Magnus Dei gracia Sweuorum gotorumque Rex Omnibus presentes literas inspecturis Salutem in Domino. Regalis beneuolencia debitrix fidelium sibi subiectorum dampna precludere et commodis intendere quantum potest, auxiliante Deo et suum extollit Solium, cumulat et amplificat meritum, et deuotos ad seruiendum animat, cum iustas preces admiserit eorumdem. Sane fidelium nostrorum villanorum iunnæcopensium precibus inclinati, eisdem habendi bis annis singulis sollempnes nundinas, videlicet in festo beati Antonii et in festo beati Fransisci, quod est post mikaelis, non solum facultatem actoritate presencium confirmamus, verum eciam statuentes, dictas nundinas ibidem premissis temporibus obseruari volumus, et omnibus ad noticiam proferimus, quod omnibus ibi in dictis nundinis venire volentibus emendi aut uendendi gracia, aut quouis alio iusto negocio, sit Dei et nostra pax et securitas veniendi, ibi morandi et jterum recedendi, quam presenti testimonio confirmamus. Si quis autem ipsam infringere presumpserit, nostre indignacionis et vlcionis penam non euadet, quam ius dictat nostri mandati contemptpribus et pacis uiolatoribus infligendam. Jn cuius testimonium sigillum nostrum presentibus est appensum ad euidenciam pleniorem. Datum Alsnø Anno domini M°. CC°.LXXXIIII. XV. kal. iunij.