Migne Patrologia Latina Tomus 11
AucInc.MiSZe 11 Auctor incertus Parisiis J. P. Migne 1845 early modern edition, no apparatus this file was encoded in TEI xml for the University of Zurich's Corpus Corporum project (www.mlat.uzh.ch) by Ph. Roelli in 2013 Classical Latin orthography latin
MISSA I.
Oratio -- Sancti Zenonis Sacerdotis et confessoris tui, Domine, veneranda hodiernae festivitatis illuminati congratulantes laetamur; concede propitius dignis ejus precibus exoratus, ut spiritalis alimoniae jocunditate refecti, salutis, quam docuit, imitando viam sectemur. Per Dominum.
Alia oratio.--Deus qui nos Sancti Zenonis Sacerdotis et Confessoris tui annua beatae confessionis solemnitate laetificas, praesta quaesumus, ut callida hostis incursione, tua freti virtute, devicta, pervenire ad gaudia ipso intercedente mereamur aeterna. Per.
Secreta. --Oblatis tibi muneribus, quaesumus, Deus pater omnipotens, propitiatus intende, et intercedente B. Zenone Sacerdote atque Confessore tuo et ab occulta insidiatoris impulsione fragilitatem nostram tueantur illaesam, et Angelicis devote manibus suscepta sacratis ante conspectum gloriosae et tremendae majestatis tuae in odorem suavitatis alacriter deferantur. Per.
Praefatio. --Vere dignum. Qui B. Zenonem tui sancti nominis copiosa amoris dulcedine uberius satiatum, ad contemplandam Deitatis tuae desideratam perducere dignatus es claritatem: quem ita miserationis tuae invicta pietatis clementia inter mundanas validius reddidit pompas illaesum, ut nec blanda prosperitatis magnitudine tumeret, nec adversitatum undosa procellosae falsitatis [CLXXX] incursione flecteretur: in fide enim stabilis, in charitate longanimis, in castimoniae puritatis vivacitate decorus, et in virtutum miraculis exstitit famosissimus operator salutis, nec non etiam in commissa sibi dominicae dignitatis exsequenda doctrina, cotidiana populos erudiendo reficiebat divini sermonis alimonia vitae, et quod fideliter coelestis praedicabat miles sequendum decorus, hoc opere adimplere indesinenter mirabilis dispensator curabat devotus. Ideoque te, Domine omnipotens, rerum omnium auctor, bonorum supplices exoramus, ut cujus pretiosae mortis celeberrimum hodiernae festivitatis recolimus diem, sacratissimis ejus precibus nobis exoratus concedas, ut et a peccatorum nostrorum nexibus absoluti, et ab hostium callida impugnationis ferocitate defensi, coelorum mereamur, te ducente, pervenire ad regna. Per Christum.
Ad communionem. --Sumptis, Domine, sacrosanctae redemptionis mysteriis deprecamur, ut et salutaris hujus remedii plenitudine roborati, et S. Sacerdotis et confessoris tui Zenonis saluberrimis beataé intercessionis praesidiis suffulti, ad plenae festivitatis gaudia pervenire mereamur aeterna. Per.
Alia. --Custodi nos quaesumus, Domine, Sanctorum tuorum natalitia frequentantes, et ad salutifera mandatorum tuorum exsequenda praecepta nostras semper excita voluntates. Per.
MISSA II. Oratio.--Deus, qui es tuorum Antistitum potentissimus illustrator, tribue, quaesumus, ut beatissimi Sacerdotis et Confessoris tui Zenonis magnificis exemplis informati, saeculi istius caliginem sine periculo transeamus. Per.
Secreta. --Oremus omnipotens Deus: culparum nostrarum apud te veniam beati Zenonis impetret grata precatio. Per.
[CLXXXI] Postcom. --Concede, quaesumus, omnipotens Deus, ut qui venerendam gloriosi Confessoris tui Zenonis translationem annuis frequentamus excubiis, digne ipsius conversationem sectando, gaudiorum ejus mereamur esse participes. Per.
MISSA III.
Oratio. --Venerabilem diem B. Confessoris tui Zenonis devotione sancta hodie celebrantes, te, Domine, conservatorem omnium fideliter deprecemur, ut pius nostris precibus clemens ac propitius aspiras, sicut et illi misericordiam largiaris. Per.
Secreta. --Deus qui fulgentibus margaritis clarum lumen inferis mundo, qui beato Pontificato Zenonis aeternam in coelis coronam praeparasti, et nobis quoque famulis tuis adstantibus ante conspectum majestatis tuae adesse digneris. Per.
[CLXXXII] Ad Complendum --Deus, qui tali Ecclesiae fecisti Pontificem, ut talem nostris temporibus constituisti Sacerdotem, qui purissimam et immaculatam hostiam possit offerre. Per.
MISSA IV.
Oratio. --Omnipotens sempiterne Deus, qui es Sanctorum tuorum splendor mirabilis, quique hodierna die beatum Confessorem tuum Zenonem beatitudinis aeternae gloria sublimasti, concede propitius, ut cujus festa veneramur in terris, intercessionis auxilio apud tuam misericordiam muniamur in coelis, Per.
Secreta. --Oblatis tibi, etc., ut in Secreta primae Missae.
Ad Communionem. --Sancti Zenonis Sacerdotis tui, etc., ut in prima oratione primae Missae; hoc solo discrimine in postremis verbis: salutis viam quam docuit, imitando, veniam consequamur. Per.
MISSA V.
Oratio. -- Propitiare quaesumus, Deus, famulis tuis per Sancti Zenonis Confessoris tui atque Pontificis, qui in praesenti requiescit ecclesia, merita gloriosa, et ejus pia intercessione ab omnibus protegamur adversis. Per.
[CLXXXIII] Secreta. --Suscipiat clementia tua, omnipotens Deus, de manibus nostris munus oblatum, et per hujus Sancti Zenonis Confessoris tui atque Pontificis orationes ab omnibus nos absolve peccatis.
Postcommunio. --Divina libantes mysteria, Domine, quae pro hujus sancti Zenonis Confessoris tui atque Pontificis venerandae tuae obtulimus majestati; praesta, quaesumus, ut per ea veniam mereamur peccatorum, et coelestis gratiae donis reficiamur.
ALIA COMMUNIA AD MISSAS S. ZENONIS PERTINENTIA EX MS. VERONENSI MONASTERII S. ZENONIS.
Introitus. --Satuit ei Dominus testamentum pacis, et principem fecit eum, ut sit illi sacerdotii dignitas in aeternum. Psalmus. Misericordias Domini in aeternum cantabo. V\. Gloria.
Lectio libri Sapientiae. --Ecce sacerdos magnus usque ad illa verba in odorem suavitatis, quae brevitati consulentes duximus praetermittenda. R\. Ecce sacerdos magnus, qui in diebus suis placuit Deo. V\. Non est inventus similis illi, qui conservarit legem Excelsi. Alleluia. V\ Ecce, confessor Zeno pastor Domini, intercede pro devoto populo Dei.
Secundum Lucam. --In illo tempore dixit Jesus discipulis suis. Nemo lucernam accendit, etc., usque ad ea verba et sicut lucerna fulgoris illuminabit te.
[LXXXIV] Tempore Paschali Domini. Secundum Joannem. --In illo tempore dixit Jesus discipulis suis, Ego sum vitis vera, etc. usque ad verba et gaudium vestrum impleatur.
Offertorium. --Veritas mea et misericordia mea cum ipso et in nomine meo exaltabitur cornu ejus.
Communio. --Domine, quinque talenta tradidisti mihi: ecce alia quinque superlucratus sum. Euge, serve bone et fidelis, quia in pauca fuisti fidelis, supra multa te constituam, intra in gaudium Domini tui.
MISSA VI.( Ex Missalibus Ambrosianis mss, et editis. ) In Festo S. Zenonis episcopi VII Decembris. Super populum. --Omnipotens sempiterne Deus, qui beatum Zenonem Confessorem tuum pontificalibus infulis decorasti, fac nos, quaesumus, ejus exemplo et magnifico interventu, mundi gloriam mente despicere, et coelum semper ambire. Per Dominum.
Super Sindonem. --Deus, qui praesentem diem beati Zenonis Pontificis tui gloriosa exitu fecisti solemnem, praesta ipsius nos apud te continuis adjuvari suffragiis, et magnificis intercessionibus confoveri. Per Dominum.
[CLXXXV] Super oblata. --Adsit Ecclesiae tuae, Deus, praeclara B. Zenonis intercessio, quae et munera nostra oculis tuae majestatis acceptabilia faciat, et te nobis placabilem reddat. Per Dominum.
Praefatio. --Aeterne Deus, Beati Pontificis et Confessoris tui Zenonis merita recolentes, quem tua gratuita benignitate in pontificatus officio et fidei munere sublimare dignatus es, ut et immensis virtutibus coruscaret, et sanctae humilitatis propositum non desereret. Nam et Gallieni Principis filiam a potestate daemonis eripuit, et multorum languores potenti virtute curavit. Praesentit etiam Athesis fluvius, quod tanti valeat Praesulis virtus, dum suum ultra morem excedens littus, templi sacrati non ausus est ingredi aditus. Digne igitur in tuo nomine ipsius praeconia non tacemus; digne ipsius miracula festivis laudibus conclamamus: digne cum ipso tibi, Domine, bonorum omnium largitori gratiarum vota persolvimus. Per Christum Dominum.
Postcommunio. --Beati Pontificis et Confessoris tui Zenonis, quaesumus, Domine, a malis omnibus gloriosa nos semper merita tueantur, in cujus solemnitate percipimus tua Sancta laetantes. Per Dominum.
ORATIONES TRES( Ex monumentis monasterii S. Zenonis Hallensis in dioecesi Salisburgensi. ) DIE XII APRILIS. In Festo S. Zenonis Episcopi et Martyris. Oratio. --Omnipotens sempiterne Deus, qui Beatum Zenonem Veronensis Ecclesiae praesulem ab utero sanctificasti; eique contra humani generis hostem [CLXXXVI] ubique victoriam contulisti; concede propitius, ut nos peccatores ejus meritis et precibus ad te convertamur, et latentem contra inimicum semper victoria potiri mereamur. Per Dominum.
DIE XXI MAII. In Festo Translationis S. Zenonis Episcopi et Martyris. Oratio. --Venerabilem diem Translationis B. Zenonis Martyris tui atque Pontificis devotione sancta celebrantes, clementiam tuam humili prece deposcimus, ut sicut illi pro meritis gloriam, ita nobis, illo pro peccatis nostris intercedente, veniam largiri digneris. Per Dominum.
DIE IX DECEMBRIS. In Festo Ordinationis S. Zenonis episcopi.
Oratio. --Deus, qui B. Zenonem Confessorem tuum atque Pontificem, doctorem praecipuum, Catholicae que fidei praedicatorem eligere dignatus és, praesta quaesumus, ut ipso pro nobis interveniente peccatorum nostrorum maculis exuamur, et tibi, Domine, sinceris mentibus placere mereamur. Per Dominum.
[CLXXXVII] SELECTA EX OFFICIO ZENONIS LOCA. I.--ANTIPHONAE ET RESPONSORIA.( Ex duobus mss. Veron. ) In Nat. Sancti Zenonis. Ad Vesperas.
Dum Zeno pontificatus honore valde polleret, meritis non paucis exsistentibus Gallieni Caesaris filiam a ruinosa peste Dei virtute sanavit. Allel.
Confessor Sancte, Sacerdos magne, Beate Zeno, intercede pro nobis.
Super Venite.
Confessorum Regem. Psalmus: Venite.
Antiph. Ab utero matris fuit sanctificatus beatus Zeno, et a cunabulis benedictus. Allel. Psalmus: Beatus vir.
Ant. Probitatis et scientiae, jugibus incrementis ad hoc pertingere meruit, ut per sacerrimam vitam Pastor in populis efficeretur. Psalmus: Quare fremuerunt.
Ant. Continuis jejuniis et orationibus crebris a Domino petebat, ut sibi aditum praedicationis in populos aperiret. Allel.
Psalmus: Domine, quid multiplicasti. Versus: Voce mea.
Resp. Hic est sacer antistes Zeno, quem gemina virtute Dominus sanctitatis et sapientiae decoravit, cujus praeclara fulserunt in mundum miracula, et in coelis adeptus est Angelorum commercia. Allel. V\ Iste est, qui ante Deum magnas virtutes operatus est, et omnis terra doctrina ejus repleta est. Et in coelis.
R\. Ab utero sanctificatus beatus Zeno, et a cunabulis benedictus ad hoc pertingere meruit, ut pastor in populis per sacerrimam vitam efficeretur. Allel., allel.
[CLXXXVIII] V\. In omnem terram sonus exiit conversationis ejus, et sanctitas luculenter emicuit. Per sacerrimam.
R\. In secretiori parte oratorii continuis jejuniis et crebris orationibus a Domino petebat, ut sibi dignaretur aditum praedicationis in populis aperire. All., allel.
V\. Ad convertendas in amore Christi animas hominum die noctuque deditus erat. Ut sibi.
Antiph. Affabilis ita erat in sermonibus, et in habitu mitis, ut Deus in ipso collaudaretur ad omnibus venientibus ad se. Psalmus: Cum invocarem.
Dum exercitio piscationis fungeretur in fluvio, vidit quemdam hominem in plaustro sedentem per praeceps in amne demergi. Allel.
Psalmus: Verba mea.
Vir Dei elevata sursum manu fecit signum crucis dicens: Revertere retro, Satanas, ne perimas hominem, quem Deus creavit. Allel.
Psalmus: Domine, Dominus noster. Versus: Justum deduxit Dominus.
R\. Affabilis ita erat in sermone, et mansuetudine atque habitu mitis, ut Deus in ipso collaudaretur ab omnibus ad se venientibus. Allel., allel. V\. Ita exsistebat alacer, ut mox ad eum properarent, relictis idolis Domino crederent Jesu Christo. Ut Deus in.
R\. Dum in fluvio Athesis piscationis exercitio fungeretur, erectis sursum oculis, vidit quemdam hominem in plaustro sedentem bubus subjunctis in amnem demergi. Allel., allel. V\. Tanta enim velocitate ferebatur, ut cunctis ostenderetur antiqui hostis arte peractum. Vidit.
R\. Elevata sursum manu beatus Zeno fecit sanctae crucis signum, frequenti voce et dixit: Revertere retro, Satanas, ne perimas hominem, quem Deus creavit. Allel. allel. allel.
V\. Quod signum ut vidit daemon, evanuit velut fumus cum clamoribus ac stridore nefando. Revertere.
Ant. Beatus Zeno dixit: Non te permittit Dominus aliquid agere adversus servum suum. Allel.
Psalmus: Domine, quis habitabit.
Miserabilis Pater totaque domus regia moerore affligebatur, eo quod acriter puella suffocaretur. Allel.
Psalmus: Domine, in virtute.
Sacerdos Dei Zeno sedebat super lapidem, et artis Apostolicae documenta sequens piscabatur in flumine. Allel. Psalmus: Domini est terra. V\. Amavit eum Dominus.
R\. Festinans itaque daemon ingressus est palatium Caesaris Gallieni et comprehensam ejus unicam filiam coepit eam crudeliter vexare. Allel. allel.
[CLXXXIX] V\. Miserabilis pater, simulque tota domus ejus cruciatu ac moerore affligebatur. Et comprehensam.
R\. Ingrediente Christi Sacerdote palatium, et facto crucis signo mox coepit daemon clamare dicens: Tu, Zeno, me expellis; et ego propter tuam sanctitatem stare non possum. Allel., allel., allel. V\. Et si hinc abiero, eo Veronam, ibique invenies me. Et ego.
R\. Sancte Zeno confessor Christi, audi rogantes servulos; et impetratam coelitus tu Deus fer indulgentiam. V\. O sancte Zeno, sidus aureum, Domini gratia, servorum gemitus solita suscipe clementia.
In Matut. Laudib.
Ant. Dominus Jesus Christus omnipotens est, oportet enim, ut mirabilia Dei manifestentur. Allel.
Exsurgens beatus Sacerdos fecit orationem, perrexitque ad palatium, ubi affligebatur pro sua filia Rex. Allel.
Ingrediente Christi confessore palatium, facto crucis signo per os puellae daemon clamavit dicens: Tu Zeno, venisti ad expellendum me, et propter tuam sanctitatem stare non possum. Allel.
Tenens beatus Zeno manum puellae dicens: In nomine Domini mei Jesu Christi, praecipio tibi, exi ab ea, daemon. Allel.
Christi namque Sacerdos ab omni daemoniacae incursionis ludificatione sanam restituit filiam Regis. Allel.
V\. Elegit eum.
In Evangel.
Acceptam beatus Zeno coronam a rege distribuit pauperibus dicens: Si Dominus operatur excelsa, ipsi perpetuae laudes referantur et gloria. Allel.
Ant. Sancte confessor Zeno, pastor dominici gregis, te deprecamur intercede pro nobis, ut mereamur tecum esse in coelis. Allel., allel., allel.
[CXC] II.--LECTIONES BREVES ET HYMNI.( Ex variis cod. et breviariis. ) In Sancti Zenonis episcopi ad Vesperas Lect. Statuit Dominus Sancto suo Zenoni testamentum sempiternum, et dedit illi sacerdotium magnum.
R\. Ab utero sanctificatus. V\. In omnem terram.
Hymnus ( Ex ms. capituli Veron. ) Zeno Pontifex inclyte, Christi athleta splendide, Adesto nostris vocibus, Quas pie tibi fundimus. O gloriose Patrone, Nostrae salutis opifex, Ut digne demus cantica, Nostra dirumpe crimina. Adesse tuis famulis Dignare dux amabilis: Sentiant nostra pectora Semperque tua numina. Tu es nostrum refugium, Tu robur potentissimum, Tu salus et protectio Nostraque jubilatio. O Pastor pie et clare Nobis benigne succurre ( Cor. subveni), Nosque supplices respice, Vota servorum suscipe. Deo Patri sit gloria Ejusque soli Filio Cum Spiritu Paraclito Et nunc et in perpetuum. Amen. Ad Noct. Hymnus. Jesu Redemptor omnium, etc. In Laudibus Lectio.
Cognovit Dominus Sanctum suum Zenonem in benedictionibus suis, conservavit illi misericordiam suam, et invenit gratiam coram oculis Domini.
[CXCI] R\. Amavit eum Dominus et ornavit eum.
V\. Stolam gloriam induit eum. Et ornavit.
Gloria Patri, et Filio, et Spiritui sancto.
Alius hymnus, indidem. Deus tuorum militum Corona, spes et praemium, Attende pronis auribus Indignis nostris vocibus. Qui Zenonem episcopum Ab omni purum crimine Eductum carnis cavea Locasti super aethera. Ob ejus alma merita Nostra relaxa crimina Hic libera de noxiis Et in futuris saeculis. Te cuncta laudant pariter, Summe cunctorum arbiter, Est cujus regnum stabile Per aevum sine tempore. Amen. V\ Tu es sacerdos in aeternum.
Hymni tres ( Ex mss. Breviariis Benedictinis monachorum et monialium Veronensium. )
S. Zenonis ad Vesperas, hymnus I. Effulget orbis speculum Zeno praesul mirificus, Cujus festa solemnia Anni nobis fert orbita. Qui Christi fide fervidus Hoc praesens spernens saeculum, Flore virtutum praeditus Coeli possedit praemium. Hic onus carnis bajulans Plura fecit miracula, Ut floret lux clarissima, Caecas fugavit tenebras. [CXCII] Nempe piscans in flumine Vidit plaustro praecipitem Cum bobus suum rusticum Ad amnis ima mergere. Quod hostis hoc nequissimus Patrasset, cernens vir pius, Preces fudit ad Dominum, Ejus poscens auxilium. Subvenit Christi gratia, Quid se credentes munerat, Hunc liberavit hominem, Reddens salutem pristinam. Deo Patri sit gloria, etc. Ad Noctur., Hymnus II. Post haec curavit filiam Imperatoris unicam, Quam fecerat hospitium Daemon sibi tunc pessimus. Athesis amnis alveus Excrescens ultra solitum, Conscendit ad eximium Ecclesiae fastigium. Confestim fulgent merita Viri sancti dignissima, Nam mansit aqua solida, Cum sit natura fluida. Precamur ergo supplices, Zeno praesul sanctissime, Ut coeli nobis Dominum Efficias propitium. Quo post abluta crimina Fruamur ejus gloria, Habituri felicia In aeternum solemnia. Praesta Pater piissime, etc. [CXCIII] Ad Laudes, Hymnus III. Praesulis sancti redeunt colenda Festa Zenonis Dominum sequentis, Qui diem nobis celebrem sacravit Fine beato. Magnus Excelsi fuerat sacerdos, Praedicans, gentes penetrans marinas, Inde Veronam Deus hunc ad urbem Mittere curat. Qua Deo multum populum lucratus, Instruit verbis, solidavit actis: Pro Deo tandem patiendo mortem Vivit in aevum. Nunc in aeternum meritis coruscat Clarus, et mundo manifestus omni: Qui Deo soli studuit placere Corpore vivens. Pastor aeterno radians triumpho, Servulos audi tibi supplicantes, Praemium justis, veniamque posce Crimine lapsis. Quo Dei magna miseratione Ordinem coeli decimum replentes Ipsius vultum videamus omni Tempore saecli. Gloriam Patri resonemus omnes, Et tibi Christo genito superne, Cum quibus Sanctus simul et creator Spiritus exstat. Amen. [CXCIV] Hymnus. ( Ex codice Vatic. num. 1235.) In natale S. Zenonis. Sancti Zenonis Praesulis Hymnum Christo deferimus, Qui contempsit saeculum, Mercavit Christi praemium. Qui in adolescentia Dei praecepta tenuit, Stipem larga jugiter Erogavit pauperibus. Piscandi arte usus est, Dogma sequens orthodoxum, Mersit manum in gurgite, Piscavit Dei gratia. Instar Petri Apostoli Digna sortitus merita, Pastorque Veronensium Summus Sacerdos rutilans. Crebris quoque jejuniis Carnis repulit vitia, Saepe docendo populum Destruxit Mundi idola. Magnus exsistens medicus, Infirma sanans corpora, Saepe liberans animas Obsessas a diabolo. Tanta repletus gratia Obiit in Christi requiem, Et nobis semper maxima Ostendit mirabilia. Rogemus ergo populi Confessorem Altissimi, Ut ipse nobis impetret Pacem et indulgentiam. [CXCV] III.--COMMEMORATIO S. ZENONIS AD PRECES SEU SUFFRAGIA IN VESPERIS ET LAUDIBUS.( Ex ms. Capituli Veronensis saeculi XIII.) De Sancto Zenone ad Vesperas Ant.
Ab utero matris fuit sanctificatus beatus Zeno, et a cunabulis benedictus.
V\. Amavit eum Dominus.
Ad Matutinum seu ad Matutinas Laudes antiphona.
Acceptam beatus Zeno coronam a Rege pauperibus distribuit dicens: Si Dominus operatur excelsa, ipsi perpetuae laudes referantur et gloria. V\. Tu es Sacerdos.
Oratio.
Deus, qui es tuorum antistitum potentissimus illustrator, concede propitius, ut intercessione beatissimi Sacerdotis et Confessoris tui Zenonis magnificis exemplis informati, saeculi istius caliginem sine periculo transeamus.
IV.-- BENEDICTIO IN FESTO S. ZENONIS EPISCOPI ET CONFESSORIS.( Ex codice XV saeculi Sodalitii S. Mariae de Domo inscripto. ) Benedictiones Pontificales. Omnipotens Deus et Dominus det vobis copiam benedictionis, qui beatum Zenonem sibi adscivit virtute confessionis. Amen.
Et qui illum fecit coruscare miraculis, vos exornet bonorum operum incrementis. Amen.
Quo ejus exemplis eruditi, et intercessione muniti, cujus depositionis diem celebratis, illi possitis in coelesti regione adjungi. Amen.
Quod ipse praestare dignetur, cujus. Amen.
[CXCVI] V.--CONSTITUTIO THEOBALDI EPISCOPI VERONENSIS, EXCERPTA E CONSTITUTIONIBUS AB EODEM EDITIS ANNO 1305, POSTEA AB EPISCOPO PETRO SCALIGERO REPETITIS.(Ex mss. Capituli Veronensis.)
Cap. LXI, de Festivitatibus Sancti Zenonis, Sanctorum Firmi et Rustici celebratione. Cupientes devotione congrua, et debitis honoribus gloriosum Confessorem beatum Zenonem, Patrem et Patronum hujus civitatis et dioecesis Veronensis, et beatos Georgium, Firmum et Rusticum martyres a grege nobis credito venerari, ut eorum apud Deum meritis adjuvemur, festum ipsorum per civitatem et dioecesem Veronensem a populo et clero annue praecipimus solemniter celebrari, ac per ecclesias ejusdem civitatis et dioecesis universas singulis diebus ferialibus in Matutinis et Vesperis eorum commemorationem fieri cum eorum antiphona et collecta legendis in ecclesiis praelibatis. Itaque pro tribus martyribus dicatur una Antiphona communis et oratio: Deus qui nos concedis sanctorum tuorum Georgii, Firmi et Rustici martyrum tuorum memoriam agere, etc.
Eamdem commemorationem subinde praecepit Joannes Matthaeus Gibertus episcopus Veronensis Constitutionum tit. 2, lib. II, cap. 2 et 3, non tam in Laudibus et Vesperis, sed etiam in Missis in collecta A cunctis: quod vel hodie servatur.