Migne Patrologia Latina Tomus 132
Epistola ad Adelstanum regem
Epistola ad Adelstanum regem (Radbodus Dolensis), J. P. Migne 132.0720D
Epistola ad Adelstanum regem
132.0719D| Summae et individuae Trinitatis honore omniumque sanctorum praecellentissima intercessione glorioso et munifico regi ADELSTANO Samsonis summi pontificis ego RADBODUS praepositus istius saeculi gloriam et aeterni beatitudinem
132.0720D| Benignitatis ac sublimitatis vestrae piissimae et in omnibus hujus temporis regibus terrenis famosa laude praecellentissimae, rex Adelstane optime, noverit pietas manente adhuc stabilitate nostrae regionis, quod pater vester Edgvardus per litteras se commendavit 132.0721A| consortio fraternitatis sancti Samsonis summi confessoris ac Joviniani archiepiscopi senioris ac consobrini mei ac clericorum ejus, unde usque hodie indefessas regi Christo pro ejus anima et pro salute vestra fundimus preces, et die noctuque videntes super nos magnam misericordiam apparere vestram, in psalmis et missis orationibusque nostris, quasi provolutus ego et duodecim canonici mei genibus vestris fuissemus, promittimus Deum clementem orare pro vobis. Et modo reliquias, quas omni terrena substantia vobis scimus esse chariores, transmitto vobis, id est, ossa sancti Senatoris et sancti Paterni, atque sancti Soubilionis ejusdem sancti Paterni magistri, qui similiter uno die eademque hora cum supradicto Paterno migravit ad Christum. Isti 132.0722A| certissime duo sancti cum sancto Paterno dextra laevaque jacuerunt in sepulcro, atque illorum solemnitates sicut et Paterni IX Kalend. Octobris celebrantur. Igitur, rex gloriose, sanctae exaltator Ecclesiae, gentilitatis humiliator pravae, regni tui speculum, totius bonitatis exemplum, dissipator hostium, pater clericorum, adjutor egentium, amator omnium sanctorum, invocator angelorum, deprecamur atque humiliter imploramus qui in exsultatu [ejulatu] atque captivitate nostris meritis atque peccatis in Francia commoramur; ut non nostri obliviscatur vestrae felicissimae largitatis magna misericordia, et nunc a modo quae mihi dignemini commendari sine ulla mora potestis impetrare.