Migne Patrologia Latina Tomus 137
Argumentum
Argumentum (Hrothsuita Gandersheimensis), J. P. Migne
Argumentum
Joachim et Anna, de stirpe David, cum diu steriles vixissent, in temploque ob sterilitatem repudiati a sacerdotibus fuissent, tandem longis orationibus et votis prolem divinam, nomine Mariam, susceperunt, eamque castitati et aeterno Dei obsequio in templo devoverunt. Illa tenella, laeta et constans, gradus templi cum omnium admiratione superavit, reliquasque virgines sanctitate vitae excelluit. Quam dum sacerdotes despondere volunt, et virgis temere projectis illi conjugem quaerunt, et sors super virgam Joseph ex genere David cecidit. Nam mox columba, suae virgae insidens, coelum petiit, collaudantibus cunctis divinam sortem. Joseph virgo despondetur, pauloque post angelus illi, divina salutatione facta, Deum, omnium creatorem, obumbratione sancti Spiritus carnem suscipere, nuntiat. Quae, verbo angeli credens, dum in Bethlehem cum Joseph, Caesaris Augusti edicto, migraret, peperit primogenitum suum, Salvatorem mundi, Jesum Christum, cujus divinitatem et pastores, et Magi, ab Oriente venientes, testati sunt. Quae fama cum ad Herodem delata fuisset, omnes ejus anni infantes natos occidi jussit, ut haeredem regni tolleret. Joseph, ab angelo monitus, cum matre et puero, ut regis crudelitatem fugeret, in Aegyptum concessit, moxque Aegyptiorum simulacra in terram prona cadentia nutabant, sacerdotibusque suis verum Deum natum proclamabant. In itinere autem miracula pueri de serpentibus et draconibus, dum in specu noctem ducerent, narrat, itemque de leonibus et pardis, mite et mansuete se puero offerentibus, palmamque cum fructu inclinatam matris gremio, fontemque, pueri verbis erumpentem, dum in itinere siti laborassent, commemorat.
(no apparatus)