EPUB   MOBI   PDF   RTF   TXT
Sine Nomine
Iam lucis orto sidere
Saeculo VI
editio: incognita
fons: incognitus
Iam lucis orto sidere,
Deum precemur supplices,
ut in diurnis actibus
nos servet a nocentibus.
Linguam refrenans temperet,
ne litis horror insonet,
visum fovendo contegat,
ne vanitates hauriat.
Sint pura cordis intima,
absistat et vecordia:
carnis terat superbiam
potus cibique parcitas.
Ut cum dies abscesserit,
noctemque sors reduxerit,
mundi per abstinentiam
ipsi canamus gloriam.
Deo Patri sit gloria,
eiusque soli Filio,
cum Spiritu Paraclito,
nunc et per omne saeculum.
Amen.