Migne Patrologia Latina Tomus 123
Elogia
Elogia (Auctores varii), J. P. Migne 123.0143B
123.0143B| Gregorius papa ad Eulogium, episcopum Alexandrinum, epist. 29, lib. VII, ind. 1.
Nos pene omnium martyrum, distinctis per dies singulos passionibus, collecta in uno codice nomina habemus, atque quotidianis diebus in eorum veneratione Missarum solemnia agimus: non tamen in eodem volumine, quis qualiter sit passus, indicatur; sed tantummodo locus et dies passionis ponitur. Unde fit ut multi ex diversis terris atque provinciis per dies (ut praedixi) singulos cognoscantur martyrio coronati. Se haec habere vos beatissimos credimus.
Baronius in prolegomenis ad Martyrologium Romanum, cap. 8.
Hoc ipsum simplex absque alio additamento Romanum Martyrologium, idemque perbreve, in quo tantum nomina martyrum, locus, ac dies passionis positi haberentur, est illud ipsum cujus meminit Ado.
123.0144B| Ado Viennensis archiepisc. in praefatione Martyrologii sui.
Huic operi, ut dies martyrum verissime notarentur qui confusi in Kalendis satis inveniri solent, adjuvit venerabile et perantiquum Martyrologium ab urbe Roma Aquileiam cuidam sancto episcopo a pontifice Romano directum, et mihi postmodum a quodam religioso fratre aliquot diebus praestitum; quod ego diligente cura transcriptum, positus apud Ravennam, in capite hujus operis ponendum putavi.
Baronius ubi supra.
Porro in omnibus quae viderim Martyrologiis Adonis impressis, illud ipsum Roma acceptum desideratur. Egregiam certe, ac viris eruditis dignam optatamque navasset operam Mosander, si ejusmodi illustre vetustatis monumentum, quod in suo manuscripto Adone haberi testatur, una cum ipso Martyrologio Adonis, quod post Surium ad septimum tomum Vitarum sanctorum adjecit, edidisset.