Wikisource

Biblia Sacra juxta vulgatam clementinam (1938)/Vetus Testamentum/Pentateuchus/Liber Genesis/Caput I

< Biblia Sacra juxta vulgatam clementinam (1938)
(Redirectum de Biblia Sacra juxta vulgatam clementinam/Vetus Testamentum/Pentateuchus/Liber Genesis/Caput I)
There are no reviewed versions of this page, so it may not have been checked for adherence to standards.

Sine Nomine
BIBLIA SACRA
JUXTA VULGATAM CLEMENTINAM
VETUS TESTAMENTUM
PENTATEUCHUS

LIBER GENESIS


PRIMA PARS

PRIMÆVA MUNDI HUMANIQUE GENERIS HISTORIA
Romæ - Tornaci - Parisiis - 1938

 Liber Genesis Cap. II 


I. - CREATIO MUNDI
[I, 1 - II, 3]
  • Cap. I, 1 - II, 3: Creatio

Prologus [I,1]. Primævum Caos [2]. Producuntur lumen [3-5], firmamentum [6-8], terra et mare [9-10], herbæ et arbores [11-13], luminaria [14-19], animalia quae moventur in aquis et aves cæli [20-23], iumenta, reptilia et bestiæ terræ [24-25], homo, omnium creaturarum dominus [26-31]. Divina requies origoque sabbati [1-3].


1 n principio[1] creavit[2] Deus cælum et terram.

2 Terra autem erat inanis et vacua, et tenebræ erant super faciem abyssi; et Spiritus Dei ferebatur[3] super aquas.

3 Dixitque Deus: Fiat lux. Et facta est lux[4]. 4 Et vidit Deus lucem quod esset bona: et divisit lucem a tenebris. 5 Appellavitque lucem Diem, et tenebras Noctem[5].

Factumque est vespere et mane, dies unus.

6 Dixit quoque Deus: Fiat firmamentum in medio aquarum, et dividat aquas ab aquis[6]. 7 Et fecit Deus firmamentum, divisitque aquas, quæ erant sub firmamento, ab his quæ erant super firmamentum. Et factum est ita[7]. 8 Vocavitque Deus firmamentum Cælum: et factum est vespere et mane, dies secundus.

9 Dixit vero Deus: Congregentur aquæ, quæ sub cælo sunt, in locum unum, et appareat arida. Et factum est ita[8]. 10 Et vocavit Deus aridam Terram, congregationesque aquarum appellavit Maria. Et vidit Deus quod esset bonum.

11 Et ait: Germinet terra herbam virentem, et facientem semen, et lignum pomiferum faciens fructum juxta genus suum, cujus semen in semetipso sit super terram. Et factum est ita[9]. 12 Et protulit terra herbam virentem, et facientem semen juxta genus suum, lignumque faciens fructum, et habens unumquodque sementem secundum speciem suam. Et vidit Deus quod esset bonum.

13 Et factum est vespere et mane, dies tertius.

14 Dixit autem Deus: Fiant luminaria in firmamento cæli, et dividant diem ac noctem, et sint in signa et tempora, et dies et annos[10], 15 ut luceant in firmamento cæli, et illuminent terram. Et factum est ita. 16 Fecitque Deus duo luminaria magna: luminare majus, ut præesset diei: et luminare minus, ut præesset nocti, et stellas[11]. 17 Et posuit eas in firmamento cæli, ut lucerent super terram, 18 et præessent diei ac nocti, et dividerent lucem ac tenebras. Et vidit Deus quod esset bonum[12].

19 Et factum est vespere et mane, dies quartus.

20 Dixit etiam Deus: Producant aquæ reptile animæ viventis, et volatile super terram sub firmamento cæli. 21 Creavitque Deus cete grandia, et omnem animam viventem atque motabilem, quam produxerant aquæ in species suas, et omne volatile secundum genus suum. Et vidit Deus quod esset bonum[13]. 22 Benedixitque eis, dicens: Crescite, et multiplicamini, et replete aquas maris; avesque multiplicentur super terram[14].

23 Et factum est vespere et mane, dies quintus.

24 Dixit quoque Deus: Producat terra animam viventem in genere suo, jumenta, et reptilia, et bestias terræ secundum species suas. Factumque est ita[15]. 25 Et fecit Deus bestias terræ juxta species suas, et jumenta, et omne reptile terræ in genere suo. Et vidit Deus quod esset bonum.

26 Et ait: Faciamus hominem ad imaginem et similitudinem nostram; et præsit piscibus maris, et volatilibus cæli, et bestiis, universæque terræ, omnique reptili, quod movetur in terra[16]. 27 Et creavit Deus hominem ad imaginem suam; ad imaginem Dei creavit illum, masculum et feminam creavit eos[17]. 28 Benedixitque illis Deus, et ait: Crescite et multiplicamini, et replete terram, et subjicite eam, et dominamini piscibus maris, et volatilibus cæli, et universis animantibus, quæ moventur super terram[18]. 29 Dixitque Deus: Ecce dedi vobis omnem herbam afferentem semen super terram, et universa ligna quæ habent in semetipsis sementem generis sui, ut sint vobis in escam[19], 30 et cunctis animantibus terræ, omnique volucri cæli, et universis quæ moventur in terra, et in quibus est anima vivens, ut habeant ad vescendum. Et factum est ita[20]. 31 Viditque Deus cuncta quæ fecerat, et erant valde bona[21].

Et factum est vespere et mane, dies sextus.


Notæ

recensere
  1. ↑ In principio, Joan. I, 1-3; Act. 14, 14; Hebr. I, 10.
  2. ↑ Creavit, Ps. 32, 6; 135, 5; Eccli. 18, 1; II Mach. 7, 28; Act. 17, 24; Col. 1, 16, 17; Hebr. 11, 3; Apoc. 4, 11.
  3. ↑ Spiritus Dei ferebatur, Ps. 32, 6.
  4. ↑ Ps. 32, 9; II Cor. 4, 6.
  5. ↑ Ps. 73, 16; 103, 20
  6. ↑ Job 37, 18; Jer. 10, 12; 51, 15.
  7. ↑ Ps. 135, 6; 148. 4; Prov. 8, 27-29; Dan. 3, 60.
  8. ↑ Job 38, 4, 8-11; Ps. 32,7; 88, 12; 135, 6; Jer. 5, 22; II Petr. 3, 5.
  9. ↑ Ps. 103, 14; Is. 42, 5.
  10. ↑ Ps. 103, 19; Jer. 10, 2.
  11. ↑ Deut. 4, 19; Ps. 8, 4; 73, 16; 135, 7-9.
  12. ↑ Jer. 31, 35.
  13. ↑ Job 12, 7, 9; Ps. 103, 25, 26.
  14. ↑ Gen. 8, 17; 9, 1.
  15. ↑ Gen. 2, 19.
  16. ↑ Faciamus, Gen. 3, 22; Sap. 9, 2 - Ad imaginem, Gen. 5, 1; 9, 6; Sap. 2, 23; Eccli. 17, 1; I Cor. 11, 7; II Cor. 3, 18; Eph. 4, 24; Col. 3, 10; Jac. 3, 9 - Et præsit, Gen. 9, 2; Ps. 8, 7, 8; Eccli. 17, 3.
  17. ↑ Gen. 2, 18, 21-23; Mal. 2, 15, 16; Matth. 19, 4; Marc. 10, 16.
  18. ↑ Gen. 8, 17; 9, 1; Ps. 126, 3; 127, 3.
  19. ↑ Gen. 9, 3; Ps. 103, 14, 15; Act. 4, 16.
  20. ↑ Job 38, 41; Ps. 144, 15; 146, 9.
  21. ↑ Eccl. 3, 11; Eccli. 39, 21; I Tim. 4, 4; Jac. 1, 17.
 Liber Genesis Cap. II 
Receptum de "https://la.wikisource.org/wiki/Biblia_Sacra_juxta_vulgatam_clementinam_(1938)/Vetus_Testamentum/Pentateuchus/Liber_Genesis/Caput_I"