Apophoreta (Epigrammaton liber XIV)

 EPUB   MOBI   PDF   RTF   TXT
Apophoreta
Epigrammaton liber XIV
Saeculum II
editio: incognita
fons: incognitus

I recensere

Synthesibus dum gaudet eques dominusque senator
Dumque decent nostrum pillea sumpta Iovem;
Nec timet aedilem moto spectare fritillo,
Cum videat gelidos tam prope verna lacus:
5
Divitis alternas et pauperis accipe sortes:
Praemia convivae dent sua quisque suo.
'Sunt apinae tricaeque et si quid vilius istis.'
Quis nescit? vel quis tam manifesta negat?
Sed quid agam potius madidis, Saturne, diebus,
10
Quos tibi pro caelo filius ipse dedit?
Vis scribam Thebas Troiamve malasve Mycenas?
'Lude,' inquis, 'nucibus'. Perdere nolo nuces.

II recensere

Quo vis cumque loco potes hunc finire libellum:
Versibus explicitumst omne duobus opus.
Lemmata si quaeris cur sint adscripta, docebo:
Ut, si malueris, lemmata sola legas.

III Pugillares citrei recensere

Secta nisi in tenues essemus ligna tabellas,
Essemus Libyci nobile dentis onus.

IV Quinquiplices recensere

Caede iuvencorum domini calet area felix,
Quinquiplici cera cum datur altus honos.

V Pugillares eborei recensere

Languida ne tristes obscurent lumina cerae,
Nigra tibi niveum littera pingat ebur.

VI Triplices recensere

Tunc triplices nostros non vilia dona putabis,
Cum se venturam scribet amica tibi.

VII Pugillares membranei recensere

Esse puta ceras, licet haec membrana vocetur:
Delebis, quotiens scripta novare voles.

VIII Vitelliani recensere

Nondum legerit hos licet puella,
Novit quid cupiant Vitelliani.

IX Idem recensere

Quod minimos cernis, mitti nos credis amicae.
Falleris: et nummos ista tabella rogat.

X Chartae maiores recensere

Non est, munera quod putes pusilla,
Cum donat vacuas poeta chartas.

XI Chartae epistulares recensere

Seu leviter noto, seu caro missa sodali
Omnes ista solet charta vocare suos.

XII Loculi eborei recensere

Hos nisi de flava loculos implere moneta
Non decet: argentum vilia ligna ferant.

XIII Loculi lignei recensere

Si quid adhuc superest in nostri faece locelli,
Munus erit. Nihil est: ipse locellus erit.

XIV Tali eborei recensere

Cum steterit nullus vultu tibi talus eodem,
Munera me dices magna dedisse tibi.

XV Tesserae recensere

Non sim talorum numero par tessera, dum sit
Maior, quam talis, alea saepe mihi.

XVI Turricula recensere

Quae scit compositos manus improba mittere talos,
Si per me misit, nil nisi vota feret.

XVII Tabula lusoria recensere

Hac mihi bis seno numeratur tessera puncto;
Calculus hac gemino discolor hoste perit.

XVIII Calculi recensere

Insidiosorum si ludis bella latronum,
Gemmeus iste tibi miles et hostis erit.

XIX Nuces recensere

Alea parva nuces et non damnosa videtur;
Saepe tamen pueris abstulit illa natis.

XX Theca libraria recensere

Sortitus thecam calamis armare memento:
Cetera nos dedimus, tu leviora para.

XXI Graphiarium recensere

Haec tibi erunt armata suo graphiaria ferro:
Si puero dones, non leve munus erit.

XXII Dentiscalpium recensere

Lentiscum melius: sed si tibi frondea cuspis
Defuerit, dentes pinna levare potest.

XXIII Auriscalpium recensere

Si tibi morosa prurigine verminat auris,
Arma damus tantis apta libidinibus.

XXIV Acus aurea recensere

Splendida ne madidi violent bombycina crines,
Figat acus tortas sustineatque comas.

XXV Pectines recensere

Quid faciet nullos hic inventura capillos
Multifido buxus quae tibi dente datur?

XXVI Crines recensere

Chattica Teutonicos accendit spuma capillos:
Captivis poteris cultior esse comis.

XXVII Sapo recensere

Si mutare paras longaevos cana capillos,
Accipe Mattiacas - quo tibi calva? - pilas.

XXVIII Umbella recensere

Accipe quae nimios vincant umbracula soles:
Sit licet et ventus, te tua vela tegent.

XXIX Causea recensere

In Pompeiano tecum spectabo theatro:
Mandatus populo vela negare solet.

XXX Venabula recensere

Excipient apros expectabuntque leones,
Intrabunt ursos, sit modo firma manus.

XXXI Culter venatorius recensere

Si deiecta gemas longo venabula rostro,
Hic brevis ingentem comminus ibit aprum.

XXXII Parazonium recensere

Militiae decus hoc gratique erit omen honoris,
Arma tribunicium cingere digna latus.

XXXIII Pugio recensere

Pugio, quem curva signat brevis orbita vena.
Stridentem gelidis hunc Salo tinxit aquis.

XXXIV Falx recensere

Pax me certa ducis placidos curvavit in usus.
Agricolae nunc sum, militis ante fui.

XXXV Securicula recensere

Cum fieret tristis solvendis auctio nummis,
Haec quadringentis milibus empta fuit.

XXXVI Ferramenta tonsoria recensere

Tondendis haec arma tibi sunt apta capillis;
Unguibus hic longis utilis, illa genis.

XXXVII Scrinium recensere

Selectos nisi das mihi libellos,
Admittam tineas trucesque blattas.

XXXVIII Fasces calamorum recensere

Dat chartis habiles calamos Memphitica tellus;
Texantur reliqua tecta palude tibi.

XXXIX Lucerna cubicularis recensere

Dulcis conscia lectuli lucerna,
Quidquid vis facias licet, tacebo.

XL Cicindela recensere

Ancillam tibi sors dedit lucernae,
Totas quae vigil exigit tenebras.

XLI Lucerna polymyxos recensere

Inlustrem cum tota meis convivia flammis
Totque geram myxos, una lucerna vocor.

XLII Cereus recensere

Hic tibi nocturnos praestabit cereus ignes:
Subducta est puero namque lucerna tuo.

XLIII Candelabrum Corinthium recensere

Nomina candelae nobis antiqua dederunt:
Non norat parcos uncta lucerna patres.

XLIV Candelabrum ligneum recensere

Esse vides lignum; servas nisi lumina, fiet
De candelabro magna lucerna tibi.

XLV Pila paganica recensere

Haec quae difficili turget paganica pluma,
Folle minus laxast et minus arta pila.

XLVI Pila trigonalis recensere

Si me nobilibus scis expulsare sinistris,
Sum tua. Tu nescis? rustice, redde pilam.

XLVII Follis recensere

Ite procul, iuvenes: mitis mihi convenit aetas:
Folle decet pueros ludere, folle senes.

XLVIII Harpasta recensere

Haec rapit Antaei velox in pulvere draucus,
Grandia qui vano colla labore facit.

XLIX Halteres recensere

Quid pereunt stulto fortes haltere lacerti?
Exercet melius vinea fossa viros.

L Galericulum recensere

Ne lutet inmundum nitidos ceroma capillos,
Hac poteris madidas condere pelle comas.

LI Strigiles recensere

Pergamon has misit. Curvo destringere ferro:
Non tam saepe teret lintea fullo tibi.

LII Gutus corneus recensere

Gestavit modo fronte me iuvencus:
Verum rhinocerota me putabas.
         

LIII Rhinoceros recensere

Nuper in Ausonia domini spectatus harena
Hic erit ille tibi, cui pila taurus erat.

LIV Crepitacillum recensere

Si quis plorator collo tibi vernula pendet,
Haec quatiat tenera garrula sistra manu.

LV Flagellum recensere

Proficies nihil hoc, caedas licet usque, flagello,
Si tibi purpureo de grege currit equus.

LVI Dentifricium recensere

Quid mecum est tibi? me puella sumat:
Emptos non soleo polire dentes.

LVII Myrobalanum recensere

Quod nec Vergilius nec carmine dicit Homerus,
Hoc ex unguento constat et ex balano.

LVIII Aphronitrum recensere

Rusticus es? nescis, quid Graeco nomine dicar:
Spuma vocor nitri. Graecus es? aphronitrum.

LIX Opobalsama recensere

Balsama me capiunt, haec sunt unguenta virorum:
Delicias Cosmi vos redolete, nurus.

LX Lomentum recensere

Gratum munus erit scisso nec inutile ventri,
Si clara Stephani balnea luce petes.

LXI Lanterna cornea recensere

Dux lanterna viae clusis feror aurea flammis,
Et tuta est gremio parva lucerna meo.

LXII Lanterna de vesica recensere

Cornea si non sum, numquid sum fuscior? aut me
Vesicam, contra qui venit, esse putat?

LXIII Tibiae recensere

Ebria nos madidis rumpit tibicina buccis:
Saepe duas pariter, saepe monaulon habet.

LXIV Fistula recensere

Quid me conpactam ceris et harundine rides?
Quae primum structa est fistula talis erat.

LXV Soleae lanatae recensere

Defuerit si forte puer soleasque libebit
Sumere, pro puero pes erit ipse sibi.

LXVI Mamillare recensere

Taurino poteras pectus constringere tergo:
Nam pellis mammas non capit ista tuas.

LXVII Muscarium pavoninum recensere

Lambere quae turpes prohibet tua prandia muscas,
Alitis eximiae cauda superba fuit.

LXVIII Muscarium bubulum recensere

Sordida si flavo fuerit tibi pulvere vestis,
Colligat hunc tenui verbere cauda levis.

LXIX Copta Rhodiaca recensere

Peccantis famuli pugno ne percute dentes:
Clara Rhodos coptam quam tibi misit edat.

LXX Priapus siligineus recensere

Si vis esse satur, nostrum potes esse Priapum:
Ipsa licet rodas inguina, purus eris.

LXXI Porcus recensere

Iste tibi faciet bona Saturnalia porcus,
Inter spumantes ilice pastus apros.

LXXII Botulus recensere

Qui venit botulus mediae tibi tempore brumae,
Saturni septem venerat ante dies.

LXXIII Psittacus recensere

Psittacus a vobis aliorum nomina discam:
Hoc didici per me dicere &7caesar have&.

LXXIV Corvus recensere

Corve salutator, quare fellator haberis?
In caput intravit mentula nulla tuum.

LXXV Luscinia recensere

Flet Philomela nefas incesti Tereos, et quae
Muta puella fuit, garrula fertur avis.

LXXVI Pica recensere

Pica loquax certa dominum te voce saluto:
Si me non videas, esse negabis avem.

LXXVII Cavea eborea recensere

Si tibi talis erit, qualem dilecta Catullo
Lesbia plorabat, hic habitare potest.

LXXVIII Narthecium recensere

Artis ebur medicae narthecia cernis: habebis
Munera, quae cuperet Paccius esse sua.

LXXIX Flagra recensere

Ludite lascivi, sed tantum ludite, servi:
Haec signata mihi quinque diebus erunt.

LXXX Ferulae recensere

Invisae nimium pueris grataeque magistris,
Clara Prometheo munere ligna sumus.

LXXXI Pera recensere

Ne mendica ferat barbati prandia nudi
Dormiat et tetrico cum cane, pera rogat.

LXXXII Scopae recensere

In pretio scopas testatur palma fuisse.
Otia sed scopis nunc analecta dedit.

LXXXIII Scalptorium eboreum recensere

Defendet manus haec scapulas mordente molesto
Pulice, vel si quid pulice sordidius.

LXXXIV Manuale recensere

Ne toga barbatos faciat vel paenula libros,
Haec abies chartis tempora longa dabit.

LXXXV Lectus pavoninus recensere

Nomina dat spondae pictis pulcherrima pinnis
Nunc Iunonis avis, sed prius Argus erat.

LXXXVI Ephippium recensere

Stragula succincti venator sume veredi:
Nam solet a nudo surgere ficus equo.

LXXXVII Stibadia recensere

Accipe lunata scriptum testudine sigma.
Octo capit; veniat quisquis amicus erit.

LXXXVIII Gustatorium recensere

Femineam nobis cherson si credis inesse,
Deciperis: pelagi mascula praeda sumus.

LXXXIX Mensa citrea recensere

Accipe felices, Atlantica munera, silvas:
Aurea qui dederit dona, minora dabit.

XC Mensa acerna recensere

Non sum crispa quidem nec silvae filia Maurae,
Sed norunt lautas et mea ligna dapes.

XCI Dentes eborei recensere

Grandia taurorum portant qui corpora, quaeris,
An Libycas possint sustinuisse trabes?

XCII Quinquepedal recensere

Puncta notis ilex et acuta cuspide clusa
Saepe redemptoris prodere furta solet.

XCIII Pocula archetypa recensere

Non est ista recens nec nostri gloria caeli:
Primus in his Mentor, dum facit illa, bibit.

XCIV Calices audaces recensere

Nos sumus audacis plebeia toreumata vitri,
Nostra neque ardenti gemma feritur aqua.

XCV Phiala aurea caelata recensere

Quamvis Callaïco rubeam generosa metallo,
Glorior arte magis: nam Myos iste labor.

XCVI Calices Vatinii recensere

Vilia sutoris calicem monimenta Vatini
Accipe; sed nasus longior ille fuit.

XCVII Lances chrysendetae recensere

Grandia ne viola parvo chrysendeta mullo:
Ut minimum, libras debet habere duas.

XCVIII Vasa Arretina recensere

Arretina nimis ne spernas vasa monemus:
Lautus erat Tuscis Porsena fictilibus.

XCIX Bascauda recensere

Barbara de pictis veni bascauda Britannis;
Sed me iam mavolt dicere Roma suam.

C Panaca recensere

Si non ignotast docti tibi terra Catulli,
Potasti testa Raetica vina mea.

CI Boletaria recensere

Cum mihi boleti dederint tam nobile nomen,
Prototomis - pudet heu! - servio coliculis.

CII Calices Surrentini recensere

Accipe non vili calices de pulvere natos,
Sed Surrentinae leve toreuma rotae.

CIII Colum nivarium recensere

Setinos, moneo, nostra nive frange trientes:
Pauperiore mero tingere lina potes.

CIV Saccus nivarius recensere

Attenuare nives norunt et lintea nostra:
Frigidior colo non salit unda tuo.

CV Urceoli ministratorii recensere

Frigida non deerit, non deerit calda petenti.
Sed tu morosa ludere parce siti.

CVI Urceus fictilis recensere

Hic tibi donatur pansa ruber urceus ansa.
Stoicus hoc gelidam Fronto petebat aquam.

CVII Calathi recensere

Nos Satyri, nos Bacchus amat, nos ebria tigris,
Perfusos domini lambere docta pedes.

CVIII Calices Saguntini recensere

Quae non sollicitus teneat servetque minister,
Sume Saguntino pocula facta luto.

CIX Calices gemmati recensere

Gemmatum Scythicis ut luceat ignibus aurum,
Aspice. Quot digitos exuit iste calix!

CX Ampulla potoria recensere

Hac licet in gemma, servat quae nomina Cosmi,
Luxuriose, bibas, si foliata sitis.

CXI Crystallina recensere

Frangere dum metuis, franges crystallina: peccant
Securae nimium sollicitaeque manus.

CXII Nimbus vitreus recensere

A Iove qui veniet, miscenda ad pocula largas
Fundet nimbus aquas: hic tibi vina dabit.

CXIII Murrina recensere

Si caldum potas, ardenti murra Falerno
Convenit et melior fit sapor inde mero.

CXIV Patella Cumana recensere

Hanc tibi Cumano rubicundam pulvere testam
Municipem misit casta Sibylla suam.

CXV Calices vitrei recensere

Aspicis ingenium Nili: quibus addere plura
Dum cupit, a quotiens perdidit auctor opus!

CXVI Lagona nivaria recensere

Spoletina bibis vel Marsis condita cellis:
Quo tibi decoctae nobile frigus aquae?

CXVII Idem recensere

Non potare nivem, sed aquam potare recentem
De nive commenta est ingeniosa sitis.

CXVIII Idem recensere

Massiliae fumos miscere nivalibus undis
Parce, puer, constet ne tibi pluris aqua.

CXIX Matella fictilis recensere

Dum poscor crepitu digitorum et verna moratur,
O quotiens paelex culcita facta mea est!

CXX Ligula argentea recensere

Quamvis me ligulam dicant equitesque patresque,
Dicor ab indoctis lingula grammaticis.

CXXI Coclearia recensere

Sum cocleis habilis, sed nec minus utilis ovis.
Numquid scis, potius cur cocleare vocer?

CXXII Anuli recensere

Ante frequens, sed nunc rarus nos donat amicus.
Felix, cui comes est non alienus eques.

CXXIII Dactyliotheca recensere

Saepe gravis digitis elabitur anulus unctis,
Tuta mea fiet sed tua gemma fide.

CXXIV Toga recensere

Romanos rerum dominos gentemque togatam
Ille facit, magno qui dedit astra patri.

CXXV Idem recensere

Si matutinos facilest tibi perdere somnos,
Attrita veniet sportula saepe toga.

CXXVI Endromis recensere

Pauperis est munus, sed non est pauperis usus:
Hanc tibi pro laena mittimus endromida.

CXXVII Canusinae fuscae recensere

Haec tibi turbato Canusina simillima mulso
Munus erit. Gaude: non cito fiet anus.

CXXVIII Bardocucullus recensere

Gallia Santonico vestit te bardocucullo.
Cercopithecorum paenula nuper erat.

CXXIX Canusinae rufae recensere

Roma magis fuscis vestitur, Gallia rufis,
Et placet hic pueris militibusque colos.

CXXX Paenula scortea recensere

Ingrediare viam caelo licet usque sereno,
Ad subitas numquam scortea desit aquas.

CXXXI Lacernae coccineae recensere

Si veneto prasinove faves, quid coccina sumes?
Ne fias ista transfuga sorte, vide.

CXXXII Pilleum recensere

Si possem, totas cuperem misisse lacernas:
Nunc tantum capiti munera mitto tuo.

CXXXIII Lacernae Baeticae recensere

Non est lana mihi mendax, nec mutor aheno.
Sic placeant Tyriae: me mea tinxit ovis.

CXXXIV Fascia pectoralis recensere

Fascia, crescentes dominae compesce papillas,
Ut sit quod capiat nostra tegatque manus.

CXXXV Lacernae albae recensere

Amphitheatrali nos commendamus ab usu,
Cum teget algentes alba lacerna togas.

CXXXVI Cenatoria recensere

Nec fora sunt nobis nec sunt vadimonia nota:
Hoc opus est, pictis accubuisse toris.

CXXXVII Focale recensere

Si recitaturus dedero tibi forte libellum,
Hoc focale tuas adserat auriculas.

CXXXVIII Laena recensere

Tempore brumali non multum levia prosunt:
Calfaciunt villi pallia vestra mei.

CXXXIX Mantele recensere

Nobilius villosa tegant tibi lintea citrum:
Orbibus in nostris circulus esse potest.

CXL Cuculli Liburnici recensere

Iungere nescisti nobis, o stulte, lacernas:
Indueras albas, exue callaïnas.

CXLI Udones Cilicii recensere

Non hos lana dedit, sed olentis barba mariti:
Cinyphio poterit planta latere sinu.

CXLII Synthesis recensere

Dum toga per quinas gaudet requiescere luces,
Hos poteris cultus sumere iure tuo.

CXLIII Tunicae Patavinae recensere

Vellera consumunt Patavinae multa trilices,
Et pingues tunicas serra secare potest.

CXLIV Spongia recensere

Haec tibi sorte datur tergendis spongia mensis
Utilis, expresso cum levis imbre tumet.

CXLV Paenula gausapina recensere

Is mihi candor inest, villorum gratia tanta,
Ut me vel media sumere messe velis.

CXLVI Cervical recensere

Tingue caput Cosmi folio, cervical olebit:
Perdidit unguentum cum coma, pluma tenet.

CXLVII Cubicularia gausapina recensere

Stragula purpureis lucent villosa tapetis.
Quid prodest, si te congelat uxor anus?

CXLVIII Lodices recensere

Nudo stragula ne toro paterent,
Iunctae nos tibi venimus sorores.

CXLIX Amictorium recensere

Mammosas metuo; tenerae me trade puellae,
Ut possint niveo pectore lina frui.

CL Cubicularia polymita recensere

Haec tibi Memphitis tellus dat munera: victa est
Pectine Niliaco iam Babylonos acus.

CLI Zona recensere

Longa satis nunc sum; dulci sed pondere venter
Si tumeat, fiam tunc tibi zona brevis.

CLII Gausapum quadratum recensere

Lodices mittet docti tibi terra Catulli:
Nos Helicaonia de regione sumus.

CLIII Semicinctium recensere

Det tunicam locuples: ego te praecingere possum.
Essem si locuples, munus utrumque darem.

CLIV Lanae amethystinae recensere

Ebria Sidoniae cum sim de sanguine conchae,
Non video, quare sobria lana vocer.

CLV Lanae albae recensere

Velleribus primis Apulia, Parma secundis
Nobilis; Altinum tertia laudat ovis.

CLVI Lanae Tyriae recensere

Nos Lacedaemoniae pastor donavit amicae:
Deterior Ledae purpura matris erat.

CLVII Lanae Pollentinae recensere

Non tantum pullo lugentes vellere lanas,
Sed solet et calices haec dare terra suos.

CLVIII Idem recensere

Lana quidem tristis, sed tonsis nata ministris,
Quales non primo de grege mensa citat.

CLIX Tomentum Leuconicum recensere

Oppressae nimium vicina est fascia plumae?
Vellera Leuconicis accipe rasa sagis.

CLX Tomentum Circense recensere

Tomentum concisa palus Circense vocatur.
Haec pro Leuconico stramina pauper emit.

CLXI Pluma recensere

Lassus Amyclaea poteris requiescere pluma,
Interior cycni quam tibi lana dedit.

CLXII Faenum recensere

Fraudata tumeat fragilis tibi culcita mula.
Non venit ad duros pallida cura toros.

CLXIII Tintinabulum recensere

Redde pilam: sonat aes thermarum. Ludere pergis?
Virgine vis sola lotus abire domum.

CLXIV Discus recensere

Splendida cum volitant Spartani pondera disci,
Este procul, pueri: sit semel ille nocens.

CLXV Cithara recensere

Reddidit Eurydicen vati: sed perdidit ipse,
Dum sibi non credit nec patienter amat.

CLXVI Idem recensere

De Pompeiano saepe est eiecta theatro
Quae duxit silvas detinuitque feras.

CLXVII Plectrum recensere

Fervida ne trito tibi pollice pusula surgat,
Exornent docilem candida plectra lyram.

CLXVIII Trochus recensere

Inducenda rota est: das nobis utile munus:
Iste trochus pueris, at mihi cantus erit.

CLXIX Idem recensere

Garrulus in laxo cur anulus orbe vagatur?
Cedat ut argutis obvia turba trochis.

CLXX Signum Victoriae aureum recensere

Haec illi sine sorte datur, cui nomina Rhenus
Vera dedit. Deciens adde Falerna, puer.

CLXXI BROYTOY PAIDION fictile recensere

Gloria tam parvi non est obscura sigilli:
Istius pueri Brutus amator erat.

CLXXII Sauroctonos Corinthius recensere

Ad te reptanti, puer insidiose, lacertae
Parce: cupit digitis illa perire tuis.

CLXXIII Hyacinthus in tabula pictus recensere

Flectit ab inviso morientia lumina disco
Oebalius, Phoebi culpa dolorque, puer.

CLXXIV Hermaphroditus marmoreus recensere

Masculus intravit fontis, emersit utrumque:
Pars est una patris, cetera matris habet.

CLXXV Danae picta recensere

Cur a te pretium Danae, regnator Olympi,
Accepit, gratis si tibi Leda dedit?

CLXXVI Persona Germana recensere

Sum figuli lusus russi persona Batavi.
Quae tu derides, haec timet ora puer.

CLXXVII Hercules Corinthius recensere

Elidit geminos infans nec respicit anguis.
Iam poterat teneras hydra timere manus.

CLXXVIII Hercules fictilis recensere

Sum fragilis: sed tu, moneo, ne sperne sigillum:
Non pudet Alciden nomen habere meum.

CLXXIX Minerva argentea recensere

Dic mihi, virgo ferox, cum sit tibi cassis et hasta,
Quare non habeas aegida. 'Caesar habet.'

CLXXX Europe picta recensere

Mutari melius tauro, pater optime divum,
Tunc poteras, Io cum tibi vacca fuit.

CLXXXI Leandros marmoreus recensere

Clamabat tumidis audax Leandros in undis:
'Mergite me, fluctus, cum rediturus ero.'

CLXXXII Sigillum gibberi fictile recensere

Ebrius haec fecit terris, puto, monstra Prometheus:
Saturnalicio lusit et ipse luto.

CLXXXIII Homeri Batrachomachia recensere

Perlege Maeonio cantatas carmine ranas
Et frontem nugis solvere disce meis.

CLXXXIV Homerus in pugillaribus membraneis recensere

Ilias et Priami regnis inimicus Ulixes
Multiplici pariter condita pelle latent.

CLXXXV Vergili Culex recensere

Accipe facundi Culicem, studiose, Maronis,
Ne nucibus positis &7arma virumque& legas.

CLXXXVI Vergilius in membranis recensere

Quam brevis inmensum cepit membrana Maronem!
Ipsius vultus prima tabella gerit.

CLXXXVII MENANDROY THAIS recensere

Hac primum iuvenum lascivos lusit amores;
Nec Glycera pueri, Thais amica fuit.

CLXXXVIII Cicero in membranis recensere

Si comes ista tibi fuerit membrana, putato
Carpere te longas cum Cicerone vias.

CLXXXIX Monobyblos Properti recensere

Cynthia - facundi carmen iuvenale Properti -
Accepit famam, non minus ipsa dedit.

CXC Titus Livius in membranis recensere

Pellibus exiguis artatur Livius ingens,
Quem mea non totum bibliotheca capit.

CXCI Sallustius recensere

Hic erit, ut perhibent doctorum corda virorum,
Primus Romana Crispus in historia.

CXCII Ovidi Metamorphosis in membranis recensere

Haec tibi, multiplici quae structa est massa tabella,
Carmina Nasonis quinque decemque gerit.

CXCIII Tibullus recensere

Ussit amatorem Nemesis lasciva Tibullum,
In tota iuvit quem nihil esse domo.

CXCIV Lucanus recensere

Sunt quidam, qui me dicant non esse poetam:
Sed qui me vendit bybliopola putat.

CXCV Catullus recensere

Tantum magna suo debet Verona Catullo,
Quantum parva suo Mantua Vergilio.

CXCVI Calvi de aquae frigidae usu recensere

Haec tibi quae fontes et aquarum nomina dicit,
Ipsa suas melius charta natabat aquas.

CXCVII Mulae pumilae recensere

His tibi de mulis non est metuenda ruina:
Altius in terra paene sedere soles.

CXCVIII Catella Gallicana recensere

Delicias parvae si vis audire catellae,
Narranti brevis est pagina tota mihi.

CXCIX Asturco recensere

Hic brevis ad numeros rapidum qui colligit unguem,
Venit ab auriferis gentibus Astur equus.

CC Canis vertragus recensere

Non sibi, sed domino venatur vertragus acer,
Inlaesum leporem qui tibi dente feret.

CCI Palaestrita recensere

Non amo quod vincat, sed quod succumbere novit
Et didicit melius THN EPIKLINOPALÆN.

CCII Simius recensere

Callidus emissas eludere simius hastas,
Si mihi cauda foret, cercopithecus eram.

CCIII Puella Gaditana recensere

Tam tremulum crisat, tam blandum prurit, ut ipsum
Masturbatorem fecerit Hippolytum.

CCIV Cymbala recensere

Aera Celaenaeos lugentia matris amores
Esuriens Gallus vendere saepe solet.

CCV Puer recensere

Sit nobis aetate puer, non pumice levis,
Propter quem placeat nulla puella mihi.

CCVI Cestos recensere

Collo necte, puer, meros amores,
Ceston de Veneris sinu calentem.

CCVII Idem recensere

Sume Cytheriaco medicatum nectare ceston:
Ussit amatorem balteus iste Iovem.

CCVIII Notarius recensere

Currant verba licet, manus est velocior illis:
Nondum lingua suum, dextra peregit opus.

CCIX Concha recensere

Levis ab aequorea cortex Mareotica concha
Fiat: inoffensa curret harundo via.

CCX Morio recensere

Non mendax stupor est, nec fingitur arte dolosa.
Quisquis plus iusto non sapit, ille sapit.

CCXI Caput vervecinum recensere

Mollia Phrixei secuisti colla mariti.
Hoc meruit tunicam qui tibi, saeve, dedit?

CCXII Pumilus recensere

Si solum spectes hominis caput, Hectora credas:
Si stantem videas, Astyanacta putes.

CCXIII Parma recensere

Haec, quae saepe solet vinci, quae vincere raro,
Parma tibi, scutum pumilionis erit.

CCXIV Comoedi pueri recensere

Non erit in turba quisquam MISOYMENOS ista:
Sed poterit quivis esse DIS EXAPATØN.

CCXV Fibula recensere

Dic mihi simpliciter, comoedis et citharoedis,
Fibula, quid praestas? 'Carius ut futuant.'

CCXVI Auceps recensere

Non tantum calamis, sed cantu fallitur ales,
Callida dum tacita crescit harundo manu.

CCXVII Accipiter recensere

Praedo fuit volucrum: famulus nunc aucupis idem
Decipit et captas non sibi maeret aves.

CCXVIII Obsonator recensere

Dic quotus et quanti cupias cenare, nec unum
Addideris verbum: cena parata tibi est.

CCXIX Cor bubulum recensere

Pauper causidicus nullos referentia nummos
Carmina cum scribas, accipe cor, quod habes.

CCXX Cocus recensere

Non satis est ars sola coco: servire palatum
Nolo: cocus domini debet habere gulam.

CCXXI Craticula cum veribus recensere

Rara tibi curva craticula sudet ofella;
Spumeus in longa cuspide fumet aper.

CCXXII Pistor dulciarius recensere

Mille tibi dulces operum manus ista figuras
Extruet: huic uni parca laborat apis.

CCXXIII Adipata recensere

<poem> Surgite: iam vendit pueris ientacula pistor Cristataeque sonant undique lucis aves.