Haec pagina emendata est
Herculis ritu modo dictus, o plebs,
Morte venalem petiisse laurum
Cæsar Hispana repetit penatis
Victor ab ora.
Unico gaudens mulier marito
Prodeat justis operata sacris ;
Et soror clari ducis, et decoræ
Supplice vitta
Virginum matres, juvenumque nuper
Sospitum. Vos, o pueri et puellæ
Jam virum expertæ, male ominatis
Parcite verbis.
Hic dies vere mihi festus atras
Eximet curas : ego nec tumultum
Nec mori per vim metuam, tenente
Cæsare terras.
