valentes Amideni, eorum, qui ascenderant, occiderant multos, alios deturbabant e scalis, ita ut summum discrimen amoliti tantum non fuerint, Sed strictum Cabades acinacem Persis intentans, ad scalas compellere nunquam intermittebat: unde si qui pedem referrent, praesenti nece poenas luebant. Obrutis tandem maiori Persarum numero hostibus, vi. capta urbs est octogesimo obsidionis die, atque ingens oppidanorum strages edita; donec sacerdos quidam senex ad Cabadem, cum in urbem ingrederetur, progressus, admonuit regium non esse facinus bello captos interficere. Cui Cabades iracundia adhuc ardens, Nam quid vos, ait, impulit ut mihi hostiliter obsisteretis? Mox ille: Quoniam tua tibi virtute, non voluntate nostra Deus Amidam tradere voluit. Adeo gratum Cabadi responsum hoc accidit, ut illico iusserit caedibus temperari, satis habens direptioni urbem relinquere ac residuos cives Persis addicere in servitutem, selectis sibi nonnullis, qui inter eos eminebant.
Paulo post Cabades imposito urbi praesidio virorum mille, cum Glonem Persam praefecisset, ac iussisset manere misellos aliquot Amidenos, qui ministeria circa victum obirent, domum repetiit cum exercitu reliquo et captivis, quibus regiam sane exhibuit humanitatem. Nam brevi
