 Joannis epistola I |
Joannis epistola III  |
Caput I recensere
Inscribitur haec epistola eximiae ac praestanti dignitate feminae, quae filios in Dei timore recte educatos habebat. Hanc orat, ut in caritate christiana perseveret, ne in antichristos incidat, quin potius eos omnino vitet.
1. Senior electae dominae, ejusque liberis, quos ego vere amo: nec ego solus, sed etiam omnes, qui veritatem noverunt. 2. Propter veritatem, quae et in nobis manet, et nobis aderit in sempiternum. 3. Adsit vobis favor, misericordia, pax a Deo patre, et a Domino Jesu Christo, patris filio, cum veritate ac caritate. 4. Laetatus sum magnopere, quod liberos tuos ex veritate vivere comperi, sicuti praeceptum accepimus a patre. 5. Et nunc rogo te, domina, non quo tibi novum scribam praeceptum, sed quod habuimus ab initio, ut amemus nos mutuo. 6. Est autem in eo situs amor, ut ex ejus praeceptione nos geramus. Haec est praeceptio, quemadmodum audivistis ab initio, ut ex ea vivatis: 7. Quoniam multi impostores in mundum introiverunt, qui Jesum Christum in carne venisse non confitentur. Hic ille impostor et Antichristus est. 8. Date operam, ne perdamus, quod elaboravimus, sed mercedem plenam accipiamus. 9. Quisquis delinquit, neque manet in doctrina Christi, Deum non habet. Qui manet in doctrina Christi, is et patrem habet et filium. 10. Si quis venit ad vos, qui hanc doctrinam non ferat, eum domum ne accipite, neque salvere jubete. 11. Qui enim salvere jubet, participat ejus prave facta. 12. Quum multa vobis haberem scribenda, nolui charta et atramento: spero enim, me venturum ad vos, et coram collocuturum, ut plenam percipiatis laetitiam. 13. Salutant te liberi tuae sororis electae: Amen.