Migne Patrologia Latina Tomus 106 pdf
Epistolae
Epistolae (Frotharius Tullensis), J. P. Migne 106.0882A
EPISTOLA PRIMA. AD HILDUINUM. 106.0863B|
Egregio viro, et cum summa veneratione nominando, HILDUINO, a Deo electo Patri et magistro, FROTHARIUS, humilis episcopus perpetuae beatitudinis in Domino opto salutem.
Salute corporis et animae vestram jugiter celsitudinem potiri, et felici sublimatione tam in coelesti virtutum charismate, quam in terrenae dignitatis nitore diutius augmentari, toto mentis adnisu, totius animi intellectu, toto pectoris robore desideramus, optamus, poscimus. Cupimus nihilominus vestrae dignitatis ora contemplari, vestrae solertiae eloquiis in Domino perfrui: quin etiam templa piissimae religionis intueri, quibus et spiritalia monita capiamus, 106.0863C| et salutaria sanctitatis ornamenta sumamus. Nam etsi corporali intuitu vestri ordinis splendidissimum nequeo contemplari decorem, sed assidue eum spiritualibus cum ineffabili gaudio contemplor obtutibus. Imo et mihi meisque hujusmodi vestigia frequenti adhortatione non omitto inculcare sectanda. Non enim valeo tantae jucunditatis gesta, et 106.0864B| tam pia divinae servitutis obsequia memoria non retinere, quae apud vestram devotissimam paternitatem me constat nuper vidisse. Quis enim semel ea conspiciens non animo salubriter infigendo depingat, quorum recordatio summae pietatis est solidatio? quorum exsecutio perpetuae quietis est adeptio? Jussio divina mihi omnibusque vestrae devotionis exercitia cernentibus pro favore, ut ea prosequi digne valeamus, aspiret, et vobis pro ostenso sectandi operis exemplo perpetuae recompensationis praemia feliciter concedat. Amen.
Domino imperatori litteris innotescimus ego et Smaragdusabbas, qualiter Ismundusabbas et monachi ejus quadam simultate a se invicem discordent. Vestra pia sollicitudo agat ut illi monachi votum 106.0864C| suum Deo promissum implere valeant, et easdem litteras ad ejus praesentiam vestra paupertas deferat.
EPISTOLA II. AD GERUNGUM SUMMUM SACRI PALATII OSTIARIUM.
Illustrissimo viro et toto affectu colendo ac desiderando GERUNGO summo sacri palatii ostiario, 106.0865A| FROTHARIUS gratia Dei episcopus aeternam in Christo salutem.
Vestrae prosperitatis vestrique profectus semper sumus memores. Et idcirco divinam misericordiam saepius pro vestra salute imploramus, ut vos ad sua mandata perficienda jugiter accendat, et ad multorum profectum longaevo tempore conservet: et sic pie, sobrie et juste viventem praesentis naufragii pelagus transmeare adminiculo faciat, ut post ad portum quietis aeternae perductum perenni retributione feliciter coronet. Sciatis igitur nos in hujusmodi intentione assidue manere, et his diebus pro vita et sanitate vestra missas tantas et psalteria tanta fratres nostros decantasse. Sciatis denique nos domno imperatori litteras per praesentem missum 106.0865B| nostrum dirigere, unde petimus ut si domnus Hildoinus deest, ante domnum imperatorem vos eum mittatis. Valete in Domino semper, et nostri memor estote.
EPISTOLA III. AD LUDOVICUM IMPERATOREM.
Ad aures misericordiae vestrae reducimus, piissime imperator, ego FROTHARIUS episcopus, et Smaragdus abbas, quod tempore Fortunati Mediolacensismonasterii abbatis, per jussionem vestram Smaragdus ipsius monasterii monachis portionem de abbatia dedit, ut regulariter viverent. Et idcirco bene et secundum regulam vixerunt, quousque Fortunatus recessit. Sed cum suscepisset Hismundus ipsum monasterium, recepit illorum portionem, et promisit se 106.0865C| eis omnia necessaria regulariter administraturum. Quod postea saepius aliter illi evenisse testantur. Unde et nunc venerunt ad nos, reclamantes et dicentes se nec regulariter vivere interius, nec regulariter alimenta corporis sumere exterius. Venimus itaque pariter illuc, et ita esse invenimus, et cognovimus ex parte negligentiam ipsorum monachorum, ex parte negligentiam abbatis eorum. Promisit ergo iterum se per omnia emendare velle quidquid hactenus negligenter ex sua parte fuerat actum. Cui rei et nos consensimus, et ut illi monachi assensum praeberent laboravimus. Sed illi timentes ne, sicut saepius evenerat, aut per eum, aut per ejus ministros illius promissio frustraretur, nec ejus promissionibus 106.0866A| jam amplius credere, nec ejus emendationem se recipere posse dixerunt, nisi illis portio redderetur, sicut dudum illis dare jussistis. Quod quia ipse sine vestra jussione nullatenus se facturum dixit, ideo illi omnes pariter communi intentione communique prece postulaverunt ut illis licentiam darem ad vestrae pietatis praesentiam recurrendi, et vestram misericordiam implorandi: dicentes se magis velle de eodem monasterio expelli, et in peregrinatione et mendicitate vivere, quam falsis promissionibus ulterius credere, et sub falso monachorum nomine militare. Quamobrem dedimus eis licentiam ad vos veniendi. Haec autem vestrae sapientiae innotuimus ut priusquam ad vos veniant, causas acclamationis eorum dignoscatis.
EPISTOLA IV. AD N . . . 106.0866B|
Excellentissimo ac nobilissimo viro celsoque honore dignissimo N., summo sacri palatii ostiario, FROTHARIUS humilis episcopus, et omnis Tullensis Ecclesia, canonicorum videlicet et monachorum, virginum, caeterorumque fidelium caterva, aeternam in Christo optamus salutem.
Memores vestri in sacris orationibus sumus, et Deum coeli ac terrae pro sospitate corporis et animae vestrae saepius deprecamur, scilicet ut vos et in hac vita ad profectum nostrum aliorumque fidelium diutius conservet incolumem, et post obitum vitae aeternae tribuat feliciter esse participem. Sciat igitur 106.0866C| sublimitas vestra quod postquam nuper ad vos direxi missum nostrum, synodum parochiae nostrae plene convocavi, et pro salute vestra missas et psalteria decantari feci: quod et saepius agere ob vestri prosperitatem et debemus et cupimus. Vos vero nostri semper reminiscimini, et pro necessitatibus atque profectibus Ecclesiae nostrae laborare ne pigritemini, videlicet de illa ratione, pro qua ad vos Catallonis [Catalaunis] vassallum nostrum direxi, et nunc domno N. exinde litteras dirigimus vestramque benivolentiam precamur ut cum illo pariter ex hoc decertetis, N. id ipsum suadeatis ut vobis de hujusmodi causa consentiat, quia ad ejus ministerium eadem possessiuncula pertinet. Taliter hinc 106.0867A| vestra sollicitudo vigilet, qualiter in vobis fideles vestri confidimus. Valete semper in Christo.
EPISTOLA V. AD N . . . .
Nobilissimo viro et cum omni honore nominando N . . . Frotharius episcopus aeternam in Domino opto salutem.
Notum sit dilectioni vestrae quia semper vestri memores sumus in sacris orationibus, et vestram sanitatem jugiter manere desideramus. Unde et modo pro vobis decantari feci missas et psalteria. Vos quoque nostri semper reminiscimini, et quidquid vobis iste missus noster significaverit, facere studete. Valete in Domino ter, quater et centies.
EPISTOLA VI. AD SICHARDUM ABBATEM. 106.0867B|
Nobilissimo viro, et nimiae dilectionis affectu colendo SICHARDOdivina provisione venerabili magistro, FROTHARIUS episcopus humillimus et praesentis et perpetuae felicitatis in Domino opto salutem.
Quantum vestrae celsitudinis statum omnigenis opibus jugiter florere, et omnibus prosperis ubique exuberare desideremus, et divinae cognitionis novit intuitus, et mox ut occasio venerit serviendi, vestrae cognoscere poterit industriae sensus. Quod et nunc quidem veraciter, ut credimus, agnoscit, quia prudenter intelligit charitatem quibuslibet praepeditam obstaculis, et in corde inviolabiliter teneri, et in operis exercitio plerumque non exhiberi. Sed si quid hactenus de vestris obsequiis minus egimus, 106.0867C| vestra nos jussio deinceps admoneat, ut sicut dignum est, vobis sedula servitute famulemur. Caeterum obsecramus vestrae pietatis clementiam, ut hunc puerum famulum vestrum Haudulfi comitis filium, ante seniorem nostrum domnum Lotharium introducatis, et causas necessitatis ei, quas vobis innotuerit, apud eum digna impetratione obtineatis: ut quemadmodum de multis aliis, ita et de isto vestra amplificetur eleemosyna et merces, et in praesenti tempore de nobis et de ipso habeatis servitium, et a Deo sempiternae recompensationis accipiatis praemium.
EPISTOLA VII. AD JUDITH IMPERATRICEM.
Innotesco clementiae vestrae, serenissima imperatrix, 106.0867D| ego FROTHARIUS humilis episcopus, quod quasdam injustitias fecerunt in nostra parochia missi vestri, id est nomen illis, quia alias ecclesias, a nobis secundum ecclesiasticam dispositionem ordinatas, aliter ordinaverunt et abstulerunt de quibusdam ecclesiis hoc quod ad illas juste et rationabiliter pertinebat. Sed et de ecclesia istius presbyteri vestri tulerunt dimidium mansum, et dimidiam suam decimam, et dederunt homini laico contra canonica statuta, et contra ministerium ac voluntatem nostram. Nos autem scimus quod vestra jussio et vestra voluntas fuit, ut rectitudinem et justitiam facerent, 106.0868A| et contra ministerium sacrum nihil praesumerent. Quamobrem si vestra voluntas est ut emendetur, mandate nobis, et nos secundum vestrum praeceptum haec omnia ita emendabimus ut vestra exinde crescat eleemosyna, et merces augeatur aeterna. Semper Ecclesiam Dei defendite, et ecclesiasticam legem exaltate, ut vos omnipotens Dominus ab omni malo defendat, et ad exaltationem coelestis regni feliciter perducat. Amen.
EPISTOLA VIII. AD DROGONEM METENSEM EPISCOPUM.
Nobilissimo viro et toto mihi affectu colendo DROGONI gratia cooperante divina Metensis sedis antistiti, perpetuam in Christo opto salutem.
Desiderabilem tuae dignitatis personam oppido 106.0868B| contemplari proficuo aspectu desidero, et de utilibus quibusque ac nostro ministerio congruentibus rebus tecum salutifera collatione sermocinari cupio. Profecto enim in verbis tuis, ut pote gratiosis atque dulcoratis, invenietur amici gratia, et summae jucunditatis in labiis tuis resonabit suavitas, quibus et salutare audientis visceribus poculum, et vitale tribuatur alimentum. Sed hujus desiderii mei atque voluntatis paulo post, si vita comes fuerit, obtinebo effectum, tunc videlicet cum pro denuntiata militia Hesperiam proficisci coeperimus: aut cum peracto militari certamine ad conventum generalem palatio confluxerimus. His explicitis, tuae innotescimus dilectioni, Leufredum hujus epistolae gerulum nos adisse, poscentem ut de sui connubii, quod inter 106.0868C| nos asseveratur exercuisse, tibi significemus rationem. Cujus rei ad praesens investigare ad liquidum nequivimus certitudinem, quam vobis significantius, cum ad praedictum devenerimus palatium, intimare poterimus. Valere te in Christo feliciter opto.
EPISTOLA IX. AD HILDUINUM.
Excellentissimae nobilitatis viro, et cum summa veneratione nominando HILDUINO a Deo electo Patri et magistro, Frotharius episcoporum humillimus et omnis Tullensis Ecclesiae, canonicorum videlicet, et monachorum, virginum caeterorumque fidelium caterva sempiternae felicitatis in Christo salutem.
Perspicuum nobis est, paternitatem vestram ad 106.0868D| utilitatem profectumque sanctae Ecclesiae nutu ordinante divino coelitus ordinatam, videlicet ut vestro patrocinio multi et temporaliter et spiritualiter foveantur, et in sancta religione diutissime conserventur. Quamobrem diversas hominum vos constat suscipere causas, et susceptas ad aures deferre imperiales, ut ob hujusmodi laborem et studium sempiterna vobis augescat merces et praemium. Quocirca et nos quoque suppliciter flagitamus ut diutius ad ornamentum sanctae Ecclesiae conservemini, et familiae Christianae proficuum jugiter praebeatis gaudium. Sciat itaque celsitudo vestra, nos his diebus concilium 106.0869A| subditorum nostrorum convocasse, et pro salute cordis ac corporis vestri missas et psalteria decantari fecisse, quod et crebrius agere ob felicitatem vestri et debemus et cupimus. Vos autem nostri solita pietate reminiscamini, et causam necessitudinis atque utilitatis Ecclesiae nostrae, quae vobis nuper significata est, si competens adfuerit locus, domno imperatori significare non dedignemini, scilicet de duobus mansis ad basilicam beati N . . . pertinentibus, et quondam de possessione beati Stephani subtractis: quos ille tenet, qui imbecillitate corporis praegravante nec ad militiam valet egredi, nec ad palatium quoque deservire. Quae possessiuncula, si vestrae clementiae libet ut in jus debitum reddatur, secundum constitutionem vestram, ejusdem praefato 106.0869B| possessori vel per praestariam, vel per beneficium valet restitui. Tandem ut domus Dei non amittat quod ei juste debetur et competit. Sunt quoque et alio loco sex mansi aliae basilicae in honore beati N . . . constructae adjacentes, sed et alii quadraginta ecclesiae beati N . . . . pertinentes, eodem modo de jure ecclesiae nostrae dudum subtracti, de quibus dissitudine [desuetudine] priscae constitutionis inolescente, nec census solvitur ullus. Hinc igitur vestra vigilet pia sollicitudo, ut quod olim juri ecclesiastico juste mancipatum est, per vestram providentiam illuc tempore congruo redhibeatur perpetuo possidendum, ita duntaxat ut nec ecclesia rebus debitis defraudetur, nec possessores earum eadem possessione priventur. Nunc tamen ne nostrae parvitatis petitio vestrae 106.0869C| celsitudinis auribus oneri existat, tantum de praedictis duobus mansis modo laborare dignemini. De reliquis, cum ad vestram sublimitatem devenero, et eorumdem seriem testamentorum vestrae industriae liquidius propalavero, hinc inde qualiter visum vestrae serenitati fuerit, agere quibit. Sed et cum de iisdem aliquid loqui vobis placuerit, si illum fidelem vestrum, amicum nostrum, vobiscum assumpseritis, per omnia vestris ex hoc obsecundabit obsequiis. Taliter hinc vestra agat prudentia, qualiter in vestra tuitione filii vestri confidimus. Paternitatem vestram nostris jugiter suffragantem profectibus coelestis protectio usquequaque muniendo gubernet, et sempiterno vigore prospere valere concedat.
EPISTOLA X. AD DROGONEM METENSEM EPISCOPUM. 106.0869D|
Nobilissimae dignitatis viro, et celso honore dignissimo, DROGONI, divina favente gratia, Ecclesiae Metensis episcopo, FROTHARIUS exiguus item episcopus perpetuam in Christo opto salutem.
Amorem et dilectionem vestri pio cultu conservans felicem vitam longaevis annorum curriculis vos ducere gratulamur, et id nutu concedi superno sedulo flagitamus. A vobis quoque ejusdem mihi charitatis jura rependi, et inviolabiliter conservari suppliciter 106.0870A| expeto, ut hoc spiritualiter glutino vobis connexus et vestris colloquiis recreer, et salutiferis studiis atque exemplis proficue informer. Caeterum, sciat vestra dilectio mihi oppido displicere de quibusdam monachis coenobii vestri, cui Erlefredus rector esse videtur. Cum enim nostrae parochiae isdem adjaceat locus, et habitatores ejus nostro munimine Deo adnuente protegi debeant, egrediuntur quidam eorum parochiam nostram absque nostro permissu et licentia, quasi ob quasdam reclamationes, et quo tendant penitus ignoro. Porro si ad vos veniunt, aut molestiam vestris auribus inferunt, ordo canonicus erga nos debuerat conservari, ut mihi illorum querelae paterent, et nostro pari consultu correctio eis congrua daretur. Quod quia hactenus negligenter 106.0870B| omissum est, vestra id deinceps industria digna emendatione corrigi debeat: ut nec vestrae aures ulterius hac in re molestentur, nec nobis jus canonicum et reverentia debita auferatur. Est praeterea alia vestrae dominationis cella sita in Warengissi villa ( Warengeville ), quam etiam monachi sine mea licentia inhabitare noscuntur. Sed quia inter eos me constat adolevisse, in coenobio videlicet Gorzensi, haec utcunque mea parvitas tolerat. Denique illud vestrae paternitati non sileo, quod quaedam vestri juris basilicae in providentia nostra consistunt, quae nec mansorum subjectione fulciuntur, nec sacerdotum praesentia custodiuntur. Pro quibus omnibus vestra ordinatio legatum ad nos mittat, quo instante haec emendentur. Antequam enim in praefatis cellis 106.0870C| vel ecclesiis congrua emendatio fiat, nihil nobis de eorum ordinationibus vel dispositionibus ecclesiasticis praesumendum est. Nam et in praemisso monasterio Vosgensi, quidam vestri missi ob rectitudinem faciendam illuc directi, nihil utilitatis, ni fallor, ibi gesserunt: sed magis discordiam multiplicantes, eosdem fratres deteriores per omnia reddiderunt. Decet vero ut et in monasteriis, et in ecclesiis, et in omnibus quae vestrae ditioni subdita sunt, talis ordinatio et rectitudo servetur, quatenus et nos et universi finitimi vestri vestris exemplis instituamur, et per vos ad verae religionis studium utcunque perducamur, veluti per summum pastorem ac rectorem nobilissimum plebis. Valeat paternitas vestra prolixo tempore feliciter in Christo. Amen.
EPISTOLA XI. AD HILDUINUM. 106.0870D|
Excellentissimae nobilitatis viro, et gloriosae dignitatis apice sublimato, HILDUINO, a Deo electo Patri et magistro, FROTHARIUS episcoporum extimus, et universa Ecclesia Leucorum civitatis perennem in Christo suppliciter optamus salutem.
Ut longaevis temporibus vestra felici vigore et prospero cursu valeat paternitas, creberrimis precum supplicationibus divinam clementiam et ore et corde 106.0871A| deposcimus. Dum enim vestri regiminis tutelam nobis solito Dei gratia praeesse annuerit, coelestis protectionis munimen nostris adesse profectibus veraci experimento dignoscimus. Nunc itaque vestra misericordia, quemadmodum semper consuevit, pro nostra laborare dignetur necessitudine, quia servitium nobis valde onerosum injungitur, quod absque difficultate nequaquam vires nostrae peragere possunt. Praecipitur enim ut in Aquis palatio operemur, et laboribus ibidem peragendis insudemus. Sed ab hoc opere alia servitia et necessitates nos revocant, et si vestrae pietati libet, etiam opportunam satis excusationem praetendunt. Recordari siquidem vestra paternitas valet quod cum in palatio Gundumvillae domnus imperator hoc anno staret, vestram 106.0871B| continens manum, jussit ut in fronte ipsius palatii solarii opus construerem, de quo in capellam veniretur. Adjecit quoque quod quempiam illic plerumque manere sivisset, vestri personam tacite innotescens. Praecepit nihilominus ut in pariete ipsius domus ligneo, alterum operis lapidei parietem superadjicerem, et quamlibet hujusmodi opera sint festinanter explenda. Et tamen adhuc tertius labor nostrae coeptae basilicae adhibendus, de qua nihil postquam hinc secessistis egimus: quia impediti sunt hactenus homunculi propter tempus hiemis, et tempus sationis. Istiusmodi laboribus addita est nobis nolentibus necessitudo, et miserae infelicitatis adversitas. Quidam namque servus peccati ac noster, invidens sodali suo cellarario nostro, ob quod ei in ministerio praeferretur, 106.0871C| horreo, quo ruri segetes erant redactae, quarum esu nos sustentari usque tempus messis credebamus, pestiferum latenter ignem supposuit, et mox universa quae illic habebantur consumpsit: servus infelix, servus ingratus, et saevo anathemate permultandus, qui tantae vitae subsidiis sub momento privavit. Denique familiam sancti Stephani adeo praeteritorum annorum fames adnihilavit, et ad tantae perduxit paupertatis miseriam, ut vix sumptibus fragilis vitae sustentari ullatenus valeant. Unde nec censum ab eis debitum exigere possum, nisi ex opere manuum, pro quo rursus a me pascuntur, et nec sic recuperari utiliter queunt. Haec et supradicta pia consideratione perpendere dignamini, et a praedicto servitio nos liberare ne pigeatis. Alioquin per 106.0871D| me ipsum ad praesentiam domni imperatoris, et vestram praesentiam suppliciter obsecrabo, ut hoc onus curae pastoralis a me submoveatis, quia illud mea parvitas taliter ferre non valet; et valde utilius est me ab istiusmodi cura submoveri, quam per meae auctoritatis fiduciam tot oves Domini exitio discriminis interire. Agat ergo Dominus meus ex hac petitione erga me, ut bene semper egit, et valeat per multa annorum curricula feliciter in Christo. Amen.
EPISTOLA XII. WICARDI AD FROTHARIUM. 106.0872A|
Reverendo, omnique honore dignissimo domino et Patri FROTHARIO praesulum benignissimo, VICARDUS, minimus abbatum, cum fratribus meis perennis gloriae opto salutem.
Quam gratiarum actionem de beneficiis quae solo mercedis coelestis intuitu parvitati nostrae impenditis, virorum optime, vobis rependemus, qui non solum pastorali cura intima nostra, verum pia quoque sollicitudine exteriora nostrae substantiae procurare dignamini? Insuper ad cumulum vestrae charitatis circa nos demonstrandum, quod nobis auro ditius esse potest, sancti Apri reliquias, nec non et beatae suae conversationis actus humilitati nostrae nunc 106.0872B| mittere estis dignati. Sed pro his omnibus, pro cujus amore hoc geritis, prorsus vobis ipse manentis retributionis fructum restituere non obliviscetur. Quod tamen possumus, minimas preces nostras supernae majestati vestrae salutis causa offerre meminerimus: et in temporalibus ubicunque nobis dignatio vestra imperare voluerit, devotissimi paratissimique fore studebimus. Agat itaque benignitas vestra, ut benigne coepit, non solum de rebus et hominibus super ipsas commorantibus quae in promptu nobis sunt, sed et de illis quas iidem ipsi homines nostri, qui passim et libere habitare videntur, emerunt: ut videlicet semper Domini Salvatoris respectui sint mancipatae, cum illis ipsis qui eas possident. Qualiter autem super hoc agendum sit, vestrae prudentiae 106.0872C| manifestius liquet. Videtur tamen nobis, si vos utile judicaveritis, ut quicunque de ipsis mancipiis sunt qui se subtrahere de nostra dominatione moliuntur, servitutem suam coram vobis rewadiare faciatis, ut deinceps per justitiam subacti hanc fraudem perpetrare nequeant. Mittimus dignationi vestrae donationem illarum rerum exemplatam, pariter cum ipsa et domni imperatoris exemplationis chartam, quam nostro monasterio de teloneo, ut nusquam in toto suo regno a nobis exigeretur, fecit, emunitatem etiam similiter exemplatam. Valere vos multum optamus, domine et Pater, feliciter in Christo.
EPISTOLA XIII. ALDRICI AD FROTHARIUM. 106.0872|
Eximio mihique perdilecto FROTHARIO episcopo 106.0872D| ALDRICUS sempiternam salutem.
(Vide infra, inter Opera Aldrici Cenomanensis.)
EPISTOLA XIV. AD HILDUINUM.
Excellentissimo atque summo honore dignissimo HILDUINO a Deo electo Patri et magistro, FROTHARIUS episcoporum humillimus, et universa Tullensis Ecclesiae caterva perpetuae benedictionis in Christo opto salutem.
De omnibus necessitatibus atque indigentiis nostris 106.0873A| ad vos semper recurrimus, ut pote patrem unicum et defensorem piissimum, cujus patrocinio assidue indigemus, cujus adminiculo saepius sublevamur. Constat quippe protectionem vestram januam adesse salutis, vestrumque regimen portum solidissimae quietis. Subveniat itaque solito nobis clementia vestra, et paterno succurrat affectu. Importuni vobis crebrius supplicando existimus, sed vestrae celsitudinis serenitas nullatenus nos ob eamdem importunitatem aspernetur: verum ingruentis necessitudinis indigentiam considerare dignetur. Domnus enim imperator suggestione mea quamdam villam basilicae Sancti Apri reddidit (an. 836), quam Pippinus avus ipsius eidem donavit. Hanc vero per beneficium nostrum quidam Hispanus, nomine Joseph, hactenus 106.0873B| tenuit, eamque dum adhuc viveret desertam fecit et ad nihilum deduxit: et ipsius loci servientes opprimendo destruxit. Ipse autem nunc de hac vita migravit, et residua est illi conjux ipsius cum filio parvulo, qui sunt ex familia domni imperatoris: sed et ipsa causa charitatis et dilectionis, vel per eleemosynam domni imperatoris, de eodem beneficio decem mansos et vineam quadraginta modios vini fere valentem dare volui; reliquos vero viginti mansos ad opus fratrum praedictae ecclesiae restituere curavi. Praedicta autem mulier datum meum dispexit, et nunc ad palatium veniens totum ipsum beneficium furtim et absque nostra nititur praeripere voluntate. Vestra vero prudentia id agere nunc secundum pristinae pietatis consuetudinem dignetur, 106.0873C| ut praedictae res in possessione S. Apri permaneant, et ipsorum fratrum usibus debita victualia praebeant: quatenus et S. Apri merita, et ipsorum fratrum piae postulationes vobis proficiant in vitam aeternam. Valere vos semper optamus, sancte ac reverentissime Pater.
EPISTOLA XV. AD EUMDEM.
Excellentissimae venerationis honore dignissimo HILDUINO domino vere sanctissimo Sennocae [Senonicae] plebis humillima devotio aeternae prosperitatis in Domino salutem.
Quia divina inspirante misericordia fastidiosae importunitatis nostrae clamoribus, mi domine, saepe compati dignati estis: idcirco etiamnum nimia compulsi 106.0873D| necessitate, vestrae celsitudinis aures inquietare praesumpsimus. Novimus etenim, reverentissime domine, quomodo prioribus petitionibus nostris benigne et misericorditer assistere dignati estis, quomodo etiam a nullis nostris meritis, et quod nunquam futurum sperabamus, alteram nobis electionem impetrare ac concedere studuistis. Sed quoniam peccatis nostris, ut credimus, exigentibus, vota et desideria, quibus sanctitatem vestram toties pulsare ausi sumus, plurimum impedita ad effectum pervenire 106.0874A| non meruerunt, idcirco et hac vice ad vos cau sas miseriae nostrae referre compulsi sumus. Fecimus, domine mi, et nunc secundam electionem, et invenimus hominemex nostris a puero nobis bene notum, genere et moribus non infamem, docilem aetate, huic officio congruum, litteratoriae professionis non usquequaque ignarum, divinae quoque scientiae non penitus expertem, quarumdam etiam aliarum artium portionem habentem Quem cum obtulissemus, nullatenus putantes rejiciendum, ipsis missis dominicis impedientibus, quod optavimus non meruimus adipisci. Propterea vestrae pietatis vestigiis animo provoluti flebiliter postulamus ut tandiu rem suspendere dignemini, quousque cum scripto homine ad vestram celsitudinem properantes, 106.0874B| ipsi vobis melius nostram pandamus memoriam. Etsi quidem ad hoc onus ferendum persona quam dicimus sufficere minusve poterit, dignationis vestrae judicio aut suscipiatur aut reprobetur. Dum amplius nec nos acquisitis occasionibus quidam sic crucient, nec a nobis abjectissimis vestra mansuetissima sublimitas diutius inquietetur. His itaque clementiae vestrae suggestis, atque utinam impetratis, oramus supernam misericordiam ut multimoda vos prosperitate valere concedat et aeternae beatitudinis gaudia consequi quandoque permittat.
Eximio domino et vere sanctissimo Hilduino sacris negotiis a Deo praelato Senonicae urbis abjecta [abjectae et humilis] humilis Ecclesiae perpetuam salutem.
EPISTOLA XVI. AD EGINHARDUM. 106.0874C|
Inclyto et omni nobilitate praeclaro EGINHARDO domino sanctissimo Senonicae Ecclesiae humillima devotio.
Praesumpsimus, mi domine, auribus clementiae vestrae necessitatis nostrae causas humiliter innotescere, ut per vestram pietatem de his celeriter mereamur consolationem recipere. Notum vobis esse credimus quod nobis indignissimis a domno imperatore concessum fuerat ut ex nobis ipsis electionem faciendi haberemus licentiam. Sed cum illum quem scitis elegissemus, et a serenitate domni imperatoris non pleniter fuisset receptus, permissum nobis iterum est ut alium, si potuissemus, ex nobis huic officio 106.0874D| congruum inveniremus. Sed cum esset inventus, ut credimus, in Dei et domni imperatoris servitio habilis, nescimus ob quam causam a missis dominicis non est plena benevolentia susceptus. Unde vestram oramus benignitatem ut ex nobis in adjutorium esse dignemini; quatenus ipsum de quo dicimus ad praesentiam domni imperatoris nos ipsi deducamus, et qualiter jusserit discutiatur, et probetur si nobis prodesse valeat, et in servitio Dei aptus esse possit, an minus. Optamus vos divinis semper muniri praesidiis, 106.0875A| et immortalitatis corona quandoque gloriari, piissime et reverentissime domine.
Sanctissimo et piissimo domino Eginhardo merito venerabili Senonicae urbis vilis et abjecta congregatio.
EPISTOLA XVII. AD JUDITH IMPERATRICEM.
Inclytae et omni nobilitate clarissimae JUDITH, gloriosae imperatrici, Senonicae Ecclesiae humillima devotio.
Praesumpsimus, mi domina, auribus clementiae vestrae necessitatis nostrae causas humiliter innotescere, ut per vestram pietatem de his celeriter mereamur consolationem recipere. Notum vobis esse credimus quod nobis indignissimis a domno imperatore concessum fuerit ut ex nobis ipsis electionem 106.0875B| faciendi haberemus licentiam. Sed cum illum quem scitis elegissemus, et a serenitate domni imperatoris non plene fuisset receptus, permissum nobis est iterum ut alium, si potuissemus, ex nobis huic officio congruum inveniremus. Sed cum esset inventus, ut credimus, in Dei et vestro servitio habilis, nescimus ob quam causam a missis dominicis non est plena benevolentia susceptus. Unde vestram oramus benignitatem ut ex hoc nobis in adjutorium esse dignemini: quatenus causa suspendatur, donec ipsum de quo dicimus ad praesentiam domni imperatoris et vestram nos ipsi deducamus, et qualiter jusseritis discutiatur, et probetur si nobis prodesse valeat, et in servitio vestro aptus esse possit, an minus. Optamus vos divinis semper muniri praesidiis, 106.0875C| et immortalitatis corona quandoque gloriari, piissima et serenissima domina.
Excellentissimae et omni nobilitate clarissimae Judith imperatrici plebis Senonicae humillima devotio.
EPISTOLA XVIII. AD HETTI ARCHIEPISCOPUM TREVIRENSEM.
Domino beatissimo et unicae dilectionis affectu colendo HETTI, suprema largiente providentia, Trevirorum Ecclesiae archiepiscopo, FROTHARIUS episcoporum extimus in Christo salutem.
Tanto ardore aestuo vestrae paternitatis sublimitatem intuendi atque affandi, ac si multorum jam temporum labantur volumina, quibus vestro aspectu vel vestris colloquiis perfrui nequiverim. Nam 106.0875D| et inde me usquequaque fateor anxiari, quod nuper mihi de palatio regredienti defuit facultas vobiscum loquendi. Unde et inexplebilibus desideriis ora dulcetudinis vestrae his in partibus citius invisere opto. Quapropter vestris litteris mihi significari expeto, quando huc pro legatione vobis injuncta venire, vel quando synodale concilium juxta modernam constitutionem debeatis convocare. De his ob id praecipue sollicitus maneo, quia et ipse secundum imperiale praeceptum ad providendas mansiones, in quibus legati suscipi debent, scilicet a Monte Jovis usque palatium Aquis ire debeo, et infra mensem Octobrem egrediens ante solemnitatem beati Andreae 106.0876A| domum regredi cupio. Sed si vos infra eumdem mensem has in partes proficisci cognovero, praesens adesse curabo, ut vestri famulator et adjutor in omnibus existens, a vobis rursus et in spiritalibus rebus congruum supplementum recipere merear. Nostri in omnibus reminiscentem vos in Christo bene opto valere.
EPISTOLA XIX. AD WIGARDUM ABBATEM INDENSEM.
FROTHARIUS, misericordia Dei episcopus, WIGHARDO merito et sanctitate venerabili abbati, et universae congregationi salutem.
De profectu atque utilitate vestra sollicitudinem et curam me assidue sciatis habere, et de his quae 106.0876B| nuper significastis, seu de clerici vestri ordinatione, quidquid rationabiliter et idonee possumus, adimplere velle. Caeterum peto ut vestro adminiculo tria carra vini de Bonna faciatis nobis perduci ad palatium Aquis, et quidquid iterum vobis de nostro servitio competit remandate. Valete in Domino semper.
EPISTOLA XX. AD AGLEMARUM ABBATEM.
FROTHARIUS, gratia Dei episcopus Tullensis Ecclesiae, AGLEMARO venerabili abbati perpetuam in Christo opto salutem.
Noverit me dilectio tua corporis incolumitate utcunque vigere, et pro sospitate cordis ac corporis tui supernae pietatis clementiam saepius flagitare. 106.0876C| Cupio enim te longaeva felicitate potiri, et post hujus vitae calcem supernae quietis charismate perenniter recreari. Caeterum sciat me fraternitas vestra in novis ecclesiae nostrae aedificiis vestro suffragio indigere. Unde peto ut nobis mittas ad decorandos parietes colores diversos, qui ad manum habentur, videlicet auri pigmentum, folium Indicum, minium, lazur, atque prusinum, et de vivo argento juxta facultatem. Haec nobis dirigito, et a nobis debitum servitium iterum exigito. Charitatis enim indissolubili nexu astricti vicissim nobis famulari, et fraterna obsequia redhibere compellimur. Valete in Domino semper.
Vestra dudum largissima a Deo data providentia 106.0876D| ovile sanctae Ecclesiae ita manibus meis commisit, ut irruentium luporum morsus contrairem, eosque pariter quanta voluissem virtute comprimerem atque necarem. Sed quia adhuc de eodem certamine tempus rationem reddendi non est, referam tamen interim vestrae industriae in nece luporum corporalium qualiter decertavi. Postquam enim illud episcopium mihi commendastis, interfeci in vestris forestibus lupos CCXL; interfeci dico, quia me jubente et ingeniante capti fuerunt. Explicit. Amen.
EPISTOLA XXI. AD HUGONEM.
FROTHARIUS gratia Dei humilis episcopus, nimiae 106.0877A| dilectionis affectu colendo HUGONIfamulo Christi devotissimo aeternam in Domino salutem.
Quia vos sanum ac sospitem fore per instantem vestrae celsitudinis nuntium cognoscere merui, summa quidem cordis alacritate gavisus sum. Felicitatem enim vobis corde et corpore inesse semper desidero, et id omnibus votis exposco. Sed inde minus gratulatus sum, quod tam cito vestrae dignitatis praesentia ad tempus privamur. Putabamus siquidem hactenus, atque desiderabamus, ut de tam pia celsaque progenie duae saltem lucernaenobis remanerent, quarum splendore et meritis nos et vicinos nostros illuminare, atque inmeliorare gauderemus. Caeterum ex hoc non modice contristor, quia nec adhuc vobis, prout debueram, servitium impendi, 106.0877B| nec modo, ut oportuerit, diversis curis ingruentibus, famulari sufficio. Nam ad horum itinerum incommoda, quae vel nunc egimus, vel acturi sumus, seu ad dona regalia, quae ad palatium dirigimus, pene quidquid ex optimis equis habuimus, distribuere compulsi sumus. Pauci qui remanent hucusque equabus progignendi causa inhaeserunt. Unde et nunc carnibus consumpti cum decore ad solita obsequia mancipari nequeunt. Proinde quia ad praesens talem non habuimus, qui ad subvectionem vestram dignus existeret, sciat vestra benevolentia quod, cum regressus, Deo adjuvante, de praedicto itinere fuero, talem praeparabo qui vel vobis has in partes repedanti, vel vestro misso sine rubore dari possit. Illud autem quod vestrae industriae charius et 106.0877C| ditius fuit, reliquias videlicet sancti Apri confessoris Christi, vobis dirigimus. Sancti Apri subsidium implorantes, ut huc cum incolumitate festine redeatis, et a nostra devotione digni servitii commoda capiatis. Valere vos in Christo feliciter optamus.
EPISTOLA XXII. AD ***.
FROTHARIUS, gratia Dei episcopus, reverentissimo ac tota devotione colendo illo venerabili abbati, et universae congregationi sub regimine vestro Deo militanti, in Domino opto salutem
Noverit dilectio vestra me corpore utcunque vigere, vestraeque salutis cupidum fore. Caeterum immensas vestrae dilectioni rependimus gratias, quia 106.0877D| fidelem virum et sacris artificiis idoneum nobis direxistis. Cujus quidem industria artis admodum placet, ejusque religionis dignitas grata spectantibus existit. Quem peracto obedientiae suae officio ad vos remittemus, ex illa rem, Domini annuente gratia, vestris conspectibus repraesentamus. Valeat vestra dignitas in Domino.
EPISTOLA XXIII. AD GERUNGUM SUMMUM SACRI PALATII OSTIARIUM.
Excellentissimo ac nobilissimo viro, celsoque honore dignissimo, GERUNGO, summo sacri palatii 106.0878A| ostiario, FROTHARIUS humilis episcopus, et omnis Tullensis Ecclesiae, canonicorum videlicet, monachorum, virginum caeterorumque fidelium caterva, aeternam in Christo optamus salutem.
Memores vestri in sacris orationibus sumus, et Deum coeli ac terrae pro sospitate corporis et animae vestrae saepius deprecamur, scilicet ut vos et in hac vita ad profectum nostrum aliorumque fidelium diutius conservet incolumem, et post obitum vitae aeternae tribuat feliciter esse participem. Caeterum, noverit celsitudo vestra me oratorem vestrum multis necessitatibus urgeri, quibus compellor ad praesentiam domni imperatoris venire, ejusque pedibus suppliciter provolvi: quatenus ejus misericordia per vestrum adjutorium, et de ingruentibus modo necessitatibus 106.0878B| solatium. Quapropter deprecor magnitudinem clementiae vestrae ut mihi secrete per vestras litteras, vel per praesentem missum nostrum remandare dignemini, quo tempore venire possim ad vos, et per vestrum consilium atque auxilium illi necessitates meas valeam significare. Valere vos opto in Christo.
EPISTOLA XXIV. AD EUMDEM.
Nobilissimo viro, et cum omni honore nominando, GERUNGO, FROTHARIUS gratia Dei episcopus aeternam in Domino salutem.
Semper vestri in sacris orationibus memores sumus, petentes ut vobis longae vitae sanitas in hostem praedonetur, et post aeterna requies tribuatur. 106.0878C| Sciatis igitur quod, postquam nuper vobiscum in palatio locutus sum, missas C et psalteria L pro vestra salute decantari fecerimus. Vos autem precamur ut more solito mei memores sitis, et si in partes Hispaniae propter custodiam et sollicitudinem me senior noster isto hieme futuro destinare voluerit, vos ab illo servitio excusare me dignemini. Nostis enim quia ipse domnus imperator sequenti anno locum nostrum vult visitare, et tunc illi servire non potero sicut cupio, nisi a praedicto servitio per vos fuero absolutus. Vale multum in Domino.
EPISTOLA XXV. HETTI AD FROTHARIUM. 106.0876|
In nomine Domini nostri Jesu Christi, HETTI misericordia Dei archiepiscopus dioeceseos Trevirensis, 106.0878D| nec non et legatus Ludovico serenissimo imperatori, venerabili fratri FROTHARIO Tullensi episcopo aeternam salutem.
Notum sit tibi quia terribile imperium ad nos pervenit domni imperatoris, ut omnibus notum faceremus qui in nostra legatione manere videntur, quatenus universi se praeparent, qualiter proficisci valeant ad bellum in Italiam, quoniam insidiante Satana Bernardus rexdisponit rebellare illi. Propterea tibi mandamus atque praecipimus de verbo domni imperatoris ut solerti sagacitate studeas cum 106.0879A| summa festinatione omnibus abbatibus, abbatissis, comitibus vassis dominicis, vel cuncto populo parochiae tuae, quibus convenit militiam regiae potestati exhibere, quatenus omnes praeparati sint: ut si vespere eis annuntiatum fuerit, mane; et si mane, vesperi, absque ulla tarditate proficiscantur in partes Italiae, quia domnus imperator suum iter praeparat, ut quanto citius poterit in partes illas una cum fidelibus suis pergat.
EPISTOLA XXVI. FROTHARII AD TEUTDERICUM.
FROTHARIUS, gratia Dei Ecclesiae Tullensis antistes, TEUTDERICOet RAGENARDO venerabilibus viris, cum universo grege vobis commisso, perpetuae beatitudinis in Domino opto salutem.
106.0879B| Quoties vestrae dignitatis personam cum his qui vobis sub nostro regimine subditi sunt, bene ac salubriter vigere cognosco, divinae pietati uberrimas gratias refero. Quoties vero vel vos ac plebem vestram ad dioecesim nostram pertinentem utcunque infirmari vel periclitari audio, ingenti moerore ac doloris anxietate afficior, et veluti pro filiis charissimis atque ovibus propriis undique contristor. Quod his diebus fateor accidisse, cum scilicet mortiferam pestem acerrime grassatam me contigit agnovisse. Siquidem significatum mihi est, devastatione luporum quosdam vestrorum hominum superatos, et ruinis subitis funditus ab hac vita esse exstinctos. Quam quidem plagam per fraudem diabolicam, divino judicio permittente, in omnibus factam esse non ambigo. 106.0879C| Siquidem peccatis nostris exigentibus multi adversa, permittente Deo, patimur, quae minime nobis acciderent, si ei ut dignum fuerat tota mente quotidie famularemur. Quod enim cum gravi gemitu dicendum est, abundat iniquitas, refrigescit charitas multorum. Ob hoc tot plagas coelesti censura disponente ingruentes, tot adversitates daemonicae instigationis miseria nostra tolerat generi humano infestas. Siquidem cum his praeteritis annis inopiam famis multimodam ob ariditatem segetum vel grandinis irruptionem, perpessi fuerimus; praesenti anno fertilitatem messium atque ubertatem vinearum murium devastatione consumptam conspicimus. Ad extremum, quod cum luctu dicendum est, luporum rabida infestatione animas hominum Christianas 106.0879D| subito necari videmus. Quae facta cur nostrae praesentiae non antea significaveritis, usquequaque miror. Venissem quippe ad vos, et tam per verbi praedicationem, quam per manus impositionem ac confirmationem, pectora fluctuantium hominum corroborare satagerem; quod, quia adhuc non in proximis diebus, si vita comes fuerit, acturus sum. Nunc autem moneo ut praecipiatis omnes presbyteros in illis locis commanentes ad vestra monasteria pariter convenire, et per triduum jejuniis et letaniis insistere, 106.0880A| cilicio et sacco obvolvi, cinere conspergi, et communi supplicatione Domini clementiam obnixe deprecari: ut ejus exuberans misericordia non secundum merita nos dijudicet, nec secundum iniquitatum nostrarum scelera ultionem ex nobis capiat; quin potius propitiatus exspectet, et ad poenitentiam recurrentes misericorditer suscipere dignetur. Omnem itaque populum ad confessionem et poenitudinem pro peccatis suis sacerdotes provocent, et quae ignoranter a plebe commissa sunt digna emendatione solvantur: ne subito nos exitialis morbus absumat, et inferni voracitas perenniter cruciandos absorbeat. Et si mens nostra charitatis amore Dei conspectibus renuit famulari, saltem mortis formidine a malis retracta in salutiferis actibus convalescat.
EPISTOLA XXVII. JEREMIAE AD FROTHARIUM. 106.0880B|
Jeremias Christi famulus, etc. Reliqua vide Patrologiae tomo CV, col. 733, inter Jeremiae Opera.
EPISTOLA XXVIII. HETTI AD FROTHARIUM. 106.0880|
HETTI, gratia Dei archiepiscopus, venerabili in Christo et cum summa reverentia nominando FROTHARIO episcopo Tullensi saluberrimam implorat in Domino salutem.
Meminisse volumus sagacitatem vestram monitionis quam instanti anno simillimis apicibus suscepistis expressam. Non nescitis enim cum qua cautela hoc mandatum suscepimus domni imperatoris, nos in dioecesi nostra, et episcopi singuli in parochiis 106.0880C| suis, id est de regula augendae religionis, et dein ministratoriis canonicorum officinis: ut si quibus in locis bene comptae essent, deinceps cum summa diligentia ornarentur. Nunc autem in proximo est placitum, quo sine dubio sciscitabitur de obtemperatione mandati sui Dominus mandati. Quapropter scrutemini diligenter in parochia vestra, in vestris aliorumque monasteriis, si praefata regula digne per omnia conservetur. Et si officinae juxta ipsius decreta constructae atque innovatae contineantur: ut cum imperiali solertiae praesentabimur, dejecta procul molimenta aliorum una nobiscum ex omnibus illi a nobis veritas nuntietur. Per triennium enim haec monitio facta est. Idcirco nulla potest inveniri occasio. Ideoque quanto cuique fuerit imperfectior, tanto et 106.0880D| fragilior. Valete in Domino, et parvitatis nostrae nolite oblivisci. Deus pacis et dilectionis sit vobiscum. Amen.
EPISTOLA XXIX. LINGONENSIS EPISCOPUS AD FROTHARIUM. 106.0880|
Reverentissimo ac desiderantissimo domino Patri ac fratri FROTHARIO Ecclesiae Tullonensis episcopo permissione atque ordinatione divina Lingonensis episcopus sempiternam in Domino Jesu Christo opto salutem.
106.0881A| Necessarium et consequens esse putamus de his quibus nos dispensatio divina praeesse voluit, debitam semper curam et sollicitudinem gerere: ut illa scilicet quae illis necessaria et utilia esse videntur, nostris valeant vel precibus vel obsequiis adipisci. Unde et clericum nostrum Bertigango nomine dignationi ac devotioni vestrae direximus: ut, sicut vobis moris et consuetudinis est, ad officium sacerdotii ordinare eum non dedignemini. Imo quia sic de humanitate ac benignitate vestra confidimus, dignamini tamen libenter audire. Et si vos in aliquo impedit, ut eum ordinare non conveniat, opuscula vestra nobis libertatem concedat, ut eum ordinare licentiam habeamus. Nos autem, sive quod ad Deum pertinet famulatu, sive omnibus officiis, quibus tam 106.0881B| sublimis persona honorari debet, promptos semper ac devotissimos nullatenus dubitetis. Optime semper in Domino valeatis, reverentissime ac desiderantissime Pater, domine et frater.
EPISTOLA XXX. ALBERICUS AD FROTHARIUM. 106.0881|
Unicae dilectionis affectu colendo domino, Patri et coepiscopo, FROTHARIO ALBERICUS indignus et inutilis nomine tenus tantum episcopus imprecatur felicitatem.
Si secundo in omnibus utimini eventu, estis ut jugi optamus voto. De caetero, innotescimus dilectioni vestrae quia quemdam vicum habemus in vestra parochia, qui dicitur Bosonis monasterium. Sed nunc et nomen pariter cum privilegio ac censu 106.0881C| perdit, propter Teuderici scilicet a vobis dedicatas novas capellas. Unde tuam fraternam deprecor dilectionem ut secundum sinceritatem episcopalem ac 106.0882A| ecclesiasticam sanctionem agatis, ne propter novellas capellas antiquissima quod per tot annos tenuit perdat Ecclesia, et mihi non sit necesse pro hoc episcopalem pulsare conventum, quia vos non absque culpa, et ego reus esse potero, si per nos amittit quod semper tenuit. Sed de hoc quidquid decernit vestra paternitas, nobis recipite per harum gerulum litterarum. Opto vestram sanctitatem a Domino gubernari, mei meminisse.
EPISTOLA XXXI. FROTHARIUS AD HITTONEM. 106.0882|
Reverentissimo ac tota dilectione colendo HITTONI gratia Dei episcopo, FROTHARIUS humilis Tullensis episcopus aeternam opto salutem.
Vestrae paternitatis statum feliciter ubique vigere, 106.0882B| et in omnibus prospere agere desideramus. Quamobrem et divinam saepius clementiam omni intentione imploramus, omni prece deposcimus, toto nisu, toto animo obsecramus, ut vestrae bonae devotionis profectum semper adaugeat, vestrae remunerationis fructu salubriter reservato. In labentis temporis cursu cum multa vos sospitate diutius conservet, ut et hic multorum orneris gloria filiorum, et in coelis plurimorum socieris contubernio sanctorum. Vos quoque vestroque regimini subditos obsecramus fideles, ut nostri reminiscentes in sacris orationibus vicem rependant, nostramque fragilitatem orando munire atque tueri non desinant. His ita omissis, vestrae dilectioni innotescimus nuntiatum nobis esse quod inter vos et Bertarium fidelem vassallum nostrum quaedam contentio sit oborta, 106.0882C| pro eo quod illius servus vestram ancillam furto subductam aliquandiu celaverit, et in sua potestate retinuerit. Caetera desiderantur.