Migne Patrologia Latina Tomus 138
Acta synodi Pontigonensis (Auctores varii), J. P. Migne
cc_id: cps_2.AucVar.AcSyPo, cc_idno: 9679
ECCLESIAE REMENSIS PETITIO. 138.0767B|
Paternis magisteriis instruimur, ut si qua majora negotia vel majores causae exortae fuerint, ad sedem apostolicam, prout auctoritas docet et mos antiquus obtinuit, semper referantur. Ideoque quia imperialem excellentiam vestram synodo praeesse et vicarios sedis apostolicae praesto nobis adesse gaudemus, calamitates et miserias ecclesiae nostrae ac filiorum nostrorum, quas hoc anno ab Hludowico rege, itemque Hludowico filio ejus et complicibus eorum, caedes videlicet, homicidia, adulteria, fornicationes, rapinas, sacrilegia, et cetera flagitia quae nullus enumerare potest, ecclesia nostra perpessa est, vestrae serenitati innotescimus, obsecrantes ut pro 138.0767C| Dei omnipotentis amore, et pro ingenita vobis benignitate, ac pro ministerio imposito, nobis et ecclesiae nostrae ac filiis nostris secundum pervulgatam omnibus vestram sapientiam consulatis pariter ac succurratis, ne de cetero talia ac tanta mala ecclesia nostra ac regnum patiatur qualia hactenus passa est.
CONFIRMATIO ACTORUM CONVENTUS TICINENSIS.
Confirmatio Cisalpinorum.
Sicut domnus Johannes apostolicus et universalis papa primo Romae elegit atque sacra unctione constituit, omnesque Italici regni episcopi, abbates, 138.0768B| comites, et reliqui omnes qui cum illis convenerunt, domnum nostrum gloriosum imperatorem Karolum augustum unanimi devotione elegerunt sibi protectorem ac defensorem esse, ita et nos qui de Francia, Burgundia, Aquitania, Septimania, Neustria, ac Provincia, pridie Kalendas Julii in loco qui dicitur Pontigonis anno 37 in Francia, ac imperii primo, jussu ejusdem domni et gloriosi augusti convenimus, pari consensu ac concordi devotione eligimus et confirmamus.
Et subscripserunt omnes Cisalpini episcopi qui adfuerunt, et quorum nomina subter sequentia capitula, quae confirmaverunt, tenentur adscripta.
Juramentum Hincmari archiepiscopi et reliquorum procerum.
138.0768C| Sic promitto ego, quia de isto die in antea isti seniori meo, quandiu vixero, fidelis et obediens et adjutor, quantumcunque plus et melius sciero et potuero, et consilio et auxilio secundum meum ministerium in omnibus ero, absque fraude et malo ingenio et absque ulla dolositate vel seductione seu deceptione et absque respectu alicujus personae. Et neque per me, neque per missum, neque per litteras, sed neque per emissam vel intromissam personam, vel quocunque modo ac significatione, contra suum honorem et suam, ecclesiae, atque regni illi commissi quietem et tranquillitatem atque soliditatem machinabo vel machinanti consentiam. Neque unquam aliquod scandalum movebo, quod illius praesenti vel futurae saluti contrarium vel nocivum 138.0768D| esse possit. Sic me Deus adjuvet et ista sancta patrocinia.
In nomine Patris, et Filii, etc. ut supra col. 763 usque signum Berardi comitis.
Johannes Tuscanensis episcopus, legatus sanctae 138.0769A| sedis apostolicae et domni Johannis summi pontificis et universalis papae, in his quae supra scripta sunt interfui, consensi, et subscripsi. Ansegisus Senonum metropolis episcopus, sanctae et apostolicae sedis per domnum Johannem summum pontificem papam vicarius, interfui, consensi, et subscripsi. Johannes Aretinus episcopus, sanctae sedis apostolicae legatus, interfui, consensi, et subscripsi. Hincmarus Remorum archiepiscopus subscripsi. Frotarius archiepiscopus consensi et subscripsi. Aurelianus Lugdunensis ecclesiae episcopus in Christi nomine roboravi. Ottramnus Viennensis ecclesiae episcopus subscripsi. Johannes Rotomagensis ecclesiae archiepiscopus subscripsi. Bertmundus Ebredunensis ecclesiae archiepiscopus subscripsi. 138.0769B| Ragenelmus Tornacensis ecclesiae episcopus subscripsi. Walterus humilis Aurelianensis ecclesiae episcopus subscripsi. Gerboldus Cabillonensis ecclesiae episcopus subscripsi. Gislebertus Carnotensis ecclesiae episcopus subscripsi. Hildeboldus Suessionensis ecclesiae episcopus subscripsi. Rostagnus sanctae Arelatensis ecclesiae humilis episcopus subscripsi. Isaac Lingonensis ecclesiae episcopus subscripsi. Lantbertus Matiscensis ecclesiae episcopus subscripsi. Ingelwinus sanctae Parisiacensis ecclesiae episcopus subscripsi. Geroldus Ambianensis ecclesiae episcopus subscripsi. Abbo Nevernensis ecclesiae episcopus subscripsi. Johannes Cameracensis ecclesiae episcopus subscripsi. Hadebertus Silvanectensis ecclesiae episcopus subscripsi. Odo Belgivacorum 138.0769C| episcopus in Christi nomine subscripsi. Ratbertus Valentinae ecclesiae episcopus subscripsi. Bernarius Gratianopolitanae ecclesiae episcopus subscripsi. Angenulfus Gabalitanensis ecclesiae episcopus subscripsi. Birico Wapincensis ecclesiae episcopus subscripsi. Alduinus Avinionensis ecclesiae episcopus subscripsi. Wido Vallavensis ecclesiae episcopus subscripsi. Hildebrannus Sagensis episcopus subscripsi. Willebertus humilis Catalaunorum episcopus subscripsi. Ragenfridus Meldensis ecclesiae episcopus subscripsi. Heirardus Lixoviensis ecclesiae episcopus subscripsi. Sigenandus Constantiensis ecclesiae episcopus subscripsi. Aetherius Vivariensis episcopus subscripsi. Erchambertus Bajocensis ecclesiae 138.0769D| episcopus subscripsi. Hedenulfus Laudunensis ecclesiae episcopus subscripsi. Agilmarus Arvernensis ecclesiae episcopus subscripsi. Anselmus Lemovicensis ecclesiae episcopus subscripsi. Adalbertus Morinensis ecclesiae episcopus subscripsi. Willelmus Cadurcorum ecclesiae episcopus subscripsi. Lupus Albiensis ecclesiae episcopus subscripsi. Ottulfus sanctae Trecassinae ecclesiae humilis episcopus subscripsi. Berardus Viridunensis ecclesiae episcopus subscripsi. Arnaldus Leucorum ecclesiae episcopus subscripsi. Franco Tungrensis ecclesiae episcopus subscripsi. Theodoricus Vesontiorum ecclesiae archiepiscopus 138.0770A| subscripsi. Wala Antisiodorensis episcopus subscripsi. Adalgarius Augustidunensis episcopus subscripsi. Hemico Diensis ecclesiae episcopus subscripsi. Aimarus Ruthenensium ecclesiae episcopus subscripsi. Theotarius Gerundensis ecclesiae episcopus subscripsi. Hugo abba. Albustus abbas ex monasterio quod vocatur Bethleem sive Ferrarias. Hilduinus abbas et bibliothecarius. Vulfardus abba scripsit et subscripsit. Gauzlenus abba et archicancellarius.
DEFINITIO DE ADALGAUDO PRESBYTERO.
Pridie Idus Julii, in loco qui vocatur Pontigonis, ita de Adalgaudo presbytero a legatis sedis apostolicae, Leone apocrisiario sanctae sedis Romanae, Petro, Johanne, itemque Joanne, legatis memoratae 138.0770B| sanctae sedis, ac Ansegiso vicario ejusdem sanctae sedis, et ab omni concilio definitum est, ut illi propria ecclesia reddatur, et a praefatis Kalendis quatuor mensium dilatio ad famam suam purgandam illi concedatur. Si post quatuor menses purgare se canonice non potuerit, nulla ejus vox postea penitus audiatur.
CAPITULA AB ODONE PROPOSITA.
Sancta synodus quae in nomine Domini vocatione domni Johannis ter beatissimi ac universalis papae, et jussione domni Karoli perpetuo augusti congregata est in loco qui vocatur Pontigonis, anno incarnationis dominicae 876, indictione 9, regni praefati invictissimi imperatoris 37, imperii autem primo, 17 Kalendas Augusti, haec capitula quae subter adnexa 138.0770C| sunt instituit.
- 1.
Obeunte Hludowico qui Romani imperii jura regebat, domnus Johannes ter beatissimus papa per Gadericum Veliternensem, Formosum Portuensem, Johannem Aretinum venerabiles episcopos, domnum Karolum tunc regem ad limina beatorum apostolorum invitavit, eumque ecclesiae ipsius defensorem ac tutorem elegit, imperialique diademate coronavit, eum prae cunctis solum et specialem eligens qui Romani imperii sceptra teneret. Cujus sacris institutionibus pro debito parentes, quod ipse instituit instituimus, et quod ipse confirmavit pari consensu omnes firmamus.
- 2.
Congregata igitur in Romana urbe sancta 138.0770D| synodo, ante adventum praedicti domni imperatoris, misit cum consensu omnium epistolas Hludowico regi, filiis quoque ipsius, archiepiscopis, episcopis, abbatibus, ac reliquis primoribus regni sui, monentes eos apostolica auctoritate more paterno servare quae pacis sunt, ne videlicet aliquam inreptionem in regno praefati augusti facile tentarent, usque dum simul ad mutuum colloquium venirent, et ipse inter eos et de pace conservanda et de jure regnorum secundum sibi a Deo ministerium creditum decerneret pariter et discerneret. Quas epistolas per Odonem Bellovacorum venerabilem episcopum sibi destinatas 138.0771A| et bis delatos omnino recipere renuerunt.
- 3.
Ipse vero apostolica et paterna monita parvipendens, et fraterna foedera disrumpens, hostili manu tyrannico more fraternum regnum depopulando invasit; homicidia, stupra, adulteria, sacrilegia, et innumera mala quae enumerari nequeunt, auctoritas facientium perpetravit.
- 4.
Haec mala audiens ter beatissimus papa perpetrata esse in regno spiritalis filii sui domni Karoli semper augusti, tactus dolore cordis acceleravit mittere missos suos, Johannem videlicet et Johannem, venerabiles episcopos, cum aliis suis epistolis, volens eum monere, ut a tanto malo poenitudinem de praeteritis ageret, et tandem fraternum regnum invadere desineret. Quorum legationem secundo 138.0771B| commonitus necdum recipere voluit.
- 5.
Post hos denique misit iterum alios legatos, Leonem scilicet sanctissimum Gabinensem episcopum et sanctae Romanae ecclesiae missum et apocrisiarium, pariterque et Petrum Forosemproniatem venerabilem episcopum, haec eadem obsecrando, monendo protestans. Quorum monita utrum recipere velit, adhuc ambiguum constat. c
- 6.
Verum quia praefatus Leo Gabinensis reverentissimus episcopus et sanctae Romanae ecclesiae missus et apocrisiarius, seu et Petrus Forosemproniatis episcopus, pro quibusdam utilitatibus ecclesiasticis morari hic diutius nequeunt, neque episcopos de longinquo venientes fatigare longius dignum est, decreverunt Johannem Tuscanensem et Johannem 138.0771C| Aretinum venerandos episcopos, qui legationem praefatorum pariter cum priori legatione suscipientes, ea quae peragenda sunt, cum ceteris episcopis, quos communi consensu elegerint, vice omnium episcoporum, quicquid seu in evocando seu in contemptoribus feriendo definierint, apostolica auctoritate libere definiant, et quicquid ipsi deliberaverint, et domnus apostolicus cum omni sancta Romana ecclesia determinabit et in perpetuum mansurum statuet et firmabit.
- 7.
Sicut domnus papa Johannes sanxit, connivente et consentiente et condecernente domno et gloriosissimo Karolo imperatore semper augusto, Ansigisum venerabilem episcopum, Senonum archiepiscopum, 138.0771D| suam vicem tenere, et primatum ei Galliae et 138.0772A| Germaniae contulit in evocanda synodo et definiendo canonice si quaelibet insurrexerint necessaria, et ut graviora ad ipsius notitiam referat, et nos unanimiter omni devotione laudamus, et ut ita ipse primatum teneat Galliae et Germaniae decernimus et sancimus.
- 8.
Synodum quam domnus Johannes apostolicus et universalis papa super quorundam depositionem, Formosi scilicet Portuensis episcopi, et Gregorii nomenculatoris, seu et Stephani secundicerii, et Georgii vesterarii, ceterorumque suorum complicum, sicut in epistola ipsius ad nos missa continetur, nuper instituit, et nos secundum jussionem ipsius, in nullo a capite dissidentes, consentiendo decernimus, omnibusque apostolicis illius sanctionibus per 138.0772B| omnia parentes, sicut decet, obedimus.
- 9.
Censuram vero quam domnus apostolicus super nefandissima acta Hludowici regis et complicum ejus, nisi resipuerint et debitam obedientiam sedi apostolicae exhibuerint, statuit et firmavit, omnes nos qui ad praesentem synodum convenimus, unanimiter decernimus atque firmamus.
LEONIS ET PETRI LEGATORUM AUCTORITAS.
Quia domnus noster Johannes sanctissimus et ter beatissimus papa, nos quidem, me scilicet Leonem Gabinensem episcopum et sanctae Romanae ecclesiae missum et apocrisiarium, et Petrum venerabilem Forosemproniatem episcopum, ad hoc in has partes direxit, ut ceu pridem per venerabiles episcopos, Johannem videlicet et Johannem, mandaverat, vestra 138.0772C| sanctitate adgregata, de negotiis quae inter utrosque fratres hoc anno emerserant determinaremus, sed nos ob quasdam sanctae Romanae ecclesiae utilitates quia diutius morari nequimus, et vestram beatitudinem longius fatigare nolumus, hos fratres nostros, Johannem videlicet Tuscanensem et Johannem Aretinum venerabiles episcopos, vobiscum morari decrevimus, usque dum res unde agitur optatum finem divina favente gratia accipiat: qui quicquid seu in evocanda synodo, seu in definiendo, seu in contemptoribus feriendo definierint, apostolica auctoritate libere definiant, et quicquid ipsi deliberaverint, et domnus apostolicus cum omni sancta Romana ecclesia determinabit et in perpetuum mansurum 138.0772D| statuet et firmabit.
. 0767C
- NOTA. Synodus quae fuit acta apud Ticinum palatium anno incarnationis Dominicae 876, indictione IX, mense Februario; et postea fuit confirmata ipsa synodus apud Pontigonem, cum missis domni apostolici Joannis aliisque multarum provinciarum episcopis. Electio Karoli imperatoris ab Italici regni episcopis et ceteris confirmata. Gloriosissimo, etc. ut supra col. 761 usque indictione IX.
p. 0772D