 XXI. A monsignor Antonio Querengo |
XXIII. Al medico Giovanni Fabri  |
XXII
A Gaspare Sdoppio
È sicuro d’insegnare tutte le scienze in un anno; desidera che la sua lettera sia presentata come sta al papa ed a’ cardinali; vuol fare la nativitá dello Schopp.
... De modo docendi scientias omnes per annum nihil vereare; ac te puta in duobus mensibus ex ore meo omnes mirabiliter auditurum, cum tibi mundum aperiam librum Dei, non metaphysicum meum, quia iste est degenerans transcriptio ex ilio. Cum audieris me, libelli mei videbuntur tibi ludibria circulatorum. Theologi nostri non legunt nisi divum Thomam et discipulos et Aristotelem; et quicquid in his non legunt libris, haereticum putant. Sed si aperiam os Romae per mensem, videbis caelum novum ac terram novam, et ab aquilone et ab austro confluxum ad fidem catholicam. Cupio literas meas latinas papae et cardinalibus exhiberi ita ut iacent: nihil vereare de Campanella tuo, quoniam non secundum hominem nunc ambulat. Utinam praeteritorum conscientia non me morderet. Sed de scientiarum et miraculorum et arcanorum promissis iubeo te nihil haesitare. Tantummodo salutem para mihi. «Domine, labia mea aperies, et os meum annunciabit laudes Dei».
Tempora periculosa video: timeo tibi ne in aegritudinem incidas. Itaque si tui natalis annum, diem, horam et locum meministi, praebe schedulam Sigismundo. Ipse enim per don Basilium typum delineandum curabit mihique mittendum ut de itineribus ac infirmitatibus tuis ex astris aliquid intelligam. Angit me cura tui; angit te cura mei. Tui habitum corporis agnoscere vellem aliaque multa ut regiminis formam, dum eas redeasque, praescribam. Nec spernas te velim. Si enim tibi te minus servandum ducis, cogita quantopere salus tua reipublicae sit necessaria et mihi servo tuo longe magis. Dominus te nobis servet....
[Neapoli, exeunte octobri (?) 1607].