Flodoardus Remensis, Annales ad anno 949: Agapitus papa synodum habuit apud Sanctum Petrum, in qua dampnationem Hugonis episcopi apud Ingulenheim factam confirmavit excommunicans etiam Hugonem principem, donec Ludowico regi satisfaciat.
Richerus, Historiarum libri quattuor II: Quo etiam tempore sinodus Romæ habita est in basilica sancti Petri apostoli præsidente domno Agapito papa. In qua etiam ipse domnus papa concilium anteriore anno apud Angleheim habitum coram episcopis Italiæ roboravit et ab eis roborari constituit. Hugonem quoque, Galliarum ducem, in supradicta sinodo dampnatum ipse etiam condempnat, donec regi suo satisfaciat aut Romam veniat inde ratiocinaturus; moxque anathema descriptum et a sinodo roboratum episcopis Galliarum destinatur.