Migne Patrologia Latina Tomus 11
Valeri.EpiNun2 11 Valeriusfl. 656 Parisiis J. P. Migne 1845 early modern edition, no apparatus this file was encoded in TEI xml for the University of Zurich's Corpus Corporum project (www.mlat.uzh.ch) by Ph. Roelli in 2013 Classical Latin orthography latin
Epistola nuncupatoria
Cum mense Aprili superiore, Beatissime Pater, de more institutoque veterum Romanorum Pontificum primo sui Pontificatus anno Sanctitas Vestra cereos Agnos Dei consecraret, quorum veluti divinae clementiae instrumentorum mirifica virtus in incendiis, eluvionibus ac tempestatibus saepenumero mortalibus spectata est, ac sacrum cardinalium collegium pro sua in hunc ordinem benevolentia, et charitate tridui spatio convivio exciperet, memini S. Zenonis Veronae episcopi et martyris a Sanctitate Vestra mentionem factam postremo convivii die, quo sum ipse vocatus: convertens enim post sacram lectionem, et post gravissimos in mensa sermones habitos in me oculos, Cras, inquit, celebrabitur festus dies S. Zenonis episcopi et martyris, qui inter procellas persecutionum Veronensem Ecclesiam mira constantia gubernavit, et Gallieni tempore martyrio coronatus est; atque hanc commemorationem sermonum, qui ab eodem sanctissimo episcopo scripti sunt, mentio subsecuta est. Cum verba Vicarii Christi in animo infixa essent meo, commemorationem S. Zenonis, cui post multos annos in hac administratione, quamvis indignus successi, tacitam vehementemque cohortationem putavissem, cumque ideo Veronam permissu Beatitudinis Vestrae rediissem alacrior et ardentior, multo quam umquam antea, ad munera pastoralia obeunda; in synodo dioecesana primum clerum universum sum hortatus, ut Patronum hujus civitatis exemplar recte christiani gregis gubernandi, ac magistrum optimum et religiosius veneraretur, et studiosius moribus atque vita imitaretur: deinde quod sermones S. Zenonis, qui typis impressi ante annos complures editi fuerant, essent valde mendosi, nec jam ulla fere amplius eorum extarent volumina, ne clerus Veronensis caeterique viri docti et pii utili lectione antiquissimi et sanctissimi scriptoris privarentur, decrevi, ut iterum multo accuratius imprimerentur. Accessit ardor quorumdam presbyterorum Veronensium, quibus nec ingenium in illustranda Ecclesia Veronensi deest, nec studium. Itaque mecum a multis viris doctis recogniti, emendati et expurgati meo jussu typis commissi sunt. Celebris quidem est, Sanctissime Pater, multis, praeclarisque naturae muneribus Verona, coeli temperie, collium, Athesisque interfluentis amoenitate, magnitudine, antiquitate urbis, ingeniorumque praestantia. Floret artis operibus ad ornatum, et defensionem, arcubus, pontibus, amphiteatro, sacrisque templis: verum multo florentior est atque munitior numero Sanctorum, atque reliquiis, episcoporum praesertim, qui eam sapientissime sanctissimeque rexerunt: quorum primus Euprepius a S. Petro apostolorum principe Christique Vicario Veronam missus, quinque et triginta successores habuit sanctos episcopos: quorum memoria tum in libro de sanctis episcopis Veronensibus, tum in aliquot templis, tum in aula episcopii, loco illustri pictis imaginibus ac nominibus subscriptis diligenter conservatur: tum etiam in divinis officiis ex synodorum dioecesanarum decretis, et veteri instituto. religiosissime colitur. Eorumdem tutelae urbs haec refert acceptum hoc maximum beneficium, quod per tot saeculorum cursus, inter tot haeresum fluctus fidem catholicam integerrimam constantissime retinuerit: ac proinde isti sanctae Sedi Apostolicae Romanae suae, omniumque fidelium Christianorum matri, unde norma recte credendi, recteque vivendi petenda est, summa cum veneratione paruerit. Inter hos episcopos B. Zeno martyr ordine octavus est: qui vix dum migrarat in coelum, cum eum civitas Veronensis sibi patronum adscivit, et ut talem perpetuo coluit, quod ejus patrocinium saepissime in suis calamitatibus experta est. Et piorum hominum sententia aequum fuerat, ut cum Sixti II Papae temporibus et vixerit, et scripserit Zeno, et ejus scripta pene mortua altero Sixto V Ecclesiam universam moderante feliciter reviviscerent, et quem auctorem atque hortatorem tacitum suae editionis habuerant, eumdem patronum disertum et vindicem haberent. Denique ut opuscula Veronensis Ecclesiae episcopi Zenonis Veronae episcopus illustrare, ita cardinalis ad Romanum pontificem, quem sacerdotem magnum, principem episcoporum, haeredem apostolorum, potestate Petrum, unctione Christum (ut Sancti Bernardi verbis utamur) sacrum Cardinalium Collegium, et universa Christiana respublica agnoscit et veneratur, et Augustinus Cardinalis Veronae ad Sixtum V quem summa veneratione prosequitur, et a quo multis honoribus et magnis beneficiis est affectus, ea mittere debuit. Non dubito quin pastoralem hunc laborem meum, quamvis minimum, aestivis caloribus susceptum, probatura sit Sanctitas Vestra: et ex episcopi, martyrisque scriptis magnam sit captura voluptatem. Interim Deus auctor bonorum omnium et largitor Beatitudinem Vestram, Sanctissime Pater, donis suis magis in dies, ut facit, locupletet: et collegio nostro universaeque Ecclesiae incolumem diutissime servet, ut justitia, pax, istius sanctae sedis auctoritas, omnes virtutes in dies magis vigeant atque florescant.