AucInc.DeDeLiR 19 Auctor incertus Parisiis J. P. Migne 1846 early modern edition, no apparatus this file was encoded in TEI xml for the University of Zurich's Corpus Corporum project (www.mlat.uzh.ch) by Ph. Roelli in 2013 Classical Latin orthography latin
MONITUM.
Ex Prolegomenis num. 150 seqq. constat, in quot ac quales difficultates historici, aliique viri critici incurrerint ob Sedulii elogium, quod in decreto de libris recipiendis et non recipiendis legitur. Dignum sane est venerandum hoc antiquitatis ecclesiasticae monumentum, quod a docto aliquo viro commentario peculiari illustretur. Quantum quidem in me est, curabo ut illud hic exhibeam ad plura exemplaria mss. recognitum et emendatum. Chiffletius illud edidit in notis ad opusculum 3 Vigilii Tapsensis, Fontaninus in Append. Antiquit. Hortae pag. 317, Blanchinus in Prolegomenis ad tom. IV Anastasii opusc. 3, et Mansius in Supplem. Conciliorum. Majoribus copiis ego instructus, nec minus opportuno loco plura in eamdem rem conferam, eo etiam consilio ductus, ut aliqua ex parte, si possim, amicorum meorum conatus adjuvem, qui Bononiae operam historiae ecclesiasticae concinnandae non perfunctorie navant. Tres autem partes statuam: in hac prima Concilium Romanum, Damaso pontifice celebratum, ex codice ms. Vaticano describo; in altera Decretum Gelasianum (a quibusdam S. Damaso attributum) ad vetera exemplaria recensebo; in ultima ex antiquis membranis Vaticanae bibliothecae periphrasin quamdam ejusdem Decreti nondum vulgatam expromam.
PARS PRIMA. Concilium urbis Romae sub Damaso papa celebratum. De explanatione fidei catholicae. Dictum est, prius agendum de Spiritu septiformi, qui in Christo requiescit, Spiritus sapientiae: Christus Dei virtus, et Dei sapientia (I Cor. I, 24). Spiritus intellectus: Intellectum tibi dabo, et instruam te in via hac, qua gradieris (Psal. XXXI, 8). Spiritus consilii: Et vocabitur magni consilii angelus (Isai. IX, 6). Spiritus virtutis, ut supra dictum est: Christus Dei virtus, et Dei sapientia. Spiritus scientiae propter eminentiam scientiae Jesu Christi, ut ait Apostolus. Spiritus veritatis: Et ego vita, et veritas (Joan. XIV, 6). Spiritus timoris: Initium sapientiae timor Domini (Psal. 110, 6).
Multiformis autem nominum Christi dispensatio est. Dominus, quia Christus. Verbum, quia Filius Dei, quia unigenitus a Patre. Caro, quia natus ex Virgine. Pastor, quia custos ovium. Mons, quia fortis. Via, quia rectus per ipsum ingressus ad vitam. Agnus, quia passus. Lapis angularis, quia constructio. Magister, quia ostensor vitae. Sol, quia illuminator. Verus, quia a Patre. Vita, quia rector. Panis, quia caro. Samaritanus, quia custos, et misericors. Christus, quia unctus. Jesus, quia salvator. Deus, quia ex Deo est. Angelus, quia nuntius. Sponsus, quia mediator. Vitis, quia sanguine ipsius redempti sumus. Leo, quia rex. Petra, quia firmamentum. Fundamentum, quia firmamentum. Flos, quia electus. Propheta, quia futura revelat. Spiritus enim sanctus non est Patris tantummodo Spiritus, sed Patris, et Filii. Scriptum est enim: Si quis dilexerit mundum, non est Spiritus Patris in illo. Item scriptum est: Qui autem Spiritum Christi non habet, hic non est ejus. Nominato itaque Patre, et Filio, intelligitur Spiritus, de quo ipse Filius in Evangelio dicit: Spiritus, qui a Patre procedit: et ille de meo accipiet, et annuntiabit vobis.
Item dictum est: Nunc vero de Scripturis divinis agendum est, quid universalis catholica Ecclesia teneat, et quid vitari debeat.
Incipit ordo Veteris Testamenti. . . Genesis liber unus. Exodus liber unus. Leviticus liber unus. Numeri liber unus. Deuteronomium liber unus. Jesu Nave liber unus. Judicum liber unus. Ruth liber unus. Regum libri quatuor. Paralipomenon libri duo. Psalterium liber unus. Salomonis libri tres. Proverbiorum liber unus. Ecclesiastes liber unus. Cantica canticorum liber unus. Item Sapientiae liber unus. Ecclesiasticus liber unus. Incipit ordo prophetarum. Hieremiae liber unus. Esaiae liber unus. cum uno Baruch; item cum Lamentationibus suis. Ezechielis liber unus. Danielis liber unus. Joel liber unus. Abdiae liber unus. Oseae liber unus. Amos liber unus. Michaeas liber unus. Jonae liber unus. Nahum liber unus. Abbacuc liber unus. Sophoniae liber unus. Aggaei liber unus. Zachariae liber unus. Malachiae liber unus. Item ordo historiarum. Judith liber unus. Job liber unus. Tobiae liber unus. . Hester liber unus. Esdrae liber unus. Machabaeorum libri duo. Item ordo Scripturarum Novi Testamenti, quas sancta et catholica suscipit Ecclesia. Evangelium secundum Matthaeum liber unus. Secundum Marcum liber unus. Secundum Lucam liber unus. Secundum Joannem liber unus. Epistolae Pauli numero XIV. Item. Ad Hebraeos una. Ad Romanos una. Ad Corinthios duae. Ad Ephesios una. Ad Thessalonicenses duae. Ad Galatas una. Ad Philippenses una. Ad Collossenses una. Ad Timotheum duae. Ad Titum una. Ad Philemonem una. . Apocalypsis Joannis Apostoli liber unus. Actus Apostolorum liber unus. Item Epistolae Canonicae numero septem. Petri Apostoli Epistolae duae. Jacobi Apostoli Epistola una. Judae Zelotes. Joannis Apostoli Epist. una. Alterius Joannis presbyteri Epistolae duae. Epistola una. Post has omnes propheticas, et evangelicas, atque apostolicas, quas superius deprompsimus, Scripturas, quibus Ecclesia catholica per terrarum orbem a Deo fundata est, etiam intimandum putavimus, quod quamvis universae per orbem catholicae diffusae Ecclesiae quasi unus Christi thalamus sit, sancta tamen Romana Ecclesia a nonnullis synodicis constitutionibus caeteris ecclesiis praelata est: sed et evangelica voce Domini Salvatoris nostri primatum obtinuit: Tu es, inquit, Petrus, et super hanc petram aedificabo Ecclesiam meam, et portae inferi non praevalebunt adversus eam, et tibi dabo claves regni coelorum, et quodcumque ligaveris super terram, erit ligatum et in coelis: et quodcumque solveris super terram, erit solutum et in coelis. Addita est etiam societas beatissimi Pauli apostoli, vasis electionis, qui non diverso, sicut haeretici garriunt, sed uno tempore, uno eodemque die, gloriosa morte cum Petro in urbe Roma sub Caesare Nerone agonizans, coronatus est: et pariter supradictam Romanam Ecclesiam Christo Domino consecrarunt, aliisque omnibus in universo mundo sua praesentia atque venerando triumpho praetulerunt. Est ergo prima Petri apostoli sedes Romana Ecclesia, non habens maculam, neque rugam, nec aliquid hujusmodi. Secunda autem sedes apud Alexandriam Petri a Marco nomine ejus discipulo atque evangelista consecrata est; ipseque in Aegyptum directus a Petro apostolo, verbum veritatis praedicavit, et gloriosum martyrium consummavit. Tertia vero sedes apud Antiochiam beatissimi apostoli Petri habetur honorabilis, et quod illam primitus quam Romam veniret, habitavit, et illic primum nomen Christianorum novellae gentis exortum est. Finis.
PARS SECUNDA ET TERTIA. Decretum Gelasianum, ex mss. Vatianis, necnon Paraphrasis ejusdem decreti. (Haec inter opera Gelasii melius collocanda reservamus, ubi, si placet, legesis.)