Haec pagina emendata est
Et judicantem vidimus Æacum,
Sedesque discretas Piorum, et
Æoliis fidibus querentem
Sappho puellis de popularibus ;
Et te sonantem plenius aureo,
Alcæe, plectro dura navis,
Dura fugæ mala, dura belli !
Utrumque sacro digna silentio
Mirantur Umbræ dicere ; sed magis
Pugnas et exactos tyrannos
Densum humeris bibit aure vulgus.
Quid mirum, ubi illis carminibus stupens
Demittit atras belua centiceps
Aures, et intorti capillis
Eumenidum recreantur angues ?
Quin et Prometheus, et Pelopis parens
Dulci laborem decipitur sono ;
Nec curat Orion leones
Aut timidos agitare lyncas.
