LexUniv:Iagielo
IAGIELO, vel IAGELLO, Princeps Lithuaniae, ex Ethnico Christianus, meruit Hedvigis, Ludovici Poloniae Regis filiae natu minimae, nuptias, hincque sceptrum. Ut Lithuanos similiter ad fidem perduceret, omnibus spectantibus, ipse arboribus, quas hactenus coluerat, securi impactâ, ignibusque tam diu adoratis aquâ affusâ, Non est, clamabat, non est Deus, quod excindi, deiici, extingui potest. Orationem dein Dominicam, Symbolum Apost. aliaque in idioma Lithuanicum vertit. Baptizatus Vladislai nomen accepit, & Lithuaniam Poloniae iunxit. Proelium contra Crucigeros initurus, Deo pro victoria publicè supplicavit. Palatinum Valachiae in fidem accepit, A. C. 1411. Cracoviae cum Hussitis disputationem instituit, A. C. 1431. quâ tantopere motus est, ut in veritatem sedulo inquirere coeperit, & Ministro Evangelico è Bohemia evocato, sub praetextu Astronomici studii, saepius ad pacandam conscientiam usus sit. Eo facilius quoque uxoris petitioni annuit, & Ecclesiastis Bohemis vulgari linguâ Slavonicâ sacra administrare, in templo sanctae Crucis Cracoviae, permisit. Cuius zelum & alii imitati, Corybutus inprimis Regis patruelis, qui armatâ quoque manu Bohemos propugnavit. Ex huius fam. ultimus Sigismundus Aug. Obiit A. C. 1572. Ipsi verò Iagieloni successit Vladislaus fil. Vide Cromerum Hist. Pol. l. 16. & 18. Ant. Muret. in Orat. Laet. in Comp. Hist. Univ.
| Lexicon Universale Navigatio | |
|---|---|
|
|
Posterius |
 In Vicipaedia: | |
 In Victionario: | |
IAGIELO, vide Ladislaus.