PIUS PP. X
EPISTOLA
PII X AD PRAESIDEM SODALITATIS GERMANICAE FEMINARUM PUELLARUMQUE SACRIS EXPEDITIONIBUS ADIUVANDIS*
DILECTAE IN CHRISTO FILIAE
- BARONI DE HAXTHAUSEN
- PRAESIDI SODALITATIS
- GERMANICAE FEMINARUM PUELLARUMQUE
- SACRIS EXPEDITIONIBUS ADIUVANDIS - FULDAM
Dilecta filia, salutem et Apostolicam benedictionem.
Ad suppetias expetitionibus sacris ferendas convertere vos, coniunctis viribus, animos, atque interea obsequium praestare Illi, qui, personam quum gerat Christi, universos, ad quos expeditio quaevis sacra pertinet, cura et cogitatione complectimur, gratum mirifice est. Quapropter non modo vestrum vehementer probamus amplificandae divinae gloriae studium, exemplumque laudamus, unde publice, ad avitae propagationem fidei, enitetis, sed memorem quoque voluntatem de oblata oratorii sacri supellectili testamur, munusque sic esse a Nobis exceptum profitemur, quemadmodum coniunctionis argumenta excipere par est, quae ab optimis quibusque filiis exhibeantur. Auspicem caelestium donorum Nostraeque dilectionis testem, Apostolicam benedictionem tibi singulisque sodalibus peramanter in Domino impertimus.
Datum Romae apud S. Petrum, die XII Decembris MDCCCCIV, Pontificatus Nostri anno secundo.
PIUS PP. X
- AAS, vol. XXXIX (1906), pp. 405-406.