Easy Latin Plays/Gemini

by Maria Letitia Newman

Maria Letitia Newman

Easy Latin Plays

Gemini

1913

editio: G. Bell & Sons
fons: librum vide

 Mater Gracchorum

GEMINI

DRAMATIS PERSONAE

Numitor.
Romulus.	gemini.
Remus.
Faustulus,	pastor.
Senex.
Ministri.
Pastores.

Scaena I. extra Numitōris domum.

(intrant dextrā Romulus et Faustulus; intrat sinistrā senex.)

Rom. salvē, senex!

sen. salvētē!

Rom. estne haec Numitōris domus?

sen. Numitōris est domus.

[exit dextra]

Rom. [Faustulum alloquēns] haec, pater, est Numitōris domus.

Faust. tu, domum, Rōmule, intrā. ego ibi tē exspectābō. heu miserum! multum doleō quod fīlius meus, Remus, captivus est.

[exit Rōmulus sinistrā, Faustulus dextrā.]

Scaena II. intrā Numitōris domum.

(Numitor sedet. ministrī circumstant.)

Num. ecce! quem dūcunt pastōrēs?

min. captīvum dūcunt catenīs vinctum?

[intrant pastōrēs Remum dūcentēs]

Num. hic homō, quis est?

pastor. hic ūnus est, domine, pastōrum Amūliī, quem captum ad tē addūcimus.

Num. cūr hunc ad mē addūcitis vinctum?

past. pastōrēs Amūliī nōbīs sunt inimīcī.

Num. quam est formōsus! [Remum alloquēns] venī, homō! volō tē aspicere, ō mē miserum! quantum est Rēae Sylviae similis, fīliae meae cārissimae, quam Amūlius necāvit!

[intrat Rōmulus]

min. quis inde venit?

Rom. salvē, ō domine!

Num. quis es tū, quī captīvī nostrī tam similis es?

Rom. Rōmulus appellor. hic est frāter meus, Remus.

Num. quid petis, Rōmule?

Rom. Remum petō, quī ā servīs tuīs hūc ductus est captīvus.

Num. unde vēnisti?

Rom. ab Aventīnō vēnimus, ubi Amūlī gregēs custōdīmus.

Num. quis vōbīs est pater?

Rom. Faustulus est pater noster, Amūliī pastor.

Num. [ministrum alloquēns] abī! Faustulum hūc addūc!

[exit minister]

Rom. iam ille apud portam exspectat.

[intrant minister et Faustulus]

min. hic, domine, est Faustulus.

Faust. salvē, ō domine!

Num. aspice hōs! suntne fīliī tuī?

Faust. per multōs annōs, domine, hōs ēducāmus et ego et uxor mea.

Num. quid tum? nōnne sunt vestrī fīliī?

Faust. nōn sunt nostrī fīliī, sed cum līberīs nostrīs hōs ēducāvimus.

Num. quid? unde sunt?

Faust. hōs diū abhinc in rīpā fluviī inventōs ad casam meam addūxī—tum parvulī erant.

Num. quid? in rīpā fluviī! parvulī!

Faust. ibi relictī erant.

Num. tibi magnā dabō praemia et uxōrī tuae. venīte hūc, Rōmule et Reme! audīte omnēs! frāter meus, Amūlius, homō improbus, ōlim rēgnum meum occupāvit, fīlium meum necāvit et fīliam Rēam Sylviam, et līberōs eius parvulōs in fluvium praecipitāvit. ecce, Rōmulus et Remus, fīliae meae līberī, ā Faustulō servātī!

ministri et pastores. salvētē, ō dominī!

Rom. et Rem. nōs Amūlium superābimus et Numitor rursus erit rēx.

 Mater Gracchorum