Migne Patrologia Latina Tomus 19
De duodecim Caesaribus (Ausonius Burdigalensis), J. P. Migne
De duodecim Caesaribus
Ausonius Hesperio filio. S. D.(0865B)
CAESAREOS proceres, in quorum regna secundis
Consulibus dudum Romana potentia cessit,
Accipe bis senos, sua quemque monosticha signant,
Quorum per plenam seriem Suetonius olim
(0865C)Nomina, res gestas, vitamque obitumque peregit.
Monosticha de ordine XII imperatorum
Primus regalem patefecit JULIUS aulam
Caesar, et AUGUSTO nomen transcripsit, et arcem.
Privignus post hunc regnat NERO CLAUDIUS, a quo
CAESAR, cognomen Caligae cui castra dederunt.
CLAUDIUS hinc potitur regno, post quem NERO saevus
Ultimus Aeneadum. Post hunc tres, nec tribus annis;
GALBA senex, frustra socio confisus inerti:
Mollis OTHO, infami per luxum degener aevo:
Nec regno dignus, nec morte VITELLIUS ut vir.
His decimus, fatoque accitus VESPASIANUS.
Et TITUS imperii felix brevitate, secutus
Frater, quem CALVUM dixit sua Roma NERONEM.
Tempus imperii XII Caesarum.
(0865D)
JULIUS, ut perhibent, divus trieteride regnat.
AUGUSTUS post lustra decem sex prorogatannos,
Et ter septenis geminos NERO CLAUDIUS addit.
(0866B)Tertia finit hiems grassantia tempora CAII.
CLAUDIUS hebdomadem duplicem trahit: et NERO dirus
Tantumdem: summae consul sed defuit unus.
GALBA senex, OTHO lascive, et famose VITELLI,
(0866C)Tertia vos Latio regnantes nesciit aestas,
Interitus dignos vita properante probrosa.
Implet fatalem decadem sibi VESPASIANUS.
Ter, dominante TITO, cingit nova laurea Janum:
Quindecies, saevis potitur dum FRATER habenis.
De mortibus eorum.
JULIUS interiit CAESAR grassante senatu.
Addidit AUGUSTUM divis matura senectus.
Sera senex Capreis exsul NERO fata peregit.
Expetiit poenas de CAESARE Chaerea mollis.
CLAUDIUS ambiguo conclusit fata veneno.
Matricida NERO proprii vim pertulit ensis.
GALBA senex periit saevo prostratus OTHONE.
Mox Otho famosus, clara sed morte potitus.
(0866D)Prodiga succedunt perimendi sceptra VITELLI.
Laudatum imperium, mors lenis VESPASIANO.
At TITUS, orbis amor, rapitur florentibus annis.
Sera gravem perimunt, sed justa piacula, FRATREM.