ) Venerandi patris Wodalrici solemnia magnae jucunditatis repraesentant gaudia; quae merito cleri ac populi suscipiuntur voto, celebrantur tripudio. Laetetur tellus tali compta praesule. Exsultet polus tanto ditatus compare. Solus daemon ingemat, qui ad ejus sepulcrum suum assidue perdit dominium. Ave, nunc corona martyrum. Salve, gloria confessorum. Simulque sanctorum decus omnium, nos Christo commenda in perpetuum.
135.1076D| ( Invitatorium. ) Adoremus regem Christum Dominum, qui hodie sanctum Wodalricum perduxit ad regna coelorum.
( Antiphonae nocturnorum. ) 1. Beatus Wodalricus ex nobilibus et religiosis parentibus Deo praedestinante in salutem plurimorum extitit ortus. Beatus vir.
2.
Hunc religiosi parentes commendaverunt in 135.1077A| sancti Galli coenobium, sacris litterarum studiis imbuendum.
Quare fremuerunt.
3.
Qui inter egregios regularis disciplinae magistros dulcissimos theoriae carpebat quotidie fructus.
Domine quid multiplicati.
4.
Igitur sacrae institutionis norma sanctus adolescens perductus, in cathedram pontificalem est sublimatus.
Cum invocarem.
5.
Vox beato sic ait in visu: Wodalrice episcope scias te hodie hospites suscepturum esse.
Verba mea.
6.
Inter caetera miraculorum insignia vir Dei persaepe coelesti meruit perfrui visione.
135.1077B| Domine Dominus noster.
( Responsoria I nocturni tria. ) (R\ 1.) Beatissimi pontificis Wodalrici diem natalitium recolentes, qui hunc tantis coruscare fecit virtutibus * Christum condignis veneremur laudibus. (V\.) Qui inter caetera dignationis suae beneficia hujus Sancti nobis donavit patrocinia. Christum.
(R\ 2.) Puer Dei inclitus Wodalricus infra duodecim aetatulae suae hebdomadarum curricula * ex divina admonitione a materno suspendi jussus est lacte. (V\.) Ut solido cibo confortatus coelestis verbi dispensator praefiguraretur egregius. Ex divina.
(R\ 3.) Cum transacto infantiae termino jam bonae indolis puer existeret, in sancti Galli coenobium est commendatus * sacris litterarum studiis imbuendus. 135.1077C| (V\.) Ubi multorum futurus magister Deo favente sategit prudenter. Sacris.
7.
( Antiphonae II nocturni. ) Sanctus sacerdos dum divina quondam celebraret mysteria, dextera Dei superna visibiliter apparuit supra sacrosancta.
Domine quis habitabit.
8.
Quadam nocte, in visu ei sancta Afra apparuit, et locum collocationis proprii sui corporis in ecclesia demonstravit.
Domine in virtute tua.
9.
Sanctum Agaunensium locum, orandi gratia, adivit, ubi Thebaeorum martyrum reliquias Deo donante acquisivit.
Domini est terra.
10.
Quas cum summo honore Augustam attulit, 135.1077D| ac in oratorio Dei Genitricis cum hymnis et psalmodiis religiose collocavit.
Benedicam.
11.
Per oleum, quod sanctus Pontifex in Coena Domini consecravit, plurima curationum beneficia aegrotis Christi gratia condonavit.
Te decet.
12.
Celebratis missarum solemniis, quemdam fluvium periculosa aquarum inundatione refusum transvadavit cum incolumitate suorum.
Bonum est.
( Responsoria II nocturni tria. ) (R\ 4.) Deo dilectus veluti per divinum oraculum fuerat edoctus in pueritia, * in civitate Augusta sacerdotali decoratus 135.1078A| est infula. (V\.) Hic Dei gratia se praeveniente, ac totius plebis voto in unum concurrente. In civitate.
(R\ 5.) Orationes tuae et eleemosynae. Wodalrice, Deo sunt acceptae, qui binis antecessoribus tuis te commendavit, * ut tibi sacra mysteria celebranti assistant, et ea tecum benedicant. (V\.) Wodalrice episcope, scias te hodie hospites suscepturum esse. Ut tibi.
(R\ 6.) Vir Deo plenus dum hostiam salutarem immolaret, ipso ex more signum crucis agente, dextera Dei sancta visibiliter apparuit, * quae sacrosancta Dominici sacramenti mysteria coelitus consecravit. (V\.) Vere felix et sanctus, cui, hora 135.1078B| sancti sacrificii, dextera Dei apparuit ministranti. Quae sacrosancta.
( Ant. ad Cantica. ) Surge, Wodalrice, et secundum meum sermonem in ecclesia hodie divinum ministerium festina implere.
( Responsoria tria III nocturni. ) (R\ 7.) Quidam verbis viri Dei non obaudiens sensum cum visu et auditu perdidit, sed mox ad ipsum perductus, * pristinae sanitati est restitutus. (V\.) Cujus tribulationibus cum mitissimus condolens indulgentiam et benedictionem donaret. Pristinae.
(R\ 8.) Sanctimonialis femina, ut per sancti pontificis orationem est sanata, mox currendo praecessit eum * laudans et benedicens Dominum. (V\.) Pedibus ejus provoluta gratiarum actiones 135.1078C| egit devota. Laudans.
(R\. 9.) Sancte Dei Woldarice, virtutum gratia plene, spes miserorum, decus ecclesiarum, * intende preces populi supplicantis, ut impetres veniam pro delictis. (V\.) Ecce quia super pauca fidelis exstitisti, super multa constitutus in gaudium Dei tui introisti. Intende.
1.
( Antiphonae ad Laudes et horas. ) Dominus Jesus Christus de coelo misericorditer in terram prospexit, quando sanctum Vuodalricum catholicae ecclesiae pontificem fieri destinavit.
2.
Cultor Dei egregius ad culmen pontificatus divina electione promotus, coelestis verbi semina ubique spargebat per fidelium corda.
3.
Hujus sanctissimi viri salutaria dogmata divinorum 135.1078D| signorum semper coelitus comitabatur efficacia.
4.
Sancta Afra martyre viro Dei quondam visione ducatum praebente, supernorum civium coetui feliciter meruit associari.
5.
In hujus sacri conventus medio apostolorum principem vidit cum aliis quos vel olim in carne vel tunc primum in spiritu cognovit.
( Ad Bened. ) O beatum virum, coelesti visione dignum, qui etiam inter caetera divinae revelationis arcana superventurum Pannonicae gentis didicit bellum, et triumphum Christianae parti coelitus concessum.
( Ad Magnif. in II Vesp ). Sacerdos Dei Wodalricus 135.1079A| cum ex ergastulo carnis ad aethera esset sublevatus, tanta de exanimi ejus corpore suavissimi odoris manavit fragrantia, ut cunctorum ibi assistentium perfunderet nares et pectora. In cujus veneratione dicamus: Gloria tibi Domine.
( Collecta ad Missam. ) Deus qui hodiernae festivitatis diem beati Wodalrici confessoris tui atque pontificis transitu gloriosum fecisti: concede propitius sic tanti patroni atque doctoris merita venerari in terris, ut ipsius apud te patrocinia sentiamus in coelis. Per.
( Secreta. ) Munus, Domine, nostrae devotionis sacro altari superpositum, pia beati Wodalrici supplicatio tibi Domino Deo nostro reddat acceptum, et ad hoc percipiendum purificet corda omnium nostrum. Per.
135.1079B| ( Praefatio. ) Aequum et salutare. Te quidem in 135.1080A| sanctis tuis mirabilem praedicare, cujus gratuiti semper est muneris, quidquid in eorum vel verbis sonat mirabile, vel virtutibus coruscat insigne. Unde ex eorum collegio beati Woldarici confessoris tui atque pontificis solemnia celebrantes, eadem sacrosancta Filii tui Domini nostri Jesu Christi dextera petimus in aeternum consignari, quae singularem redemptionis nostrae hostiam, ipso sacerdote sacro altari assistente, visibiliter voluisti benedici. Per eumdem Christum Dominum nostrum: per quem majestatem tuam laudant.
( Postcommunio. ) Coelestium sacramentorum participes effecti, quaesumus, Domine Deus noster: ut, interveniente beato Wodalrico confessore tuo atque pontifice, et peccatorum nostrorum indulgentiam, 135.1080B| et vitam consequi mereamur aeternam. Per.