Hanc ille sedem diutissime tenuerat, ab aestu invictus et frigore, leguminibus vitam tolerans; ac ne his quidem quotidie, sed longa per intervalla consueverat vesci. Eum forte Ephthalitae nonnulli illac pervagantes viderunt. Mox animos barbaros libido incessit sagittas in virum experiendi. Iamque collimabant, cum omnium repente manus ita diriguere, ut ad arcum inertes haeserint. Discurrens rei fama per castra, ubi pervenit ad Cabadem, eum ut oculis miraculum acciperet perpulit Simul vidit, obstupuit, et cum eo Persae qui aderant: tum barbaris delicti gratiam precatus est a Iacobo; qui continuo exoratus, poena solutos dimisit. At Cabades optionem quidvis petendi fecit, ratus grandem pecuniam rogaturum, ideoque iactanter pollicitans ipsius vota cumulate impletum iri. Hoc ille unum poposcit, ut quicunque per id bellum ad se perfugerent, sibi omnes condonarentur Postulatum Cabades ratum has fidei publicae literas dedit. Ita multis data salus, qui eo undique confluxerunt, fama rei gestae exciti. Haec ibi.
Cum autem Cabades Amidam oppugnans ab omni parte muros ariete verberaret, non cessabant oppidani, missis desuper trabibus transversis machinae caput decutere. Neque abstitit, donec ea via expugnari moenia non posse animadvertit. Iteratis enim saepe impressionibus nequive-
