Migne Patrologia Latina Tomus 41
AnaBib.EpAdLa 41 Anastasius bibliothecarius-879 Parisiis J. P. Migne 1841 early modern edition, no apparatus this file was encoded in TEI xml for the University of Zurich's Corpus Corporum project (www.mlat.uzh.ch) by Ph. Roelli in 2013 Classical Latin orthography latin
Epistola ad Landuleum
LANDULEO egregio et Deo digno episcopo Capuano, ANASTASIUS exiguus Apostolicae bibliothecarius, in Domino salutem.
1. Quia sancta Ecclesia, cui Venerabilitas tua praeesse decenter agnoscitur, beati Stephani reliquiis et memoria celebris et insignis habetur, ac per hoc magno erga ejus reverentiam Sanctitas tua flagrat affectu; ratum duxi, penes Mantuanam urbem Sedis apostolicae legationis apud Augustos explenda causa degens, Translationem ipsius sacri corporis graece conscriptam, ac ex improviso delatam, latineque nusquam a me ante prorsus inventam, romano dare sermoni, tuaeque piae destinare devotioni: quatenus per hoc et otiositatis a me rancor excluderetur, et latinitas tantorum miraculorum cognitione minime fraudaretur. Accidit autem, ut etiam super hoc a praefatae urbis incolis obnixe rogarer, eo quod illic hujus martyris habeatur templum, honesta qualitate constructum.
2. Suscipe itaque hoc opusculum, et mira quae primus Christi Domini Martyr atque Diaconus post transitum gessit, quaeque forte hactenus ignorasti, comperiens, laudes auctori dignas repende: diemque anniversarium, mei quoque non immemor, in hujus mirabilis translationis celebrationem solemniter age. Sed quoniam tunc temporis ibidem positus sermonem nihilominus quem de virginitate super Anna et Simeone, imo quem de tribus professionibus Amphilochius Iconii praesul habuerat, interpretatus sum, et hunc quoque cum memorato simul opusculo Sanctimoniae tuae mittere procuravi. Spirituali quippe nil fere commodius duxi, quam spiritualia offerenda. Beatitudo tua in aeternum valeat mei memor, impetrantibus Dei sedes orationibus suis.