Migne Patrologia Latina Tomus 104
Carmina (Agobardus Lugdunensis), J. P. Migne
I. Epitaphium Caroli Magni imperatoris.
Aurea coelorum postquam de Virgine Christus
Sumpserat apta sibi mundi pro crimine membra,
Jam decimus quartus post centies octo volabat
Annus, fluctivagi meruit per fervida coeli
Aetherei Carolus, Francorum gloria gentis,
Aequora transire, et placidum comprendere portum.
Qui deciesque quater per sex feliciter annos(0349C)
Sceptra tenens regni, et regno rex regna rejungens,
Febru migravit quinto arii ex orbe Kalendas,
Septuaginta senex vitae qui terminat annos.
Quapropter flagito, precibus si flecteris ullis,
Quique hujus relegis versus epigrammata lector,
Astriferam Caroli teneat, dic, spiritus arcem.
II. De translatione reliquiarum sanctorum martyrum Cypriani, Sperati, et Pantaleonis ad urbem Lugdunensem.
Rector magnificus piusque princeps,
Augusto Carolus decore fultus,
Sceptrum nobile Francorum regebat,
Subjectos populos pie gubernans.
Lectos aequora jusserat secare(0349D)
Ac jam propitio sibi tonante,
Post multos nimiae viae labores,
Ingressu reduci salum petentes,
Intrarunt Libycos repente fines
Qua Carthago gravi jacens ruina
Deflet praeteritae decus juventae.
Hic dum basilicas Deo dicatas
Et Christi subeunt veneranda templa,
Cernunt ut tua, Cypriane martyr,
Servaret loculus neglectus ossa.
Tum vero nimio dolore moti,
Et magno gemitu polum intuentes,
Poscunt auxilium Dei perennis,
Pro quo sancte tibi caput recisum est.
Et mox poplitibus precando flexis,
Pandunt sarcophagum, studentque sacros(0350C)
Artus stringere linteis paratis,
Committuntque sacro corpus locello.
Sperati quoque martyris beati,
Nec non Pantaleonis ossa raptim
Tollunt cuncta simul, ligantque pannis.
Conscendunt celeres ratem paratam,
Nec saevi metuunt pericla ponti.
Egressis Arelas opima portu
Occurrit placido, sinuque laeto
Fessos excipit, ac fovet benigne.
Haec mox cum audiit optimus sacerdos,
Lugduni placidam tenens cathedram,
Sanctorum eximio calore flagrans,
Intendensque sacris ubique rebus,
Ledradus specimen decusque cleri,(0350D)
Orat, postulat, impetratque raptim,
Ut sanctissima martyrum piorum
Nostris moenibus ossa conderentur,
Lugduni ad placidam Joannis aram,
Qui Christum vitrea rigavit unda.
Illic cum sociis honore claro
Florens, inclite Cypriane dormis.(0351A)
Sed quaeso vigiles, vigilque nostris
Intendas precibus; fiasque nobis
Clemens et validus Dei patronus;
Solvas crimina, conferasque vota.
Sic, quaeso, memor illa lingua nostri,
Quae confessa Dei perenne verbum,
Cervicem gladio dedit secandam;
Sed Christum cecinit, silere nescit.
Hanc Christus jugiter benignus audit,
De sacros populos stylo excitantem,
Haeresesve pravas, deosve falsos,(0351B)
Verbi fulmine funditus cremantem.(0352A)
Hanc et pro populo et patrono nostro
Semper quaesumus audiat rogantem;
Pastorem foveat, gregem propaget;
Det munus fidei decus salutis.
O doctor sacer, o beate martyr,
Serva pontificem pius Agobardum,
Qui nomen, meritum, tuumque festum
Dictis extulit, et honore comsit.
O triplex honor, o triforme culmen !
O tres magnifici piique testes!
Sit nobis triplici o ! favens precatu(0352B)
Pollens unica Trinitas per aevum.