Migne Patrologia Latina Tomus 121
Carmen de conflictu veris et hiemis
Carmen de conflictu veris et hiemis (Auctor incertus), J. P. Migne 121.0984A
Carmen de conflictu veris et hiemis
121.0983A| Conveniunt subito cuncti de montibus altis
Pastores pecudum, vernali luce sub umbra,
Arboreas pariter laetas celebrare camenas.
Omnes hic cuculo laudes cantare parabant.
Ver quoque florigero succinctus stemmate venit,
Frigida venit Hiems, rigidis hirsuta capillis,
His certamen erat cuculi de carmine grande.
Ver prior allusit ternos modulamine versus:
VER.
Opto meus veniat cuculus, charissimus aies,
Omnibus iste solet fieri gratissimus hospes,
Intret is modulans, rutilo bona carmina rostro.
Tum glacialis Hiems respondit voce serena;
HIEMS.
121.0983B| Non veniat cuculus, nigris sed dormiat antris;
Iste famem secum semper portare suescit.
VER.
Opto meus veniat cuculus cum germine laeto,
Frigora depellat, Phoebo comes almus in aevum;
Phoebus amat cuculum, crescenti luce serena.
HIEMS.
Non veniat cuculus, generat qui forte labores,
Praelia congeminat, requiem disjungit amaram;
Omnia disturbat: pelagi terraeque laborant.
VER.
Quid tu, tarda Hiems, cuculo convicia cantas?
Qui torpore gravi tenebrosis tectus in antris,
121.0983C| Post epulas Veneris, post stulti pocula Bacchi.
HIEMS.
Sunt mihi divitiae, sunt et convivia laeta,
Est requies dulcis, calidus est ignis in aede;
Haec cuculus nescit, sed perfidus ille laborat.
121.0984A| VER.
Ore refert flores cuculus, et mella ministrat,
Aedificatque domos, placidas et navigat undas,
Et generat soboles, laetos et vestiet agros.
HIEMS.
Haec inimica mihi sunt, quae tibi laeta videntur:
Sed placet optatas gazas numerare paratas;
Et gaudere cibis, simul et requiescere semper.
VER.
Quis tibi, tarda Hiems, semper dormire parata,
Divitias cumulat, gazas, vel congregat ullas:
Si ver aut aestas tibi nulla, vel ante laborat?
HIEMS.
Vera refers, illi nunquam mihi multa laborant;
Sunt etiam servi, nostra ditione subacti,
121.0984B| Jam mihi servantes domino quaecunque laborant.
Non illis dominus, sed pauper inopsque superbus,
Nec te jam poteris per te tu pascere tantum,
Ni tibi quis veniat cuculus, alimonia praestet.
Tunc respondit ovans, sublimi a sede Palaemon.
PALAEMON
Et Daphnis pariter, pastorum et turba piorum:
Desine plura, Hiems, rerum tu prodigus atrox;
Et veniat cuculus, pastorum dulcis amicus;
Collibus in nostris erumpant germina laeta;
Pascua sit pecori, requies et dulcis in arvis;
Et virides rami praestent umbracula fessis.
Uberibus plenis veniantque ad mulctra capellae;
121.0984C| Et volucres varia Phoebum sub voce salutent.
Quapropter citius cuculus nunc ecce venito,
Tum jam dulcis amor, cunctis gratissimus hospes.
Omnia te exspectant, pelagi tellusque salutant:
Salve, dulce decus cuculus, per saecula salve.
(no apparatus)