Migne Patrologia Latina Tomus 137
Epistola ad Wulfsinum Schireburnensem
Epistola ad Wulfsinum Schireburnensem (Dunstanus Cantuariensis), J. P. Migne 137.0474C
Epistola ad Wulfsinum Schireburnensem
137.0473C| D. Dei [gratia] archiepiscopus fideli amico WULFSINO episcopo aeternae sospitatis et pacis in Domino Dei salutem.
Gratias agamus Deo, qui nos indignos et ultimos servorum suorum praeordinavit ad regimen suae sanctae Ecclesiae in tam periculosis et laboriosissimis temporibus. Et nunc in commune deprecemur omnipotentis Dei clementiam ut ille nos adjuvet in omni opere bono. Et tu, charissime frater, viriliter fac, et fortiter opus Domini quod habes in manibus, perfice ad mercedem animae nostrae et ad salutem multarum animarum. Non cesset lingua tua in praedicando, non pes tuus circumeundo gregem tibi commissum; non manus tua a laborando, ut eleemosynae fiant per te, ut sanctae Dei ubique exaltetur 137.0473D| Ecclesia. Esto forma salutis omnium, in te sit exemplum conversationis sanctissimae, in te sit solatium miserorum, in te confortatio dubitantium, in te disciplinae rigor, in te veritatis fiducia, in te totius bonitatis spes. Non te saeculi pompa exaltet, non ciborum luxus enervet, non vestimentorum vanitas emolliat, non adulantium lingua decipiat, non detrahentium adversitas conturbet, non tristia frangant, non laeta elevent. Non sis arundo vento agitata, non flos aurae tempestatis decidens, non paries ruinosa, non domus super arenam posita, sed templum esto Dei vivi super firmam petram constructum, cujus ipse sit Spiritus paraclitus inhabitator. 137.0474C| Mitem te et humilem ad meliores ostende, durum et rigidum ad superbos, omnia omnibus factus, ut omnes lucrari possis; habeas in manibus tuis mel et absinthium, quidquid cui placeat edat ex illis: cui de pia praedicatione vesci libeat, accipiat mel; qui dura invectione indigeat, bibat ex absinthio, ita tamen ut liceat ei mel veniae sperare, si rosea confessio poenitentiae praecedat: omnia vestra honesta cum ordine fiant. Tempus statuatur lectioni, et oratio suas habeat horas, et missarum solemnia proprio tempore conveniant. Qui diem sapit, Domino sapiat. Sit modesta in conviviis laetitia, sit casta in jejuniis perceptio: lavetur poenitentia facies, ungatur oleo misericordiae caput, ut omnia acceptabilia fiant Domino Deo, qui te elegit 137.0474D| sibi sacerdotem. Ducem admone et omnes saeculares principes, ut pietatem et misericordiam in judiciis conservent, munditiam cordis et corporis semper diligant, quia beati mundo corde, quoniam ipsi Deum videbunt. Ecclesiam Christi defendant, ut eorum adjutor ac defensor fiat Dominus Ecclesiae. Viduis et pupillis misericordes, ut illorum misereatur Deus; et in omnes homines mites et benigni, populum Dei congregantes et non dispergentes, pacem inter se habentes, quia beati pacifici, quoniam filii Dei vocabuntur. Et tu, charissime frater, ante oculos cordis semper habeto timorem Dei et amorem, et liber Pastoralis beati Gregorii 137.0475A| Patris ubi Dei rectorum subjectorumque vita diligentius discernitur, saepius ante te legatur, et nostri memoriam nominis habeto in tuis sanctis orationibus, ut Dei omnipotentis misericordia nos defendat, regat atque custodiat, sicut vos velle credo, ut in dilectione Dei et voluntate cursum agamus vitae 137.0476A| nostrae. Et superfluum non aestimes, nec arrogantiae, ut vos admonerem; sed intimo charitatis affectu suscipite, quia urbs firma frater qui a fratre juvatur. Te Deus omnipotens salvum conservet in aevum.