Dum transirem Danubium
Dubitando fluvium,
Propter magisterium
Faciens diffugium,
Fugiendo studium,
Studens foro navium;
Vidi quasdam ludere,
Ludum coepi cernere,
Cernens illuc tendere,
Tendens magis Venere,
Venerem per propere,
Propero concurrere.
Quaedam pulchra femina
Praesignabat carmina,
Manu ducens agmina
Per compagum fragmina;
Ad quam torquens lumina
Sic precabar numina:
O Deorum spiritus,
Qui spiratis coelitus,
Quibus est divinitus
Amor carnis creditus,
Visus iste subitus
Per vos fiat cognitus!
Tunc accedens propius,
Ardeo miserius,
Cremor infelicius,
Uror vehementius;
Quanto canit pulchrius,
Tanto mihi peius.
Tam dilecta lectio
Quo legatur nescio;
Ex hoc participio
Declinare cupio;
Sine magisterio
Scitur haec conjunctio.
Dum transirem Danubium
Dum transirem Danubium
Rithmus jocularis
XII saeculum p.Ch.n.
editio: ex Carmina leodiensia
fons: incognitus