Migne Patrologia Latina Tomus 99
Fragmenta ex codicibus manuscriptis (Auctores varii), J. P. Migne
I. Ex Poenitentiali magistri Bartholomei Oxoniensis episcopi, cujus apographum mecum communicavit D. Tonelerius bibliothecae S. Victoris moderator vigilantissimus. De infirmis in periculo mortis constitutis. (Ex Poenitentiali Theodori.) CAP. XLVIII.Ab infirmis in periculo mortis positis (0977D)per presbyteros pura inquirenda est peccatorum confessio, (0978D)non tamen imponenda est illis poenitentiae quantitas, sed innotescenda, et cum amicorum orationibus et eleemosynarum studiis pondus sublevandum, si forte migraverint, ne obligati a communione alieni vel consortio veniae fiant. A quo periculo si divinitus erepti convaluerint, poenitentiae modum a suo confessore impositum diligenter observent. Et ideo secundum canonicam auctoritatem, ne illis janua (0979A)pietatis clausa videatur, orationibus et consolationibus ecclesiasticis sacra cum unctione olei animati, secundum statuta sanctorum Patrum communione viatici reficiantur. Si autem peccatum mortale fuerit sed occultum, innotescenda eis poenitentia quae imponeretur, si peccatum publicum esset; sed nulla sunt imponenda quae observari absque peccati publicatione non possunt, quale est extra ecclesiam poenitere, et similia quae nonnisi laicis et publice peccantibus sunt injungenda. Ex hoc vero intelligant ad quid teneantur ex merito, vel quantum eis parcatur, eo quod per secretam confessionem facti sunt ipsorum primi accusatores; et ut pro erubescentia quam sustinerent in publica poenitentia, abundantiorem cordis contritionem et devotionem, cum charitatis (0979B)operibus recompensent.
II. Ex interrogationibus ad confessionem dandam, quae subjiciuntur antiquissimae canonum Collectioni codicis viri clarissimi Antonii Vionis domini Herovallii. Theodorus dixit: Monachus fornicationem faciens (0980A)cum puella, tribus annis poeniteat Si cum sanctimoniali, septem annis poeniteat. Laicus maculans se cum ancilla Dei, duobus. Si genuerit ex ea filium, tribus annis. Si sine concubitu, tribus quadragesimis. Quidam quadraginta dies judicant.
III. EX COLLECTIONE CANONUM, QUAE SERVATUR IN BIBLIOTHECA S. VICTORIS. CAP. CONTRA SIMONIAM. (Ex Theodoro.) Ut nullus ordinatus de ministeriis Ecclesiae aliquid vendere praesumat. Si quis presbyter, aut diaconus inventus fuerit de (0980B)ministeriis Ecclesiae aliquid venundasse, quia sacrilegium commisit, placuit eum in ordinatione Ecclesiae non haberi. Judicio tamen episcopi dimittendum est, sive sit dignus, sive indignus, in suo recipi gradu.