Migne Patrologia Latina Tomus 115
Epistola ad quemdam episcopum
Epistola ad quemdam episcopum (Prudentius Trecensis), J. P. Migne 115.1367C
Epistola ad quemdam episcopum
115.1367B| Domino mihi in dominorum Domino desiderabiliter venerando ill. merito sacerdotali paternoque culmine insignito, PRUDENTIUS famulorum Christi humillimus, sempiternam in omnium Salvatore salutem.
Quantum, mi fratrum charissime, litterae tuae perdesiderabilis mihi germanitatis textus meam diu insatiabiliterque collectam sitim aestumque dulcedo recreaverit, quantumque jucundissimae oblectationis invexerit, fideliter fateor dici nequit: quippe cum tot tantisque perturbationum fluctibus pene irrevocabiliter obrutus, ne sibilo quidem, ut dicitur, tui quidquam haurire valuerim, utrum te super ad Dominum jam redisse contingeret, cum repente vix tandem a palatinis excubiis, quibus diu inservire 115.1367C| coactus fueram, absolutus, latorem quam desiderabilium mihi apicum . . . vestrae Trecas, cui me divina gratia, non autem ulla meritorum meorum plenitudo praeesse dignata est, offendi. Et audito, quod exstinctum metuebam, alterius mei nomine, explosis, gaudio superante, soporibus, desperatione potius quam oblivione contractis, respiravi; et supernae bonitati, quae inter adversa et prospera suos servare consuevit gratulatus, litterarum insatiabili atque multoties iterata recursione inhaerens illic 115.1368B| meum ill. germanum unanimem, imo me alterum quaeritans, tandem reperisse me plurimum gaudeo: quoniam qui ipso mihi auditu exstinctus videbatur, subito vivens apparuit; et quem abisse autumabam superesse non ambigo. Agens itaque auctori bono rum omnium gratias, indefesse hoc uno inexplebiliter bono afficior, quo te non tam vivere quam bene vivere audio, audiens gratulor, gratulans desidero desiderans postulo; et ut ipse convivere merear tuis [piis] precibus opto ac meritis, quibus me ab omnibus propositum votumque Christianae militiae infatigabiliter oppugnantibus innutabiliter relevari confido. Age nunc, fratrum dulcissime, et duce omnium ordinantis, omnia serenantis gratia, me meaeque discretioni commissos sanctissimae instantissimaeque 115.1368C| intercessionis ope fulcire non desinas: quos plurimum vivere si xenia propriae adinventionis vel ligatae, vel solutae crebro visitans, mittenda imperans, desiderantibus miseris. Bene te semperque in Domino valentem, nosque importunarum clavo supplicationum ad portum optati littoris revehentem virtus omnipotentis brachii conservare dignetur.
Quot voces oculis, lingua, audituque manuque Hausisti, totidem laetificere bonis.