Migne Patrologia Latina Tomus 17
AucInc.Exorci 17 Auctor incertus Parisiis J. P. Migne 1845 early modern edition, no apparatus this file was encoded in TEI xml for the University of Zurich's Corpus Corporum project (www.mlat.uzh.ch) by Ph. Roelli in 2013 Classical Latin orthography latin
Exorcismus
613 Omnipotens Domine, Verbum Dei Patris, Christe Jesu, Deus et Dominus universae creaturae, qui sanctis apostolis tuis potestatem dedisti calcandi supra serpentes et scorpiones: qui inter caetera mirabilium tuorum praecepta dignatus es dicere; Daemones effugate (Matth. X, 8); cujus virtute victus tamquam fulgur de coelo Satanas cecidit: tuum nomen cum timore et tremore supplex precor, ut indignissimo mihi, data venia omnium delictorum, confidentiam, et possibilitatem donare dignetur; ut hunc crudelem draconem brachii tui munitus potentia, fideliter et securus aggrediar. Adjuro te ergo, omnis immundissime spiritus, omne phantasma, omnis incursio Satanae, in virtute nominis Christi, qui post lavacrum Jordanis in desertum ductus est, et in tuis te sedibus vicit; ut quem ille de limo terrae ad honorem gloriae suae formavit, tu desinas impugnare, et in homine miserabili non humanam fragilitatem, sed omnipotentis Dei imaginem contremiscas. Cede ergo Deo, qui te in humiliato famulo suo Job in servitutem redegit: cede Deo, qui te et militiam tuam in Pharaone, et in ejus exercitu per Moysen servum suum demersit in abyssum: cede Deo, qui te per Danielem puerum suum in Beel perdidit, et in dracone prostravit: cede Deo qui te per fidelissimum suum David de Saule rege spiritalibus canticis pulsum fugavit: cede Deo, qui te in Juda traditore damnavit. Ille enim te nunc divinis verberibus agit, in cujus conspectu cum tuis legionibus tremens clamabas: Quid nobis et tibi, Jesu fili David? venisti ante tempus torquere nos (Matth. VIII, 29). Ille te flammis perpetuis urget, qui in fine temporum dicturus est impiis: Ite maledicti in ignem aeternum, quem praeparavit 614 Pater meus diabolo et angelis ejus (Matth. XXV, 41). Tibi enim impie et angelis suis vermis, qui numquam moritur: tibi et angelis tuis inexstinguibile praeparatur incendium; quia tu es, maledicte, homicidii princeps, tu auctor incesti, tu sacrilegorum caput, tu artium pessimarum magister, tu haereticorum doctor, tu totius obscenitatis inventor. Exi ergo, impie, exi, scelerate, exi cum omni fallacia tua; quia hominem templum suum voluit esse Deus. Sed quid diutius moraris? Da honorem Deo Patri omnipotenti, cui omne flectitur genu: da locum Christo Jesu, qui pro homine suum sanguinem fudit: da locum Spiritui sancto, qui te per beatum apostolum suum Petrum manifestavit in Simone, qui fallaciam tuam in Anania et Saphira condemnavit, qui te in Herode rege honorem Deo non dante percussit, qui te in pessimo mago per apostolum suum Paulum caecitatis caligine perfudit, et per eumdem de pythonissa verbo imperans exire praecepit. Discede ergo nunc, discede seductor; tibi enim eremus sedes est, tibi habitatio serpens est. Humiliare, prosternere: non est jam differendi tempus. Ecce enim dominator Dominus proximat, cito ignis ante ipsum ardebit, et inflammabit in circuitu inimicos suos. Si enim hominem fallis, Dominum non potes irridere. Ille te ejicit, cujus oculis nihil occultum est: ille te expellit, cujus virtuti universa subjecta sunt: ille te excludit, qui tibi et angelis tuis aeternam praeparavit gehennam, de cujus ore exiet gladius bis acutus, qui venturus est in Spiritu sancto judicare saeculum per ignem, amen.